ទីផ្សារដំឡូងមីក្នុងតំបន់ និងពិភពលោកបានបង្ហាញពីតម្រូវការខ្ពស់តាមប្រភេទមុខទំនិញ ដែលជាឱកាស និងជាច្រកទីផ្សារថ្មីមួយទៀតសម្រាប់ប្រទេសកម្ពុជាក្នុងការចាប់ផ្ដើមពង្រឹងផលិតកម្មពង្រីកការកែច្នៃផលិតផលនេះ និងពង្រឹងសមត្ថភាពនាំចេញឆ្ពោះទៅរកទីផ្សារដែលមានតម្លៃខ្ពស់ ដូចជាផលិតផលម្សៅមីជាដើម។
ហេតុដូច្នេះហើយទើបរោងចក្រផលិតម្សៅដំឡូងមីចំនួន20 នឹងត្រូវចាប់ផ្តើមសាងសង់នៅតាមបណ្តាខេត្តមួយចំនួនចាប់ពីឆ្នាំ2018នេះទៅ។ នេះបើតាមការឱ្យដឹងពីឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ។
ឯកឧត្តម វេង សាខុនបានបន្តឱ្យដឹងថា៖“កម្ពុជាអាចឈានទៅដល់ការផលិតម្សៅដំឡូងមីតាមរយៈរោងចក្រទាំង20 នេះ ដែលយ៉ាងហោចណាស់ក៏យើងត្រូវការផលិតដំឡូងមីប្រមាណជា 10លានតោនដែរក្នុង 1ឆ្នាំ។
កាលពីឆ្នាំ2016 និងឆ្នាំ2017 កន្លងទៅនេះ កម្ពុជាអាចឈានទៅដល់ការផលិតដំឡូងមីបានដល់ទៅ 14លានតោនក្នុង1ឆ្នាំ។ ដូច្នេះក្នុង 20រោងចក្រនេះក្រុមហ៊ុនអាចស្រូបយកដំឡូងមីដល់ទៅ 10លានតោនពីការផលិតរបស់កសិករយើងនៅតាមបណ្តាខេត្តគោលដៅទាំងអស់ហើយការផលិតនេះយើងសង្ឃឹមថា ក្នុងរោងចក្រនីមួយៗអាចកែច្នៃជាម្សៅដំឡូងមីបានដោយប្រើដំឡូងមីចំនួន 10ម៉ឺនតោន។
រោងចក្រទាំងនោះនឹងបោះទីតាំងនៅតំបន់ណាដែលមានដំណាំដំឡូងមីច្រើន ហើយតំណាងរោងចក្របានមើលឃើញពីសក្តានុពលនេះនៅក្នុងខេត្តមួយចំនួន ដូចជាខេត្តត្បូងឃ្មុំ ខេត្តកំពង់ធំខេត្តពោធិ៍សាត់ ខេត្តបាត់ដំបង ខេត្តក្រចេះ ខេត្តស្ទឹងត្រែង ខេត្តមណ្ឌលគិរី ខេត្តព្រះវិហារ ខេត្តឧត្តរមានជ័យ និងខេត្តបន្ទាយមានជ័យ និងយ៉ាងហោចណាស់ក្នុង 1ខេត្តក៏មាន1 ទៅ2រោងចក្រដែរ និងក្នុងការសាងសង់រោងចក្រនីមួយៗត្រូវការទុនវិនិយោគប្រមាណជា 2លានដុល្លារសហរដ្ឋអាមេរិក។
ឯកឧត្ដមរដ្ឋមន្ត្រីក្រសួងកសិកម្មបានបញ្ជាក់ទៀតថា៖ ក្រោយពីកិនជាម្សៅហើយកាកសំណល់របស់វាអាចកែច្នៃធ្វើជាចំណីសត្វ និងកាកសំណល់ចុងក្រោយបំផុតអាចច្នៃធ្វើជាដុំធ្យូង និងកែច្នៃធ្វើជាឆ្នួនចំហេះក្នុងការដុតបញ្ឆេះធ្វើជាកម្លាំងថាមពលសម្រាប់បម្រើដល់ដំណើរការរោងចក្រផលិតចរន្តអគ្គិសនីសម្រាប់ប្រើប្រាស់នៅតាមផ្ទះសំបែងបានទៀតផង។ ឯកឧត្តម វេង សាខុនបានឱ្យដឹងបន្ថែមថា រោងចក្រទាំង 20នេះនឹងមាន 5រោងចក្រត្រូវសាងសង់នៅឆ្នាំ2018 នេះ។ 7រោងចក្រសាងសង់នៅឆ្នាំ2019 និង8រោងចក្រចុងក្រោយនឹងសាងសង់នៅឆ្នាំ2020។
សូមបញ្ជាក់ថា រោងចក្រកែច្នៃដំឡូងមីដែលមានគម្រោងបើកទាំង 20ទីតាំងនេះ គឺជាការវិនិយោគរបស់ក្រុមហ៊ុន GreenLeader ជាបុត្រសម្ព័ន្ធរបស់ក្រុមហ៊ុន GreenLeaderHoldingGroup ដែលបានចុះឈ្មោះជាសាធារណៈក្នុងក្រុមប្រឹក្សាហ៊ុននៅទីក្រុងហុងកុង។
កំណត់សម្គាល់៖ ដំឡូងមីត្រូវបានគេទទួលស្គាល់ថាជាកសិផលប្រចាំសតវត្សរ៍ទី21 ដោយវាត្រូវបានដាំដុះយ៉ាងច្រើន រាប់តាំងពីជាលក្ខណៈគ្រួសារ រហូតដល់ការនាំចេញទ្រង់ទ្រាយធំ ដើម្បីបម្រើដល់ឧស្សាហកម្មម្ហូបអាហារ និងការផលិតប្រេងឥន្ធនៈអេតាណុល។ សម្រាប់ប្រទេសកម្ពុជា ការដាំដុះដំឡូងមីមានការរីកចម្រើនយ៉ាងគំហុកចាប់ពីនៅលើផ្ទៃដី 16ពាន់ហិកតានៅឆ្នាំ2000 ដល់ទៅជាង 600ពាន់ហិកតា នៅឆ្នាំ2017 និងបានផ្តល់ទិន្នផលសរុប 14លានតោន កាលពីឆ្នាំ2017 កន្លងទៅ៕
