ខ្សែបម្រើជើងចាស់ Andres Iniesta បានលើកដៃលាទៅកាន់អ្នកគាំទ្រក្លិប Barcelona កាលពីថ្ងៃអាទិត្យ និងអ្នកដែលជំនួសកន្លែងរបស់គេ ខណៈដែលការស៊ុតបាល់បញ្ចូលទីយ៉ាងល្អរបស់ Philippe Coutinho បានជួយឱ្យពួកគេទទួលជ័យជម្នះក្នុងលទ្ធល 1-០ លើក្រុម Real Sociedad។
Iniesta ដែលបានសម្រក់ទឹកភ្នែកនោះ បានដើរចេញពីទីលាននៃកីឡដ្ឋាន Camp Nou ក្រោមការទះដៃលើកចិត្តពីសំណាក់អ្នកគាំទ្រដ៏ច្រើនកុះករ នៅពេលដែលរូបគេត្រូវបានប្តូរចេញក្នុងតង់ទី2 ក្រោយពីបានដោះបូដៃប្រធានក្រុម និងបានប្រគល់ទៅឱ្យ Lionel Messi។
ប្រសិនបើ Messi នឹងត្រូវក្លាយជាប្រធានក្រុមថ្មីរបស់ Barcelona ខ្សែបម្រើ Coutinho នឹងក្លាយជាកីឡាករដែលនឹងត្រូវជំនួសកន្លែងរបស់ Iniesta ហើយកីឡាកររូបនេះ បានបង្ហាញពីទម្រង់លេងយ៉ាងល្អដើម្បីរកគ្រាប់បាល់ឈ្នះក្នុងការប្រកួតកាលពីថ្ងៃអាទិត្យ។
ក្រោយពីចំណាយពេលលេង 22ឆ្នាំក្នុងក្លិបនេះ និងចូលលេងក្នុងក្រុមជម្រើសដំបូងតាំងពីវ័យ 16ឆ្នាំ ការបង្ហាញខ្លួនចំនួន 674លើករបស់ Iniesta សម្រាប់ក្រុម Barcelona បានធ្វើឱ្យរូបគេដេញតាមតែពីក្រោយ Xavi Hernandez ក្នុងនាមជាកីឡាករដែលបានបង្ហាញខ្លួនច្រើនជាងគេបំផុតប្រចាំក្លិប។ Iniesta បាននិយាយទៅកាន់អ្នកគាំទ្ររបស់ខ្លួនថា៖ «វាជាថ្ងៃដ៏លំបាកមួយ។ ប៉ុន្តែ វាបានក្លាយជារយៈពេល 22ឆ្នាំដ៏អស្ចារ្យមួយ។ វាបានក្លាយជាសិទ្ធិមួយ និងការរីករាយមួយក្នុងការការពារ និងតំណាងឱ្យក្លិបនេះ។ ខ្ញុំនឹងចងចាំអ្នកទុកក្នុងបេះដូងរបស់ខ្ញុំជានិច្ច»៕
ប្រភពពី៖ BBC
