ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានឱ្យដឹងថា៖ ដំណាំម្រេចនឹងមានការរីកចម្រើននាពេលដ៏ខ្លីខាងមុខ ដោយរាជរដ្ឋាភិបាលបានរៀបចំគោលនយោបាយសមស្របមួយ សំដៅធានាអភិវឌ្ឍន៍វិស័យដំណាំម្រេចកម្ពុជាប្រកបដោយនិរន្តរភាព។ លោកបានថ្លែងដូច្នេះក្នុងខណៈអញ្ជើញធ្វើជាគណៈអធិបតីក្នុងពិធីបិទវេទិកាម្រេចលើកទី2 ដែលរៀបចំឡើងនៅទីស្តីការក្រសួងពាណិជ្ជកម្មកាលពីថ្ងៃទី24 ខែមេសា ឆ្នាំ2018។
ឯកឧត្តមរដ្ឋមន្ត្រីបានមានប្រសាសន៍ថា បច្ចុប្បន្នក្រសួងពាណិជ្ជកម្មកំពុងសហការជាមួយដៃគូអភិវឌ្ឍន៍ ដើម្បីរៀបចំរចនាសម្ព័ន្ធដឹកនាំ និងបណ្តាញផ្គត់ផ្គង់ច្បាស់លាស់ជាមួយគោលនយោបាយសមស្រប សំដៅធានាអភិវឌ្ឍវិស័យដំណាំម្រេចកម្ពុជាប្រកបដោយនិរន្តរភាព ហើយនៅឆ្នាំខាងមុខវិស័យនេះនឹងកាន់តែរឹងមាំឡើងៗ ប្រហាក់ប្រហែលនឹងវិស័យស្រូវ អង្ករ និងដំឡូងមីដែរ។
ជាមួយគ្នានេះដែរ ឯកឧត្តមរដ្ឋមន្ត្រីបានផ្តល់អនុសាសន៍ដល់ភាគីពាក់ព័ន្ធដើម្បីអភិវឌ្ឍវិស័យដំណាំម្រេច និងបានសំណូមពរដល់អ្នកជំនាញការជាតិ និងអន្តរជាតិជួយពន្លឿនការចងក្រងសេចក្តីព្រាងគោលនយោបាយម្រេចដើម្បីដាក់ឆ្លងគណៈកម្មការបច្ចេកទេសអន្តរក្រសួង មុនពេលស្នើសុំការអនុម័តពីរាជរដ្ឋាភិបាល។
គោលនយោបាយនេះនឹងត្រូវផ្កោតលើកិច្ចសម្រួលពាណិជ្ជកម្ម ប្រព័ន្ធកាត់បន្ថយថ្លៃដើមផលិតកម្ម ប្រព័ន្ធឡូជីស្ទីក ជំនួយឥណទាន បច្ចេកទេសដាំដុះថែទាំ និងការកសាងទំនុកចិត្តលើទីផ្សារ រាប់ទាំងប្រព័ន្ធសុវត្ថិភាព គុណភាព ស្លាកសញ្ញា និងនិមិត្តសញ្ញាម្រេចខ្មែរជាដើម។
ឯកឧត្តមបានបង្ហាញជំនឿថា ប្រសិនបើយើងសហការគ្នាធ្វើកិច្ចការទាំងនេះតាមតួនាទី និងទទួលខុសត្រូវតាមស្ថាប័នរៀងខ្លួន វិស័យម្រេចនឹងមានការរីកចម្រើននាពេលដ៏ខ្លីខាងមុខ។
ក៏ប៉ុន្តែបើតាមអ្នកជំនាញទីផ្សាររបស់ក្រុមហ៊ុន អង្គរគ្រីន អិនវេសមិន ឌីវេឡុបមេន (AGID) បានគូសបញ្ជាក់ដូច្នេះថា៖ “ចំពោះដំណាំម្រេច បច្ចុប្បន្នបើកសិករយើងបានធ្វើការដាំដុះដោយមានបទដ្ឋានស្តង់ដារត្រឹមត្រូវនោះយើងនឹងមានទិន្នផលល្អ បើមានទិន្នផលល្អយើងពិតជាមានទីផ្សារល្អ។ លោកបានបញ្ជាក់បន្ថែមថា បើយើងចង់បានទិន្នផលល្អ នោះយើងត្រូវតែបណ្តុះបណ្តាលឱ្យកសិករចេះប្រើប្រាស់ជីសម្រាប់ដំណាំនេះឱ្យបានត្រឹមត្រូវ ដែលសព្វថ្ងៃនេះក្រុមហ៊ុនយើងបានជួយកសិករលើបញ្ហានេះរួមទាំងវិធានការការពារដំណាំនេះផងដែរ។
លោក ហួរ ភីនាង ប្រធានផ្នែកទីផ្សាររបស់ក្រុមហ៊ុនអង្គរគ្រីន(AGID)បានឱ្យដឹងទៀតថា៖“ប្រសិនបើទីផ្សារល្អសង្ឃឹមថា ទិន្នផល 2ម៉ឺនតោន ក្នុងមួយឆ្នាំដែលជាតួលេខបច្ចុប្បន្ន អាចនឹងកើនឡើង តែបើវាជាតម្លៃថេរនោះ ការកើនឡើងប្រហែលជាមិនអាចទៅរួចទេ ព្រោះកសិករគិតថា មិនទាន់ហ៊ានពង្រីកកសិដ្ឋានរបស់ខ្លួន ព្រោះទីផ្សារយើងវាប្រែប្រួលទៅតាមទីផ្សារប្រទេសជិតខាង។
សូមបញ្ជាក់ថា ម្រេចគឺជាដំណាំដ៏មានសក្តានុពលរបស់កម្ពុជា ដែលត្រូវបានក្រសួងពាណិជ្ជកម្ម ដាក់បញ្ចូលនៅក្នុងយុទ្ធសាស្ត្រសមាហរណកម្មពាណិជ្ជកម្ម (CTIS) ដើម្បីអភិវឌ្ឍចង្វាក់តម្លៃ និងធ្វើពិពិធកម្មការនាំចេញ។ បច្ចុប្បន្នម្រេចត្រូវបានដាំដុះនៅក្នុងខេត្តចំនួន19 លើផ្ទៃដីប្រមាណ 6,678ហិកតហើយផ្តល់ទិន្នផលប្រហែលជាង 2ម៉ឺនតោនក្នុងមួយឆ្នាំ។ ការរៀបចំវេទិកាម្រេចថ្ងៃនេះ គឺជាដំណាក់កាលថ្មីមួយទៀតនៃការអភិវឌ្ឍវិស័យម្រេច ដើម្បីបម្រើអត្ថប្រយោជន៍តួអង្គពាក់ព័ន្ធទាំងឡាយ គឺទាំងអ្នកដាំ និងអ្នកទទួលទិញម្រេចពីប្រជាកសិករ អ្នកកែច្នៃម្រេចនាំចេញ និងអ្នកប្រើប្រាស់ម្រេចជាគ្រឿងទេសទូទៅផងដែរ។
ផលិតផលម្រេចរបស់ប្រទេសកម្ពុជាបានកើនឡើងជាលំដាប់ចាប់តាំងពីឆ្នាំ2013 មកម្ល៉េះ។ របាយការណ៍ចុងក្រោយរបស់ក្រសួងកសិកម្មបានបង្ហាញថា ការផលិតម្រេចក្នុងឆ្នាំ2016 បានកើនឡើង ដល់ 20,054តោន ខ្ពស់ជាង 8ដង បើធៀបនឹងឆ្នាំ2013។ ប៉ុន្ដែ ទោះជាយ៉ាងណាបើតាមរបាយការណ៍របស់ក្រសួងកសិកម្ម ផលិតផលម្រេចកម្ពុជាបានធ្លាក់ថ្លៃពី 10ដុល្លារ 5កាក់ក្នុងមួយគីឡូក្រាម នៅឆ្នាំ2014 មកនៅត្រឹម 3ដុល្លារ 4កាក់ ក្នុងមួយគីឡូក្រាម នៅឆ្នាំ2017 កន្លងទៅ៕
