លោក Mauricio Pochettino អ្នកចាត់ការទូទៅរបស់ក្រុម Tottenham បានបញ្ជាក់ថា ការឈ្នះពាន FA Cup នឹងមិនផ្លាស់ប្តូរក្លិបនេះបានឡើយ បើទោះបីវាជាការបញ្ចប់រយៈពេល 1ទសវត្សរ៍នៃការមិនឈ្នះពានសោះក៏ដោយ។
Spurs នឹងត្រូវប៉ះជាមួយក្រុម Manchester United ក្នុងការប្រកួតវគ្គពាក់កណ្តាលផ្តាច់ព្រ័ត្រ នាកីឡដ្ឋាន Wembley នៅថ្ងៃសៅរ៍នេះ ហើយកំពុងតែនឹកសង្ឃឹមថា បោះជំហានកាន់តែកៀកឆ្ពោះទៅកាន់ការឈ្នះពានរង្វាន់ជាលើកទី1 របស់ពួកគេ បើគិតចាប់តាំងពីឆ្នាំ2008 មក។ ប៉ុន្តែ លោក Pochettino បាននិយាយថា ការលើកពាន FA Cup នៅខែក្រោយនេះ នឹងក្លាយជាការបោះជំហាណនដ៏ធំមួយសម្រាប់ក្លិបនេះ ដែលសម្លឹងរកការឈានទៅប្រកួតក្របខ័ណ្ឌ Champions League សម្រាប់រយៈពេល 3រដូវកាលជាលើកទី3 ជាប់ៗគ្នា។ ក្នុងសន្និសីទសារព័ត៌មានមួយនៅមុនពេលការប្រកួត គ្រូបង្វឹករូបនេះបានឱ្យដឹងកាលពីថ្ងៃព្រហស្បតិ៍ថា៖ «វាពិតជាអស្ចារ្យណាស់ប្រសិនបើក្រុម Southampton, Chelsea, Manchester United ឬ Tottenham នឹងឈ្នះពាន FA Cup នោះ»។
លោក Pochettino បានបន្ថែមទៀតថា៖ «តើវានឹងផ្លាស់ប្តូរជីវិតរបស់យើងទេ? ខ្ញុំមិនជឿជាក់ថា វាផ្លាស់ប្តូរឡើយ។ ខ្ញុំមិនជឿឡើយ។ តើក្រុមណាត្រូវការវាជាងគេ ខ្ញុំមិនដឹងឡើយ។ យើងនឹងព្យាយាមប្រជែងដើម្បីឈ្នះពាននេះ។ វានឹងក្លាយជារឿងដ៏អស្ចារ្យមួយក្នុងការបញ្ចប់រដូវកាលនេះជាមួយនឹងការឈ្នះពានមួយ។ ខ្ញុំគិតថា វាមិនមែនសំដៅទៅលើការត្រូវការ ឬមិនត្រូវការនោះឡើយ»៕
ប្រភពពី៖ The Daily Star
