ដើម្បីឱ្យអតិថិជនបានយល់ពីសារៈប្រយោជន៍នៃការទិញខុនដូ Seagate Suite ដែលមានទីតាំងនៅក្បែរឆ្នេរសមុទ្រខេត្តព្រះសីហនុ ក្រុមហ៊ុន Huttons CPL ដែលជាក្រុមហ៊ុនតំណាងផ្នែកលក់គម្រោងខុនដូខាងលើបានរៀបចំពិធីជួបជុំដ៏អធិកអធមមួយជាមួយអតិថិជនរបស់ខ្លួនកាលពីល្ងាចថ្ងៃទី28 ខែមេសា ម្សិលមិញនេះ។
លោកឧកញ៉ា ចេង ខេង អគ្គនាយកក្រុមហ៊ុន Huttons CPL មានប្រសាសន៍ថា ការជួបជុំជាមួយអតិថិជននាពេលនេះគឺដើម្បីធ្វើការបង្ហាញអំពីសក្តានុពលនៃការវិនិយោគលើការទិញខុនដូដ៏ខ្ពស់ស្កឹមស្កៃ សម្រាប់ស្នាក់នៅ ឬជួលបន្តទៅឱ្យអតិថិជនស្នាក់នៅក្បែរឆេ្នរសមុទ្រខេត្តព្រះសីហនុ ដែលជាខេត្តមួយត្រូវបានគេមើលឃើញថា មានសក្តានុពលខ្លាំងជាងគេបំផុតខាងផ្នែកវិស័យទេសចរណ៍ឆ្នេរសមុទ្រ។
លោកបន្តថា ខុនដូ The Seagate Suite គឺជាខុនដូដែលខ្ពស់ជាងគេបង្អស់នៅខេត្តព្រះសីហនុមានកម្ពស់ដល់ទៅ 43ជាន់ ស្មើនឹង 1118 units នៅជាប់មាត់សមុទ្រដែលមានឆ្នេរស្រស់ស្អាតជាប់ចំណាត់ថ្នាក់លេខ13នៅលើពិភពលោកដែលត្រូវបានចុះផ្សាយដោយកាសែត The New York Time កាលពីពេលថ្មីៗកន្លងទៅ។ ក្រៅតែពីសក្តានុពលខាងផ្នែកវិស័យទេសចរណ៍ហើយ ខេត្តព្រះសីហនុគឺជាខេត្តមួយមានសក្ដានុពលក្នុងការដឹកជញ្ជូនទាំងផ្លូវគោក ផ្លូវទឹក និងផ្លូវអាកាស។
សក្តានុពលនៃការដឹកជញ្ជូនគឺថា ខេត្តព្រះសីហនុ គឺជាខេត្តមួយក្នុងចំណោមខេត្តចំនួន3នៅក្នុងប្រទេសកម្ពុជាដែលមានព្រលានយន្តហោះដឹកអ្នកដំណើរតាមផ្លូវអាកាស មានកំពង់ផែទឹកជ្រៅ ដែលអាចដឹកទំនិញធុនធ្ងន់ឆ្លងកាត់ពីប្រទេសមួយទៅប្រទេសមួយ មានតំបន់សេដ្ឋកិច្ចពិសេសធំជាងគេ មានផ្លូវរថភ្លើង ហើយអ្វីដែលពិសេសនោះគឺរដ្ឋាភិបាលគ្រោងនឹងសាងសង់ផ្លូវល្បឿនលឿនពីទីក្រុងភ្នំពេញទៅខេត្តព្រះសីហនុ ដែលមានចម្ងាយត្រឹមតែជិត 200គីឡូម៉ែត្រប៉ុណ្ណោះនាពេលឆាប់ៗនេះទៀតផង។
លោកថា អ្វីដែលធ្វើឱ្យអតិថិជនទទួលបានផលចំណេញគឺថា ដីនៅតំបន់មាត់សមុទ្រខេត្តព្រះសីហនុនេះនឹងនៅតែបន្តឡើងថ្លៃទៀតនាពេលខាងមុខ ដោយសារតែជនបរទេសសម្លឹងឃើញ និងបានចូលមកបោះទុនវិនិយោគកាន់តែច្រើនឡើងៗនារយៈពេលចុងក្រោយនេះ ពិសេសជនជាតិចិនតែម្តង ដែលធ្វើឱ្យតម្លៃដីកាលពីឆ្នាំមុនមានតម្លៃត្រឹមតែ 500 ឬ600ដុល្លារក្នុងម៉ែត្រការ៉េនោះ បច្ចុប្បន្នឡើងថ្លៃដល់1500 ឬ2000ដុល្លារក្នុងមួយម៉ែត្រការ៉េ ស្មើនឹងដីក្នុងតំបន់ទួលគោកក្នុងក្រុងភ្នំពេញដែរ ហើយថាតម្លៃដីទីនោះនឹងកាន់តែឡើងថ្លៃថែមទៀតដូចតំបន់បឹងកេងកងដែរ នៅពេលបរទេសបោះទុនវិនិយោគសាងសង់គម្រោងអគារធំៗនៅទីនោះ។
គួរបញ្ជាក់ថា បច្ចុប្បន្នការផ្គត់ផ្គង់អគារស្នាក់នៅ ឬជួលនៅខេត្តជាប់មាត់សមុទ្រនេះ នៅតែមានចំនួនតិចជាងតម្រូវការប្រើប្រាស់ ពិសេសពេលចុងសប្តាហ៍ ឬថ្ងៃបុណ្យទានផ្សេងៗ ផ្ទះសំណាក់ ឬសណ្ឋាគារនៅតំបន់នោះនឹងឡើងថ្លៃខ្លាំង ហើយពេលខ្លះថែមទាំងរកជួលស្នាក់នៅមិនបានទៀតផង ដូច្នេះបើសិនជាអតិថិជនទិញហើយទុកជួលវិញនោះ ច្បាស់ជាទទួលបានប្រាក់ចំណេញកាន់តែច្រើនមិនខាន។
លោកឧកញ៉ា ចេង ខេង បានបញ្ជាក់ថា ចង់បានប្រាក់ចំណេញច្រើនត្រូវវិនិយោគលើអចលនវត្ថុ ហើយរង់ចាំឡើងថ្លៃ កុំរង់ចាំឡើងថ្លៃហើយបានវិនិយោគ នាំឱ្យហួសពេលសល់តែពាក្យស្តាយក្រោយ៕
