ដោយមើលឃើញពីសក្តានុពលវិនិយោគនៅកម្ពុជា ពិសេសការលើកលែងពន្ធក្នុងការនាំទំនិញចេញទៅទីផ្សារក្រៅប្រទេស អង្គការ JETRO ជប៉ុនដែលដើរតួជាអ្នកសម្របសម្រួលការងារសម្រាប់អ្នកវិនិយោគរបស់ខ្លួនទៅបណ្តាក់ទុននៅប្រទេសផ្សេងៗបានសន្យាថានឹងនាំអ្នកវិនិយោគជប៉ុនមកកម្ពុជាឱ្យកាន់តែច្រើនថែមទៀត។
ក្នុងជំនួបពិភាក្សាការងារជាមួយឯកឧត្ដមបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីសប្តាហ៍មុននេះ លោក Masashi KANO ប្រធានតំណាងអង្គការពាណិជ្ជកម្មក្រៅស្រុកជប៉ុនប្រចាំនៅកម្ពុជាបានបញ្ជាក់ថា បច្ចុប្បន្នមានវិនិយោគិនជប៉ុនថ្មីៗមួយចំនួនបាននឹងកំពុងពិភាក្សាលម្អិតជាមួយអង្គការ JETRO ប្រចាំនៅកម្ពុជាអំពីឱកាសវិនិយោគនៅកម្ពុជា ហើយលោកសន្យាថា នឹងព្យាយាមពន្យល់ផ្សព្វផ្សាយ អំពីឱកាសវិនិយោគនៅកម្ពុជាដើម្បីទាក់ទាញវិនិយោគិនជប៉ុនទាំងនោះឱ្យមកបណ្តាក់ទុននៅកម្ពុជាឱ្យកាន់តែច្រើននិងប្រកបដោយភាពជឿជាក់។
លោកបានបន្ថែមថា “ទឡ្ហីករណ៍ទាំងនេះ បានជំរុញលំហូរវិនិយោគពីក្រៅប្រទេសមកកម្ពុជានឹងបានរុញសេដ្ឋកិច្ចកម្ពុជាឱ្យកាន់តែមានសម្ទុះខ្លាំងក្លាថែមទៀត។ លោក Masashi KANO ប្រធានតំណាងអង្គការពាណិជ្ជកម្មក្រៅ ស្រុក ជប៉ុន លើកឡើងបន្តថា វិនិយោគិនជប៉ុនបានចាត់ទុកប្រទេសកម្ពុជាជាប្រទេសដែលមានទីផ្សារបើកចំហខ្លាំង និងមានបរិយាកាសវិនិយោគអំណោយផលច្រើន ដែលជាកត្តាជំរុញ និងលើកទឹកចិត្តវិនិយោគិន បរទេសទាំងអស់មិនថាតែជប៉ុនឱ្យមកបណ្តាក់ទុនបន្ថែមនៅកម្ពុជា។
ក្នុងជំនួបនោះដែរ ឯកឧត្តមបណ្ឌិតសភាចារ្យអូន ព័ន្ធមុនីរ័ត្ន បានសម្តែងនូវការស្វាគមន៍ និងកោតសរសើរចំពោះលោក Masashi KANO ដែលបានខិតខំប្រឹងប្រែងទាំងកម្លាំងកាយ និងកម្លាំងចិត្តក្នុងការជួយទាក់ទាញវិនិយោគិនដែលមានសក្តានុពលខ្ពស់របស់ជប៉ុនឱ្យមកបណ្តាក់ទុនជាបន្តបន្ទាប់នៅកម្ពុជា។ ឯកឧត្តមបណ្ឌិតសភាចារ្យបានបញ្ជាក់ថា ដើម្បីទាក់ទាញវិនិយោគិនបរទេសឱ្យកាន់តែមានទំនុកចិត្តមកបណ្តាក់ទុននៅកម្ពុជាបន្ថែមលើគោលនយោបាយនៃការអនុគ្រោះ និងគាំពារវិនិយោគពីបរទេសដែលកំពុងអនុវត្តក្នុងពេលបច្ចុប្បន្ន។
បច្ចុប្បន្ន កម្ពុជាបាននិងកំពុងខិតខំកែទម្រង់ និងរៀបចំនូវបរិយាកាសធុរកិច្ចអំណោយផល ចំពោះវិនិយោគគិនបរទេសទាំងអស់ រួមមានការលើកទឹកចិត្តបន្ថែមទៀត និងបង្កលក្ខណៈ ឱ្យវិនិយោគិនបរទេសគ្រប់រូបឱ្យមកបណ្តាក់ទុននៅកម្ពុជាប្រកបដោយភាពទុកចិត្ត និងមានសុវត្ថិភាពស្របពេលដែលប្រទេសកម្ពុជា កំពុងមានសុខសន្តិភាពពេញលេញ។
សូមបញ្ជាក់ថា ប្រធានតំណាង អង្គការពាណិជ្ជកម្មក្រៅស្រុកជប៉ុន JETRO គឺជា អង្គភាពមួយស្ថិតក្រោមចំណុះក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ដែលត្រូវបានបង្កើតឡើងក្នុងឆ្នាំ1958។ អង្គការ JETRO មានបណ្តាញការិយាល័យចំនួន74 នៅក្នុងប្រទេសចំនួន55លើពិភពលោក និងមានការិយាល័យចំនួន44 នៅក្នុងប្រទេសជប៉ុន។
តាមរយៈបណ្តាញរបស់ខ្លួនដែលមាននៅស្ទើរតែពាសពេញពិភពលោក អង្គការ JETRO បានចូលរួមចំណែកក្នុងការពង្រីកពាណិជ្ជកម្ម និងការវិនិយោគរវាងប្រទេសជប៉ុន និងប្រទេសដទៃទៀតនៅលើសកលលោក។
គួរបញ្ជាក់ផងដែរថា ការិយាល័យ JETRO នៅព្រះរាជាណាចក្រកម្ពុជា ត្រូវបានបង្កើតឡើងនៅក្នុងឆ្នាំ2010 ដែលបានធ្វើការសម្របសម្រួល និងទាក់ទាញក្រុមហ៊ុនដែលមានសក្តានុពលខ្ពស់របស់ជប៉ុនមួយចំនួនដូចជាក្រុមហ៊ុន Mineabea ដែលបានផ្តល់ការងារដល់ពលរដ្ឋជាច្រើនរយនាក់ ស្ថិតក្នុងតំបន់សេដ្ឋកិច្ចពិសេសក្រុងភ្នំពេញ និងការបើកដំណើរការផ្សារទំនើបខ្នាតយក្ស AEON ឱ្យមកបណ្តាក់ទុននៅកម្ពុជាជាបន្តបន្ទាប់។
បច្ចុប្បន្នក្រុមហ៊ុនទាំងពីរ កំពុងដំណើការផលិតទំនិញ និងដាក់លក់ទំនិញសម្បូរបែប ដែលជាផ្នែកមួយជួយដល់កំណើនសេដ្ឋកិច្ចជាតិ និងផ្តល់ការងារដល់ពលរដ្ឋខ្មែរ បានច្រើនពាន់នាក់។
គួរបញ្ជាក់ផងដែរ ក្រៅពីជំរុញឱ្យអ្នកវិនិយោគចូលមកបណ្តាក់ទុនវិនិយោគនៅកម្ពុជា រដ្ឋាភិបាលជប៉ុនក៏បានផ្តល់ឱកាសដល់ពលរដ្ឋខ្មែរ ឱ្យទៅធ្វើការនៅប្រទេសខ្លួន ដើម្បីឱ្យពួកគេអាចមានឱកាសធ្វើការបានប្រាក់ខែខ្ពស់សម្រាប់ជួយសេដ្ឋកិច្ចគ្រួសារខ្លួន ឱ្យកាន់តែប្រសើរឡើងផងដែរ៕
