បើគិតមកដល់ពេលនេះ ដំណើររឿងរ៉ាវនៃការបែកបាក់របស់កូនស្រីថៅកែផលិតកម្មមហាហង្ស ភិន សុដាលីស ជាមួយនឹងលោក ប៉ែន ចំរ៉ុង បានរសាត់ឆ្ងាយពីអារម្មណ៍របស់ទស្សនិកជនប្រមាណជិត2ឆ្នាំកន្លងទៅហើយ ដោយជាលទ្ធផលបានបន្សល់ទុកនូវកូនស្រីដ៏ស្រស់ស្អាត និងគួរឱ្យស្រឡាញ់ម្នាក់ឈ្មោះ ខេត ធើរីណា ដែលមានអាយុត្រឹម1ឆ្នាំ8ខែ។ ប៉ុន្តែអ្វីដែលធ្វើឱ្យទស្សនិកជនមានការចាប់អារម្មណ៍ និងភ្ញាក់ផ្អើលសាជាថ្មីនោះ គឺនៅពេលដែលលេចធ្លាយដំណឹងមកថា ពេលនេះ ស្រីស្រស់ដែលជាប់ឈ្មោះជាអ្នកមេម៉ាយទាំងវ័យក្មេង ភិន សុដាលីស បានរកឃើញអ្នកស្អំបេះដូងជំនួស ប៉ែន ចំរ៉ុង បានហើយ ខណៈដែលបុរសម្នាក់នោះក៏ជាតារាសម្ដែង និងស្ថិតនៅក្នុងចង្កោមផលិតកម្មមហាហង្សផងដែរ។
ផ្អែកតាមប្រភពព័ត៌មានដែលទម្លាយចេញពីផលិតកម្មមហាហង្សបានបង្ហើបថា បច្ចុប្បន្ននេះអ្នកមេម៉ាយចាយរាង ភិន សុដាលីស បានស្វែងរកឃើញអ្នកព្យាបាលដំបៅបេះដូង ដែលបន្សល់ទុកពី ប៉ែន ចំរ៉ុង បានហើយ ដោយបុរសម្នាក់នោះក្រៅពីមានរូបរាងខ្ពស់ស្អាតសង្ហា ថែមទាំងជាមនុស្សដែលចេះថ្នាក់ថ្នម និងយកចិត្តទុកដាក់ជាមួយនាងយ៉ាងខ្លាំងថែមទៀតផង។ ប្រភពដដែលបានបន្តទៀតថា កាលដំបូងឡើយ សម្រាប់ទំនាក់ទំនងរបស់ ភិន សុដាលីស ជាមួយតារាសម្ដែងប្រុសម្នាក់នោះហាក់មិនត្រូវបានគេកត់សម្គាល់នោះឡើយ ដោយនាងគ្រាន់តែបង្ហាញពីសកម្មភាពរាប់អាន និងនិយាយលេងសើចបែបធម្មតាក្នុងនាមជាអ្នករួមការងារជាមួយគ្នាតែប៉ុណ្ណោះ ប៉ុន្តែអ្វីដែលធ្វើឱ្យមានការចាប់អារម្មណ៍បំផុតនោះ គឺទើបតែក្នុងអំឡុងពេលប្រមាណជាង2ខែចុងក្រោយនេះតែប៉ុណ្ណោះ ខណៈដែលនាងបានបង្ហាញពីភាពស្និទ្ធស្នាលខុសពីពេលមុនៗ ជាពិសេស ភិន សុដាលីស ចាប់ផ្តើមតុបតែងខ្លួនដូចគ្រាដែលនាងនៅក្រមុំយ៉ាងដូច្នោះដែរ។ បន្ថែមពីនេះ ជានិច្ចកាល នាងតែងបង្ហាញពីក្ដីព្រួយបារម្ភ និងយកចិត្តទុកដាក់លើបុរសម្នាក់នោះជាខ្លាំង ដែលសូម្បីតែពេលសម្រាកពីការសម្ដែងម្ដងៗ ភិន សុដាលីស គឺជាអ្នកយកទឹកឱ្យតារាសម្ដែងដែលប្រៀបដូចជាទេពបុត្ររបស់នាង។
យ៉ាងណាមិញ នៅពេលជួបផ្ទាល់ជាមួយអ្នកព័ត៌មានប្រចាំនៅទស្សនាវដ្ដី ឡារ៉ែន កាលពីពេលកន្លងទៅ នៅក្នុងឱកាសនៃការប្រារព្ធពិធីសម្ពោធខ្សែភាពយន្តរឿងភាគសម្រាប់ចាក់បញ្ចាំងនៅលើកញ្ចក់ទូរទស្សន៍ PNN រឿង “បំណុលស្នេហ៍” ភិន សុដាលីស មិនបានសារភាពតបទៅនឹងដំណឹងដ៏រសើបខាងលើនេះឡើយ ដោយនាងលើកយកហេតុផលមកបញ្ជាក់យ៉ាងដូច្នេះថា “មិនដឹងដំណឹងនេះធ្លាយចេញមកណានោះទេ ប៉ុន្តែសំខាន់គឺខ្លួនខ្ញុំផ្ទាល់អត់បានដឹងសោះ។ ខ្ញុំគ្មានអ្នកស្អំបេះដូងបេះដាំងមកពីណានោះទេ ហើយក៏មិនធ្លាប់គិតពីរឿងនេះដែរ។ ដោយឡែករឿងខ្ញុំតុបតែងខ្លួន វាជារឿងធម្មតារបស់មនុស្សស្រី ហើយក៏ដើម្បីការងារសិល្បៈដែរ បើខ្ញុំមិនតែងខ្លួនឱ្យស្អាត តើសម្ដែងម៉េចកើត។ ជាតារាសម្ដែង រឿងតុបតែងខ្លួនគឺជារឿងធម្មតាទៅហើយ ហើយក៏មិនមែនតែខ្ញុំដែរ ដែលចូលចិត្តតុបតែងខ្លួននោះ វាគ្មានអ្វីដែលចម្លែកនោះទេ”។
យ៉ាងណាក៏ដោយ បើទោះជា ភិន សុដាលីស បានឆ្លើយបដិសេធទៅនឹងការលេចធ្លាយព័ត៌មានខាងលើនេះក៏ដោយ ប៉ុន្តែសម្រាប់អ្នកតាមដានសកម្មភាពតារា នៅតែធ្វើការកត់សម្គាល់ដដែល រួមជាមួយការព្យាយាមរកភស្តុតាងមកបញ្ជាក់ ដើម្បីឱ្យទស្សនិកជនបានជ្រាបច្បាស់ពីរឿងរ៉ាវស្នេហាក្រៅឆាករបស់នាង៕
