បញ្ហាគ្រោះថ្នាក់ចរាចរណ៍នៅកម្ពុជា បានក្លាយជាប្រធានបទក្តៅមួយ ដែលនាំឱ្យមានការពិភាក្សាព្រោះថានាពេលថ្មីៗនេះគ្រោះថ្នាក់ចរាចរណ៍ហាក់កើនច្រើនឡើងគួរឱ្យកត់សម្គាល់ ខណៈមានការបកស្រាយផ្សេងផ្សេងៗគ្នាអំពីមូលហេតុដែលនាំឱ្យមានការកើនឡើងនៃគ្រោះថ្នាក់ចរាចរណ៍នាពេលកន្លងមក។
សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានលើកបង្ហាញនៅក្នុងកម្មវិធីបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ 2017 ថា តាមអ្នកជំនាញសុវត្ថិភាពចរាចរណ៍បានប៉ាន់ស្មានថា បើគ្មានវិធានការទប់ស្កាត់ឱ្យមានប្រសិទ្ធភាពលើកត្តាចរាចរណ៍នេះ អ្នកស្លាប់អាចនឹងកើនឡើងដល់ 3,200នាក់ក្នុងមួយឆ្នាំ នៅឆ្នាំ 2020។ កត្តាសំខាន់ដែលនាំឱ្យមានបញ្ហាគ្រោះថ្នាក់ចរាចរណ៍នៅកម្ពុជា គឺកត្តាអ្នកប្រើប្រាស់យានយន្តក្នុងនោះ អ្នកប្រើប្រាស់ទោចក្រយានយន្តមានដល់ទៅ 77%នៃជនរងគ្រោះទាំងអស់ហើយក្នុងចំណោមនោះ ជនរងគ្រោះចំនួន 78% ជាអ្នកបើកបរម៉ូតូដោយមិនពាក់មួកសុវត្ថិភាព។
បង្ហាញលើចំណុចនេះដែរ លោកបណ្ឌិត ច័ន្ទ សុផល អ្នកស្រាវជ្រាវពីបញ្ហាសង្គមនៅកម្ពុជា បានលើកឡើងថា កត្តាដែលនាំឱ្យគ្រោះថ្នាក់ច្រើនជាងគេនៅកម្ពុជាគឺដោយសារកំហុសអ្នកបើកបរ ព្រោះកត្តាខាងក្រៅនានាដែលលោកមើលឃើញដូចជាកត្តាផ្លូវថ្នល់ កត្តាខ្វះស្លាកសញ្ញា និងកត្តាយានយន្តជាដើម មិនមែនជាកត្តាចម្បងនោះទេ។
លោកបណ្ឌិត ច័ន្ទ សុផល បានបង្ហាញក្នុងបណ្តាញសង្គមថា៖ «គួរមានការរឹតបន្តឹងពីរយ៉ាងបន្ថែមទៀត គឺទីការប្រឡងយកប័ណ្ណបើកបរ និងកត្តាទី2 គឺការកំណត់លក្ខខណ្ឌខ្ពស់សម្រាប់អ្នកបើកបរយានយន្តដឹកខ្នាតធំ»។
លោកបណ្ឌិតបានបញ្ជាក់ផងដែរថា កត្តាអ្នកបើកឡានធំអាចជាកត្តាសំខាន់មួយក្នុងចំណែកនៃគ្រោះថ្នាក់ចរាចរណ៍ព្រោះ រថយន្ត 570 មិនអាចបុកឈ្នះរថយន្តដឹកដី រថយន្តកុងតឺន័រ និងរថយន្តក្រុងបានឡើយ។
យោងតាមទិន្នន័យស្តីពីគ្រោះថ្នាក់ចរាចរណ៍ឆ្នាំ 2017 របស់នាយកដ្ឋាននគរបាលចរាចរណ៍ និងសណ្តាប់ធ្នាប់ បានបង្ហាញថា អ្នកស្លាប់ដោយសារគ្រោះថ្នាក់ចរាចរណ៍នៅឆ្នាំ 2017 មានចំនួន 1,780 នាក់ កើនឡើង 63នាក់ ហើយអ្នករងរបួសមានចំនួន 5,539នាក់ ថយចុះ ១៩៦ករណី បើប្រៀបធៀបនឹងរយៈពេលដូចគ្នាក្នុងឆ្នាំ 2016។
ចំពោះកត្តាដែលនាំឱ្យមានគ្រោះថ្នាក់ចរាចរណ៍វិញ បើយោងតាមរបាយការណ៍ដដែលបានបង្ហាញថា មូលហេតុចម្បងដែលនាំឱ្យមានគ្រោះថ្នាក់ចរាចរណ៍ គឺមកពីកត្តាល្បឿនចំនួន 36% មិនគោរពសិទ្ធិអាទិភាព 17% មិនប្រកាន់ស្តាំ 13% វ៉ាប្រជែង 10% បត់ 10% កត្តាយានយន្ត 3% កត្តាងងុយដេក 1%៕
