បន្ទាប់ពីសារព័ត៌មានក្នុងស្រុកជាច្រើនបានចេញផ្សាយព័ត៌មាន ស្រ្តីស្រស់សោភាវ័យ 36 ឆ្នាំមួយរូប បានសម្រេចចិត្តចងកបញ្ចប់ជីវិតរបស់ខ្លួននៅក្នុងផ្ទះជួលក្នុងភូមិផ្សារតាកោរ សង្កាត់រការក្នុង ក្រុងដូនកែវ ខេត្តតាកែវកាលពីពេលថ្មីៗនោះ ក្រោយមក ស្រ្តីរូបនោះត្រូវបានគេដឹងថា នាងមានឈ្មោះ «ចេវ សុវឌ្ឍនា» ជាស្រ្តីមេម៉ាយមានកូន 3នាក់ តែនៅមានរូបសម្ផស្សស្រស់ស្អាត និងមានមនុស្សជាច្រើនមិនសូវបានដឹងអំពីប្រវត្តិរបស់ស្រ្តីមេម៉ាយរូបស្រស់ដ៏អភ័ព្វម្នាក់នេះប៉ុន្មានឡើយ។
ដោយសារតែកាលពីនៅក្មេង អ្នកស្រី ចេវ សុវឌ្ឍនា មានរូបសម្ផស្សស្រស់សោភានោះ អ្នកស្រីធ្លាប់បានចូលប្រឡូកនៅក្នុងវិស័យបង្ហាញម៉ូដកាលពីឆ្នាំ 2008 ក្នុងនាមជាតារាបង្ហាញម៉ូដសម្លៀកបំពាក់សម័យ ដោយធ្លាប់បានចូលរួមថតរូបបង្ហាញម៉ូដឱ្យខាងក្រុមហ៊ុនទស្សនាវដ្តី ឡារ៉ែន ដ៏ល្បីល្បាញក្នុងអំឡុងឆ្នាំ 2008 ដែលកាលនោះអ្នកស្រីនៅមានវ័យត្រឹមតែជាងម្ភៃឆ្នាំប៉ុណ្ណោះ ហើយនៅពេលនោះផងដែរ អ្នកស្រីថែមទាំងបានថតរូបបង្ហាញម៉ូដ និងធ្វើការរួមគ្នាជាមួយនិងសិល្បការិនីល្បីឈ្មោះមួយរូបទៀតគឺ អ្នកនាង គង់ ច័ន្ទស្រីមុំ ទៀតផង ដែលអាចនិយាយបានថា នៅពេលនោះអ្នកទាំងពីរសុទ្ធតែជាតារាបង្ហាញម៉ូដរូបស្រស់សោភាទាំងពីរនាក់។ តែមួយរយៈក្រោយមក ដោយសារតែអ្នកស្រីមានគ្រួសារ និងមមាញឹកក្នុងការមើលថែទាំបុត្រធីតា ទើបជាហេតុបណ្ដាលឱ្យអ្នកស្រីបាត់មុខពីវិស័យមួយនេះយ៉ាងគួរឱ្យសោកស្ដាយ រហូតដល់សឺងតែលែងមាននរណាម្នាក់អាចចំណាំ ឬនឹកដល់រូបអ្នកស្រីទៀតឡើយ ។
ដោយសារធ្លាប់បានរួមការងារជាមួយគ្នាកាលពីឆ្នាំ 2008 (កាលនោះទស្សនាវដ្តី ឡារ៉ែនទើបតែចេញផ្សាយបានត្រឹមលេខទី 4 ប៉ុណ្ណោះ) ក្រុមការងាររបស់ទស្សនាវដ្តី ឡារ៉ែនបានកត់សម្គាល់ថា អ្នកស្រីគឺជានារីម្នាក់ដែលមានរូបរាង និងមុខមាត់ស្រស់សោភា និងមានចរិតនិស្ស័យរួសរាយគួរឱ្យចង់រាប់អានបំផុត។
ក្នុងឱកាសដ៏សែនសោកសង្រេងនេះ ក្រុមហ៊ុនទស្សនាវដ្ដី ឡារ៉ែន សូមសម្ដែងនូវក្ដីសោកស្ដាយ និងសូមចូលរួមរំលែកទុក្ខដល់ក្រុមគ្រួសាររបស់អ្នកស្រី និងសូមឧទ្ទិសឱ្យវិញ្ញាណក្ខន្ធរបស់អ្នកស្រីបានទៅកាន់សុគតិភពកុំបីខានឱ្យសោះ៕
ដើម្បីជាការរំឭកនូវអនុស្សាវរីយ៍ដែលបានរួមការងារជាមួយ ខាងក្រោមនេះគឺជារូបភាពអតីតតារាបង្ហាញម៉ូដ អ្នកស្រី ចេវ សុវឌ្ឍនា ដែលបានថតបង្ហាញម៉ូដសម្លៀកបំពាក់សម័យឱ្យទស្សនាវដ្តី ឡារ៉ែនកាលពីឆ្នាំ 2008៖
