លោក Jurgen Klopp បានកោតសរសើរពីភាពអស្ចារ្យរបស់ក្រុម Liverpool ក្នុងការលត់ក្រុម Roma យ៉ាងចាស់ដៃក្នុងលទ្ធផល 5-2កាលពីថ្ងៃអង្គារ ខណៈដែលអ្នកចាត់ការទូទៅរបស់ក្រុមហង្សក្រហមមួយនេះ បានបញ្ជាក់ថា ក្រុមរបស់លោកធ្វើបានយ៉ាងល្អក្នុងការប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជើងទី1 ដែលហួសពីការរំពឹងទុករបស់លោក។
ក្រុមរបស់លោក Klopp កំពុងតែស្ថិតយ៉ាងប្រកៀកក្នុងការឆ្ពោះទៅកាន់វគ្គផ្តាច់ព្រ័ត្រ ក្រោយពីបានលត់ក្រុម Roma យ៉ាងចាស់ដៃនាកីឡដ្ឋាន Anfield។ ការស៊ុតបាល់បញ្ចូលទី 2គ្រាប់របស់តារាឆ្នើម Mohamed Salah បានកើតឡើង នៅមុនពេលមានគ្រាប់បាល់ស៊ុតបញ្ចូលទីពីសំណាក់ Sadio Mane និង Roberto Firmino ដែលក៏រកបាន 2គ្រាប់ផងដែរ ដើម្បីជួយឱ្យ Liverpool នាំមុខដល់ទៅ 5គ្រាប់ នៅត្រឹមនាទីទី68។
Liverpool បានភ្លាត់ស្នៀតនៅជិតបញ្ចប់ការប្រកួត ហើយក្រុម Roma បានវាយបក 2គ្រាប់វិញដើម្បីជួយឱ្យពួកគេមានឱកាសដ៏ស្តួចស្តើងក្នុងការប្រកួតជើងទី2 ក្នុងប្រទេសអ៊ីតាលី នាថ្ងៃទី2 ខែឧសភា។ ប៉ុន្តែ លោក Klopp បានទទួលស្គាល់ថា លោកមិនបានសង្ឃឹមថា នឹងមានទម្រង់លេងដ៏ល្អជាងនេះពីក្រុមរបស់លោកឡើយ។ គ្រូបង្វឹករូបនេះបានឱ្យដឹងថា៖ «វាជាការបង្ហាញពីទម្រង់លេងយ៉ាងល្អឥតខ្ចោះនៅរយៈពេល 40នាទីដំបូង។ យើងបានធ្វើឱ្យមានកំហុសនៅតំបន់ការពារ បន្ទាប់មក គ្រាប់បាល់ប៉េណាល់ទីរបស់ពួកគេមិនមែនជាបាល់ប៉េណាល់ទីឡើយ ហើយបច្ចុប្បន្នយើងឈ្នះ 5-2»៕
ប្រភពពី៖ Channel News Asia