វិស័យទេសចរណ៍កម្ពុជាបានបន្តបង្ហាញនូវភាពវិជ្ជមានដល់វិស័យសេដ្ឋកិច្ចកម្ពុជា ក្នុងឆ្នាំនេះ ខណៈទិន្នន័យចំណូលពីភ្ញៀវទេសចរបរទេស បានបង្ហាញឱ្យឃើញនូវកំណើនខ្ពស់ឡើងក្នុងត្រីមាសទី1 ឆ្នាំ2018នេះ។
ចំណូលបានពីការលក់ប័ណ្ណចូលទស្សនារមណីយដ្ឋានអង្គរ មានចំនួន 39.65លានដុល្លារអាមេរិក (ជិត 40លាន)ក្នុងត្រីមាសដំបូងនៃឆ្នាំ 2018នេះ ដោយមានកំណើន 28.52ភាគរយ ធៀបនឹងរយៈពេលដូចគ្នាកាលពីឆ្នាំមុន។
របាយការណ៍របស់គ្រឹះស្ថានអង្គរ ដែលជាស្ថាប័នគ្រប់គ្រងចំណូលលក់សំបុត្រចូលទស្សនាតំបន់ប្រាសាទអង្គរ បានបង្ហាញឱ្យឃើញថា ភ្ញៀវទេសចរបរទេសប្រមាណជាង 85ម៉ឺននាក់ បានទិញប័ណ្ណចូលទស្សនារមណីយដ្ឋានអង្គរ ដោយមានកំណើន 12.36ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ2017កន្លងទៅ។
ចំណែកសម្រាប់ខែមីនា ឆ្នាំ2018កន្លងទៅ មានភ្ញៀវទេសចរបរទេសបានទិញប័ណ្ណចូលទស្សនារមណីយដ្ឋានអង្គរប្រមាណជាង 26ម៉ឺននាក់ កើនឡើង 19.09ភាគរយ និងបានទទួលចំណូលសរុប 12.16លានដុល្លារអាមេរិក កើន 15.23ភាគរយ បើប្រៀបធៀបនឹងរយៈពេលដូចគ្នា កាលពីឆ្នាំមុន។
ការកើនឡើងនៃចំនួនទឹកប្រាក់ ច្រើនជាងការកើនឡើងចំនួនភ្ញៀវចូលទស្សនាតំបន់ប្រាសាទអង្គរនេះ គឺដោយសាររាជរដ្ឋាភិបាលបានសម្រេចបង្កើនតម្លៃសំបុត្រចូលទស្សនាតំបន់ប្រាសាទអង្គររហូតជិតទ្វេដង កាលពីខែកុម្ភៈឆ្នាំ2017កន្លងមក។
តម្លៃប័ណ្ណថ្មីចូលទស្សនារមណីយដ្ឋានអង្គរ ត្រូវបានចាប់ផ្ដើមអនុវត្តពីថ្ងៃទី1 ខែកុម្ភៈកន្លងមក ដោយត្រូវបានដំឡើងពី 20ដុល្លារ ទៅ37ដុល្លារ សម្រាប់ប័ណ្ណចូលទស្សនា1ថ្ងៃ តម្លៃ 40ដុល្លារ ទៅ 62ដុល្លារ ចំពោះប័ណ្ណចូលទស្សនា 3ថ្ងៃមានសុពលភាព 10ថ្ងៃ និងពី 60ដុល្លារ ទៅ 72ដុល្លារ សម្រាប់ប័ណ្ណដែលមានសុពលភាព 1ខែ។
របាយការណ៍ក្រសួងទេសចរណ៍បានបង្ហាញឱ្យឃើញថា ភ្ញៀវទេសចរបរទេសដែលចូលមកកម្ពុជាក្នុងក្របខ័ណ្ឌទូទាំងប្រទេស ក្នុងរយៈពេលពីរខែដំបូងក្នុងឆ្នាំ2018នេះ មានកំណើនជាង11% ដោយមានចំនួនភ្ញៀវទេសចរអន្តរជាតិជាង 1លាននាក់។
រដ្ឋាភិបាលកម្ពុជា គ្រោងនឹងធ្វើទំនើបកម្មក្នុងការប្រមូលចំណូលពីការលក់សំបុត្រចូលទស្សនាតំបន់ប្រាសាទអង្គរ ដោយការដាក់លក់សំបុត្រតាមអនឡាញ ដោយគ្រោងនឹងអនុវត្តនៅត្រីមាសទី3 នៃឆ្នាំ2018នេះ។ ក្រោយការប្រកាសរបស់រដ្ឋាភិបាលក្នុងការធ្វើទំនើបកម្មដែលគ្រប់គ្រងគ្រឹះស្ថានអង្គរនេះ ធុរកិច្ចឯកជនក្នុងវិស័យទេសចរណ៍មានក្តីសាទរយ៉ាងខ្លាំងចំពោះការសម្រេចចិត្តនេះ ដោយពួកគេចាត់ទុកថា វានឹងជួយកាត់បន្ថយពេលវេលារង់ចាំរបស់ភ្ញៀវនៅពេលតម្រង់ជួរទិញសំបុត្រ និងថតរូបសម្រាប់ចូលទស្សនាតំបន់ប្រាសាទអង្គរ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានអះអាងថា ការសម្រេចចិត្តរបស់រដ្ឋាភិបាលក្នុងការដាក់ឱ្យដំណើរការលក់សំបុត្រចូលទស្សនាតំបន់ប្រាសាទអង្គរតាមអនឡាញនេះ គឺជាដំណឹងដ៏ល្អមួយ និងជាការទន្ទឹងរង់ចាំជាយូរមកហើយរបស់វិស័យឯកជន។ ទោះជាបែបនេះក្តី ក៏វិស័យឯកជននៅតែបារម្ភចំពោះការផ្តល់សេវាមិនពេញលេញ ចំពោះការដាក់ឱ្យដំណើរការនៅពេលខាងមុខនេះដែរ។
ឯកឧត្តម និយាយថា៖ “កំណើនភ្ញៀវទេសចរ នាំឱ្យមានកំណើនក្នុងវិស័យសេវាកម្ម លក់ដុំ និងលក់រាយ ព្រមទាំងកសិកម្មផងដែរ”៕
