សាស្ត្រាចារ្យ Raymond Robertson នៃសាលា The Bush School of Government and Public Service របស់សាកលវិទ្យាល័យ Texas A&M University បានសម្ដែងការកោតសរសើរនូវដំណើរវិវឌ្ឍន៍ក្នុងវិស័យកាត់ដេរនៅកម្ពុជា។
ការសរសើរនេះត្រូវបានធ្វើឡើងខណៈដែលលោកសាស្ត្រាចារ្យរួមដំណើរដោយលោក William Heidt ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាបានជួបពិភាក្សាការងារជាមួយឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មនៃប្រទេសកម្ពុជា។
លោកសាស្ត្រាចារ្យ Robertson បានសរសើរអំពីការរីកចម្រើនរបស់កម្ពុជា ជាពិសេសនៅក្នុងវិស័យវាយនភណ្ឌ ដោយស្ថានភាពដ៏ល្អប្រសើរនៅកម្ពុជាបានក្លាយទៅជាគំរូដ៏ល្អមួយសម្រាប់ពិភពលោក។ លោកសាស្ត្រាចារ្យបានបន្តទៀតថា ស្ថានភាពការងារល្អនៅក្នុងរោងចក្រ រួមផ្សំជាមួយនឹងការដំឡើងប្រាក់ឈ្នួលអប្បបរមានឹងជំរុញទឹកចិត្តជូនដល់កម្មករ-កម្មការិនី ឱ្យខិតខំប្រឹងប្រែង និងបង្កើនផលិតកម្មរបស់រោងចក្របន្ថែមទៀត។
បន្ថែមពីនេះឯកឧត្តមរដ្ឋមន្ត្រី ប៉ាន សូរស័ក្ដិ បានជម្រាបជូនអំពីកិច្ចប្រជុំជាមួយកម្មវិធី Better Factories Cambodia (BFC) នៃអង្គការពលកម្មអន្តរជាតិ (International Labor Organization) ដោយបានពិភាក្សាលើការត្រួតពិនិត្យអនុលោមភាពជាមួយនឹងច្បាប់ការងារ និងការជំរុញឱ្យមានស្ថានភាពរឹតតែប្រសើរឡើងនៅក្នុងរោងចក្រទាំងឡាយនៅកម្ពុជា។
ឯកឧត្តមបន្ថែមទៀតថា ក្រោមការត្រួតពិនិត្យអនុលោមភាពច្បាប់ការងារនៅរោងចក្រប្រមាណ 500រោងចក្រក្រោមកម្មវិធី BFC ឃើញថា រោងចក្រទាំងអស់បានប្រកាន់ខ្ជាប់នូវច្បាប់ជាធរមាន។ ជាមួយនោះដែរ ឯកឧត្តមរដ្ឋមន្ត្រី ក៏បានជម្រាបជូនអំពីសេចក្ដីសម្រេចរបស់រាជរដ្ឋាភិបាលក្នុងការដំឡើងប្រាក់ឈ្នួលអប្បបរមាពី 153ដុល្លារអាមេរិកនៅឆ្នាំ2017 មក 170ដុល្លារអាមេរិកនៅឆ្នាំ2018នេះ គឺដើម្បីជាការលើកទឹកចិត្ត និងជាគោលនយោបាយលើកស្ទួយជីវភាពរបស់ប្រជាពលរដ្ឋកម្ពុជា។
ក្នុងជំនួបខាងលើ ភាគីទាំងពីរក៏បានពិភាក្សាលើការបន្តនិរន្តរភាពក្នុងការត្រួតពិនិត្យអនុលោមភាព ការតភ្ជាប់ឧស្សាហកម្មក្នុងស្រុក (Backward Linkage) ការបណ្ដុះបណ្ដាលវិជ្ជាជីវៈ និងជំនាញកាត់ដេរ ការលើកកម្ពស់ខ្សែចង្វាក់តម្លៃ និងបង្កើតតម្លៃបន្ថែមផងដែរ៕