សួស វីសា ក្ដៅស្លឹកត្រចៀករឿងល្បីថាដណ្ដើមតំណែងតារាស្រីពី ឱក សុគន្ធកញ្ញា នៅហង្សមាស

បន្ទាប់ពីសារព័ត៌មានក្នុងស្រុកមួយបានចេញផ្សាយពីរឿងដែលតារាស្រីនៅក្នុងផលិតកម្មរស្មីហង្សមាស គឺកញ្ញា សួស វីសា បានប្រជែងយកតំណែងចម្រៀងស្រីលេខ 2 ពីតារាស្រីជើងខ្លាំងរួមទ្រនំដូចជា ឱក សុគន្ធកញ្ញា ពេជ្រ សោភា ជាដើមរួចមកនោះ ដំណឹងនេះបានធ្វើឱ្យតារាចម្រៀងស្រីរូបនេះប្រញាប់បញ្ចេញវីដេអូបកស្រាយ និងនិយាយរៀបរាប់រឿងពិតប្រាប់ទៅកាន់តារារៀមច្បង និងបណ្ដាអ្នកគាំទ្ររបស់នាង រួមទាំងតារាស្រីទាំងពីរដួងនោះផងដែរ។

សួស វីសា បានលើកឡើងថា នាងស្រឡាញ់គោរពតារាស្រី ឱក សុគន្ធកញ្ញា និងពេជ្រ សោភា ដូចជាតារារៀមច្បង និងជាអាយដលម្នាក់នៅក្នុងដួងចិត្តដែរ ព្រោះថា តាំងពីនាងនៅជាកុមារីមា្នក់ ដែលមិនទាន់បានចូលប្រឡូកនៅក្នុងពិភពសិល្បៈ នាងបានស្រឡាញ់រៀមច្បងទាំងពីររួចទៅហើយ និងព្រមទាំងរៀនសូត្រតាមទៀតផង។ បើទោះបីជានាងមានប្រភពចេញមកពីសាលារចនា ដូចជាតារាស្រី ឱក សុគន្ធកញ្ញា ក៏ពិតមែន តែនាងបានបញ្ចាក់ប្រាប់ថា នាងគ្មានបំណងប្រជែង ឬដណ្ដើមការងារ ឬតំណែងល្បីអីពីបងស្រី កញ្ញា នោះទេ។

នាងបានប្រាប់បន្ថែមថា នាងអាចមានជីវភាពដូចសព្វថ្ងៃនេះ ក៏ព្រោះតែហង្សមាស ដែលជាអ្នកជួយជ្រោមជ្រែង និងលើកស្ទួយនាង ដូច្នោះហើយតារាជើងចាស់នៅហង្សមាសទាំងអស់ នាងស្រឡាញ់គោរពដូចជាចាស់ទុំរៀមច្បង ហើយតារាក្រោយៗ គឺស្រឡាញ់ដូចមិត្តរួមការងារ នាងគ្មានពេលវេលាឯណាមកគិតរឿងប្រជែងគ្នានោះទេ ដូច្នេះដើម្បីឱ្យកាន់តែជាក់ច្បាស់ឡើងនោះ សូមមិត្តអ្នកនាំគ្នាទស្សនាវីដេអូដែលតារាស្រីរូបនេះធ្វើការបកស្រាយដូចខាងក្រោមនេះ ៖