ឆ្លើយតបទៅនឹងការផ្លាស់ប្តូរអាកាសធាតុ និងការរស់នៅប្រកបដោយផាសុកភាព ឯកឧត្តម ជាសុផារ៉ា ទេសរដ្ឋមន្ត្រី រដ្ឋមន្ត្រីក្រសួងដែនដី នគរូបនីយកម្ម និងសំណង់ បានជំរុញដល់ម្ចាស់គម្រោងវិនិយោគបុរីលំនៅឋានទាំងអស់នៅក្នុងប្រទេសកម្ពុជាត្រូវយកចិត្តទុកដាក់អំពីបរិស្ថាន ដោយត្រូវដាំដើមឈើឱ្យបានច្រើនដើម្បីរៀបចំឱ្យមានជាតំបន់បៃតងនៅក្នុងគម្រោងបុរីលំនៅឋានរបស់ខ្លួន។
ឯកឧត្តមទេសរដ្ឋមន្ត្រី បានលើកឡើងក្នុងពិធីបុកគ្រឹះសាងសង់ផ្សារទំនើប PH Diamond Place ស្ថិតនៅលើផ្ទៃដី 6ហិកតាតាមបណ្តោយមហាវិថីសម្តេចតេជោ ឬផ្លូវ 60ម៉ែត្រ ក្នុងសង្កាត់ចាក់អង្រែ ខណ្ឌមានជ័យ កាលពីចុងសប្តាហ៍មុននេះថា ដើម្បីផ្តល់ទំនុកចិត្តទៅដល់អតិថិជន ម្ចាស់គម្រោងវិនិយោគបុរីលំនៅឋាននានា ទាំងបុរីតូច និងធំ ត្រូវយកចិត្តទុកដាក់លើបញ្ហាបរិស្ថាន ពិសេសត្រូវបង្កើតឱ្យគម្រោងរបស់ខ្លួនក្លាយទៅជាតំបន់បៃតងស្រស់តាមរយៈការដាំដើមឈើដើម្បីការពារបរិស្ថានទប់ស្កាត់ធាតុអាកាសក្តៅ ខណៈដែលពិភពលោកកំពុងប្រឈមនឹងបម្រែបម្រួលអាកាសធាតុកាន់តែក្តៅឡើងៗពីមួយឆ្នាំទៅមួយឆ្នាំ។
ក្នុងនោះដែរ ឯកឧត្តម ទេសរដ្ឋមន្ត្រីបានលើកសរសើរទៅដល់គម្រោងបុរីប៉េងហួតដែលរៀបចំហេដ្ឋារចនាសម្ព័ន្ធសំណង់ស្ថាបត្យកម្មបានល្អជាងគេក្នុងចំណោមបុរីលំនៅឋានផ្សេងៗទៀត ដោយក្នុងនោះគម្រោងបុរី ប៉េង ហួត បានរៀបចំដាំដើមឈើធំៗ រៀបចំសួនច្បារ សម្រាប់ផ្តល់ភាពម្លប់ត្រជាក់ និងបង្កើតបរិស្ថានល្អមានកន្លែងសម្រាកលម្ហែសម្រាប់អតិថិជនរបស់ខ្លួនឱ្យពួកគាត់រស់នៅបានសុខសាន្ត មានផាសុកភាព ក៏ដូចជាលើកកម្ពស់ផ្នែកសុខភាពផ្លូវកាយ និងផ្លូវចិត្តបានល្អទៀតផង។
កន្លងមកគេសង្កេតឃើញថា ម្ចាស់គម្រោងអភិវឌ្ឍន៍លំនៅឋានមួយចំនួនតែងផ្សព្វផ្សាយ និងលើកឡើងពីចំណុចល្អនៃគម្រោងរបស់ខ្លួនដើម្បីទាក់ទាញអតិថិជនឱ្យមកទិញ និងរស់នៅក្នុងទីតាំងវិនិយោគរបស់ខ្លួនឱ្យបានច្រើន ប៉ុន្តែនៅពេលអតិថិជនចូលទៅរស់នៅ ម្ចាស់គម្រោងបែរជាលែងយកចិត្តទុកដាក់ លែងគិតគូរ ធ្វើឱ្យពួកគាត់(អតិថិជន)អាក់អន់ចិត្តក្នុងការរស់នៅ។
ត្រង់នេះឯកឧត្តមបានមានប្រសាសន៍ដូច្នេះថា “មុននឹងសាងសង់លក់អ្នកវិនិយោគតែងនិយាយពីចំណុចល្អរបស់គម្រោងខ្លួនថា ល្អគួរឱ្យចង់រស់នៅ ប៉ុន្តែក្រោយពីសាងសង់រួចបែរជាទុកចោល មិនគិតពីបរិស្ថានអនាម័យដល់អតិថិជនដែលបានទិញលំនៅឋានចូលទៅរស់នៅទីនោះ ដែលនេះជាចំណុចមិនល្អ ធ្វើឱ្យខូចឈ្មោះ និងបាត់បង់ទំនុកចិត្តពីអតិថិជន និងលែងមានការគាំទ្របន្តទៀត។
បើតាមលិខិតបទដ្ឋានរបស់ក្រសួងបានតម្រូវឱ្យម្ចាស់អភិវឌ្ឍន៍បុរីលំនៅឋានទាំងអស់ ពិសេសអ្នកអភិវឌ្ឍន៍ដើម្បីលក់យកប្រាក់ចំណេញ យ៉ាងហោចណាស់ត្រូវទុកដីឱ្យបាន 7ភាគរយនៃផ្ទៃដីសរុបដើម្បីបង្កើតទៅជាតំបន់បៃតង តាមរយៈការដាំដើមឈើ និងបង្កើតជាសួនច្បារ និងទីធ្លាសម្រាប់ហាត់ប្រាណដើម្បីងាយស្រួលឱ្យប្រជាពលរដ្ឋបានទៅកម្សាន្ត អង្គុយលេងស្រូបយកអាកាសធាតុត្រជាក់បរិសុទ្ធ ផ្តល់ផាសុកភាព និងលើកកម្ពស់សុខភាព។ ឯកឧត្តមបានបញ្ជាក់ថា “ខ្ញុំក៏មានការសប្បាយចិត្តដែរ នៅពេលពលរដ្ឋចូលទៅរស់នៅក្នុងគម្រោងអភិវឌ្ឍន៍លំនៅឋានមួយ ឬក្នុងបុរីណាមួយ ហើយគ្មានការតវ៉ាប្តឹងផ្ដល់ឱ្យក្រសួងទៅជួយដោះស្រាយនោះ។
ដើម្បីចៀសវាងការតវ៉ានានា ក្រសួងបានស្នើដល់ម្ចាស់គម្រោងអភិវឌ្ឍន៍លំនៅដ្ឋានទាំងអស់ ត្រូវធ្វើការទំនាក់ទំនងមកក្រសួងដែនដី នគរូបនីយកម្ម និងសំណង់ ដើម្បីស្នើសុំមន្ត្រីជំនាញឱ្យចុះទៅពិនិត្យការដ្ឋានសំណង់របស់ខ្លួនជាមុនសិន មុននឹងធ្វើការបុកគ្រឹះសាងសង់លំនៅឋានឡើង និងដើម្បីចៀសវាងប៉ះពាល់ដល់ការរស់នៅរបស់អ្នកនៅក្បែរខាងដែលមានព្រំដីជាប់គ្នា៕
