កូនៗរៀនពូកែ និងក្លាយជាមនុស្សមានសមត្ថភាពគឺជាក្តីស្រមៃរបស់អាណាព្យាបាលជាច្រើនដែលពួកគាត់ខិតខំប្រឹងប្រែងគ្រប់លទ្ធភាពដើម្បីកូនៗ តែជាអកុសលឪពុកម្តាយមួយចំនួនមិនបានដឹងវិធីសាមញ្ញៗដើម្បីជួយកូនតូចៗមានការចងចាំល្អឡើយ។
ការពឹងតែលើសាលារៀនគ្រប់យ៉ាង មិនមែនជាជម្រើសល្អនោះទេសម្រាប់អប់រំកូនតូចៗឱ្យចង់រៀនសូត្រ ហើយក្លាយជាអ្នកចេះដឹង ព្រោះគ្រូបង្រៀនមិនអាចធ្វើឱ្យក្មេងទាំងអស់ក្លាយជាសិស្សលេខ1 ពេញមួយថ្នាក់បានឡើយ តែប្រសិនបើអាណាព្យាបាលពូកែអប់រំកូនវិញ គាត់អាចនឹងជួយកូនតូចៗរបស់គាត់ឱ្យជោគជ័យក្នុងការរៀនសូត្របាន។
ខាងក្រោមនេះជាវិធីសាមញ្ញៗដើម្បីជួយក្មេងៗឱ្យមានភាពឆ្លាតវៃ ហើយធ្វើឱ្យពួកគេចូលចិត្តរៀនរហូតដល់ពួកគេធំឡើង។
- ព្យាយាមស្វែងយល់ពីប្រព័ន្ធអប់រំ
អាណាព្យាបាលជាច្រើនបានបញ្ជូនកូនទៅរៀនដោយរំពឹងថា គាត់បានចំណាយលុយកាក់ និងធនធានគ្រប់យ៉ាងដើម្បីឱ្យកូនទទួលបានចំណេះដឹងពីក្នុងសាលា ហើយតួនាទីរបស់គាត់គឺគ្រាន់តែជាអ្នករកលុយផ្គត់ផ្គង់ ការសិក្សារបស់កូនតែប៉ុណ្ណោះ។ ការគិតបែបនេះមិនមែនជាការគិតប្រកបដោយភាពទទួលខុសត្រូវទាំងស្រុងនោះទេ ព្រោះថា អាណាព្យាបាលដែលមានភាពវៃឆ្លាតតែងតែនៅពីក្រោយភាពជោគជ័យរបស់កូនជានិច្ច។
លទ្ធផលនៃការស្រាវជ្រាវមួយចំនួនស្តីពីការអប់រំបានបង្ហាញថា កូនក្មេងដែលទទួលបានការសិក្សាល្អ ភាគច្រើនមានអ្នកណែនាំ និងទទួលបានបទពិសោធជាក់ស្តែងពីខាងក្រៅច្រើនជាងការគ្រាន់តែរៀនក្នុងសាលា។ ហេតុនេះការដែលអាណាព្យាបាលបានមើលត្រួសៗពីចំណុចសំខាន់ៗក្នុងសៀវភៅរបស់ក្មេងដែលនឹងត្រូវរៀនពេញមួយឆ្នាំ ឬចំណាយពេលមើលពីមាតិកាអប់រំសំខាន់ៗទុកជាមុន អាចជួយឱ្យពួកគាត់ដឹងពីចំណុចដែលគាត់អាចជួយកូនរបស់គាត់បាន ហើយថែមទាំងរៀបចំវិធីសាស្ត្រលើកទឹកចិត្តកូនបានល្អទៀតផង ព្រោះកូនៗអាចនឹងគិតថា គាត់ជាមនុស្សយល់ចិត្ត និងដឹងពីតម្រូវការរបស់គេគ្រប់យ៉ាង។
នៅពេលដែលអាណាព្យាបាលបានដឹងពីមេរៀនខ្លះៗដែលកូននឹងត្រូវរៀនពេញមួយឆ្នាំនោះ គាត់អាចនឹងនាំកូនរបស់គាត់ឱ្យស្គាល់ពិភពពិតជាក់ស្តែងដែលមេរៀនចង់ពន្យល់គាត់នៅពេលសម្រាក រួមទាំងវិធីសាស្ត្រល្អជាច្រើនទៀត។
- បើមានជម្រើស ក្មេងៗចូលចិត្តស្តាប់រឿងជាងការលេងរបស់លេងម្នាក់ឯង
នៅក្នុងសម័យបច្ចេកវិទ្យា អាណាព្យាបាលជាច្រើនកំពុងមានក្តីកង្វល់ខ្លាំងលើគម្លាតរវាងកូនៗ និងពួកគាត់។ គម្លាតទាំងអស់នោះអាចមកពីបញ្ហាពេលវេលាក្នុងការងារ និងការជក់លេងរបស់ក្មេងក្នុងពិភពបច្ចេកវិទ្យាដែលឪពុកម្តាយគ្រប់គ្រងមិនបានល្អ។ នៅក្នុងប្រទេសអភិវឌ្ឍន៍មួយចំនួន ក្រុមអ្នកវិទ្យាសាស្ត្រដែលក្នុងនោះរួមទាំងក្រុមហ៊ុន Apple ផងបានចាប់ផ្តើមរិះរកវិធីផ្សេងៗដើម្បីទប់ស្កាត់ភាពញៀនរបស់កុមារចំពោះបច្ចេកវិទ្យា ហើយងាកមកបង្កើនភាពស្និទ្ធស្នាលជាមួយពិភពមនុស្សជាក់ស្តែង ឬជាមួយអាណាព្យាបាលវិញ។
អ្នកជំនាញអប់រំបានផ្តល់ដំបូន្មានថា ការចេះរកវិធីនាំកូនកម្សាន្តបែបអប់រំ ជាវិធីល្អបំផុតក្នុងការបង្កើនភាពស្និទ្ធស្នាលដល់កុមារ។ អាណាព្យាបាលមួយចំនួនអាចស្វែងរកល្បែងកម្សាន្តដែលមានភាពទាក់ទាញ និងទាក់ទងនឹងការសិក្សាបែបគណិតវិទ្យាស្រាលៗ ឬអាចជ្រើសរើសយករឿងខ្លីៗដែលមានក្នុងកម្មវិធីសិក្សាមកនិយាយប្រាប់កូនតូចៗបាន ព្រោះក្មេងអាចនឹងចូលចិត្តស្តាប់ប្រសិនបើមនុស្សធំមានវិធីសាស្ត្រល្អៗក្នុងការលួងលោមពួកគេឱ្យមានភាពសប្បាយរីករាយ។
ការជ្រើសរើសយករឿងដែលមានក្នុងកម្មវិធីសិក្សាមកនិយាយប្រាប់កូនតូចៗ អាចធ្វើឱ្យក្មេងរីករាយ ហើយចងចាំបានល្អ។ វិធីនេះអាចធ្វើឱ្យពួកគេចងចាំមេរៀនបានល្អ និងរីករាយនៅពេលដែលគេឃើញរឿងដែលខ្លួនបានដឹងរួចរាល់ហើយ ត្រូវបានគ្រូលើកយកមកបង្រៀន។
- ក្មេងចូលចិត្តការលើកទឹកចិត្ត តែមិនចូលចិត្តការពិន័យនោះទេ
អាណាព្យាបាលមួយចំនួនធំបានទទួលជោគជ័យលើការអប់រំកូនតាមរយៈការជ្រើសរើសយករឿងដែលធ្លាប់បាននិយាយប្រាប់កូនៗហើយមកបង្កើតជាល្បែងល្បងប្រាជ្ញាសម្រាប់សួរកូនៗវិញ។ អាណាព្យាបាលខ្លះក៏បរាជ័យផងដែរ នៅពេលដែលគាត់ចាប់ជំរិតក្មេងតូចដើម្បីសួរមេរៀន ដែលវានឹងធ្វើឱ្យក្មេងៗមានការធុញទ្រាន់ ហើយមិនចង់ឆ្លើយ។ នៅពេលក្មេងមិនចង់ឆ្លើយ មនុស្សធំភាគច្រើនប្រើវិធីបង្ខំ ឬអំពើហិង្សា ដែលបញ្ហានេះកាន់តែធ្វើឱ្យក្មេងស្អប់ការរៀនសូត្រថែមទៅទៀត។
ជាជម្រើសល្អ មិនថារឿងរ៉ាវប្រវត្តិសាស្ត្រងាយៗ លំហាត់ល្បងប្រាជ្ញាគណិតវិទ្យា ឬរឿងអក្សរសិល្ប៍នោះទេ ប្រសិនបើអាណាព្យាបាលឆ្លាត គាត់នឹងជ្រើសរើសយកសាច់រឿងទាំងអស់នោះមកធ្វើជាសំណួរងាយៗ កំប្លែងៗ ដើម្បីឱ្យក្មេងតូចៗឆ្លើយ។ ការធ្វើបែបនេះអាចធ្វើឱ្យក្មេងមានឱកាសហ្វឹកហាត់សមត្ថភាពបានយ៉ាងល្អ និងស្រឡាញ់ការរៀនសូត្រកាន់តែខ្លាំងឡើង។
ម្យ៉ាងវិញទៀត នៅពេលយើងសួរក្មេងៗពីមេរៀនប្រវត្តិសាស្ត្រ ហើយពួកគេឆ្លើយត្រូវសំណួរអាណាព្យាបាលអាចសរសើរ ឬផ្តល់ជារង្វាន់ដោយនាំពួកគេទៅកាន់កន្លែងនោះផ្ទាល់តែម្តង ដែលការធ្វើបែបនេះអាចធ្វើឱ្យក្មេងកាន់តែចងចាំបានល្អ ហើយចូលចិត្តរៀន និងស្រឡាញ់ឪពុកម្តាយកាន់តែខ្លាំងឡើងទៀតផង៕
