ក្រសួងសេដ្ឋកិច្ច និងហិរញ្ញវត្ថុ បានរៀបចំកិច្ចប្រជុំក្រុមការងារផ្នែកនីតិកម្ម ពន្ធដារ និងអភិបាលកិច្ចក្នុងវេទិការាជរដ្ឋាភិបាល និងផ្នែកឯកជន ដើម្បីកែលម្អបរិយាកាសធុរកិច្ចនៅកម្ពុជា ខណៈរដ្ឋាភិបាលកម្ពុជាកំពុងខិតខំប្រឹងប្រែងទាក់ទាញការវិនិយោគថ្មីៗបន្ថែមទៀតមកកាន់ទីផ្សាររបស់ខ្លួន។
យោងតាមព័ត៌មានដែលបានចែកចាយដោយក្រសួងសេដ្ឋកិច្ច និងហិរញ្ញវត្ថុ កិច្ចប្រជុំនោះបានផ្តោតលើកិច្ចខិតខំប្រឹងប្រែងដោះស្រាយបញ្ហារបស់វិស័យឯកជន ដើម្បីរួមចំណែកបង្កើតនូវបរិយាកាសកាន់តែល្អប្រសើរឡើងចំពោះការធ្វើធុរកិច្ច និងការវិនិយោគនៅក្នុងប្រទេសកម្ពុជា។
ក្រសួងសេដ្ឋកិច្ច និងហិរញ្ញវត្ថុបានបន្តទៀតថា រាជរដ្ឋាភិបាលមានឆន្ទៈយ៉ាងមុតមាំក្នុងការកែលម្អបរិស្ថានវិនិយោគ និងធុរកិច្ច ជាពិសេសការបន្តរៀបចំប្រព័ន្ធច្បាប់ និងលិខិតបទដ្ឋានគតិយុត្តទាំងឡាយ ដើម្បីទ្រទ្រង់ដល់ធុរកិច្ច និងពង្រឹងការប្រកួតប្រជែងដោយស្មើភាព និងយុត្តិធម៌ និងដើម្បីលើកស្ទួយកំណើនសេដ្ឋកិច្ចជាតិ។
តាមរយៈកិច្ចប្រជុំនោះដែរ ការងារចំពោះមុខគឺ អគ្គនាយកដ្ឋានពន្ធដារបានរៀបចំគោលការណ៍ណែនាំសាមញ្ញមួយទៀតសម្រាប់ពន្យល់ដល់អ្នកជាប់ពន្ធឱ្យកាន់តែងាយយល់អំពីសិទ្ធិ និងកាតព្វកិច្ចពន្ធ ដោយរៀបចំពង្រីកវិសាលភាព និងពង្រឹងយន្តការនេះបន្ថែមទៀត សំដៅធានាដល់ការផ្តល់កិច្ចសហការពេញលេញរបស់អគ្គនាយកដ្ឋានពន្ធដារចំពោះវិស័យឯកជនដែលពាក់ព័ន្ធទាំងអស់។
ជាមួយគ្នានោះ បច្ចុប្បន្ននេះអគ្គនាយកដ្ឋានពន្ធដារក៏បានបង្កើតក្រុមការងាររវាងវិស័យពន្ធដារ និងផ្នែកឯកជនដើម្បីបង្កើតជាវេទិកាសម្រាប់ផ្តល់ការពន្យល់ឱ្យកាន់តែច្បាស់លាស់ឡើងនូវនីតិវិធីពាក់ព័ន្ធនឹងការបង់ពន្ធផ្សេងៗជាដើម។
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានពន្ធដារ ធ្លាប់បានលើកឡើងរួចមកហើយថា បន្ទាប់ពីមានការផ្តាស់ប្តូររបបយកពន្ធពីរបបម៉ៅការមកជារបបពិតវិញ មានវិស័យឯកជនរហូតដល់ទៅ 80% បានអះអាងថា ខ្លួនរកស៊ី ឬប្រកបអាជីវកម្មខាត ប៉ុន្តែការត្អូញត្អែរនេះត្រូវបានច្រានចោលដោយមន្ត្រីជំនាញៗនៃអគ្គនាយកដ្ឋានពន្ធដារ។
ថ្មីៗបំផុតនេះ ឯកឧត្តមប្រតិភូរាជរដ្ឋាភិបាល បានថ្លែងជាសាធារណៈថា ការប្រកាសពន្ធរបស់វិស័យឯកជនតាមរយៈវិក្កយបត្ររហូតដល់ 99% មិនមានភាពត្រឹមត្រូវ ហើយអគ្គនាយកដ្ឋានពន្ធដារត្រៀមដាក់ឱ្យដំណើរការការប្រកាសពន្ធតាមរយៈអនឡាញ ដើម្បីធ្វើឱ្យការបង់ពន្ធកាន់តែមានតម្លាភាព និងងាយស្រួលឡើង។
កាលពីសប្តាហ៍កន្លងទៅនេះ ឯកឧត្តម សុខចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា បានថ្លែងលើកឡើងនៅក្នុងកិច្ចប្រជុំជាមួយគណៈប្រតិភូពាណិជ្ជកម្ម និងសេដ្ឋកិច្ច នៃតំបន់រដ្ឋបាលពិសេសហុងកុងថា កម្ពុជាជាប្រទេសដែលមានលក្ខណៈអំណោយផលក្នុងការវិនិយោគ ជាពិសេសស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច ដែលផ្តល់លទ្ធភាពឱ្យកម្ពុជាសម្រេចបាននូវកំណើនសេដ្ឋកិច្ចជាមធ្យម 7.7% ក្នុងរយៈពេលជាង 2ទសវត្សរ៍កន្លងមកនេះ ក្នុងនោះកំណើននេះបានជំរុញឱ្យកម្ពុជាទទួលបានការអភិវឌ្ឍសេដ្ឋកិច្ច ដោយផ្តល់ទំនុកចិត្តដល់អ្នកវិនិយោគទុនបរទេសឱ្យមកបណ្តាក់ទុនលើគ្រប់វិស័យនៅកម្ពុជា។
ឯកឧត្តមរដ្ឋមន្ត្រី បានបន្តថា ចំណែកការសម្រេចចិត្តរបស់អ្នកវិនិយោគទុនហុងកុង ដែលបានជ្រើសរើសយកកម្ពុជាជាគោលដៅអភិវឌ្ឍន៍ការវិនិយោគដ៏មានសក្តានុពល គឺជាការចាប់ផ្តើម និងការពង្រីកជីវកម្មរបស់ខ្លួនដ៏មានតម្លាភាព។
យោងតាមតួលេខនៃការវិនិយោគរបស់ហុងកុងនៅកម្ពុជាចាប់ពីឆ្នាំ1994 ដល់ឆ្នាំ2017 មានចំនួនសរុប 257គម្រោង និងទុនសរុបប្រមាណ 1.33ពាន់លានដុល្លារអាមេរិក ស្មើនឹងជាង2% នៃតម្លៃវិនិយោគទុនសរុប។ ដោយឡែកនៅឆ្នាំ2017 វិនិយោគទុនហុងកុងមានចំនួន13គម្រោង ក្នុងនោះមានវិស័យកាត់ដេរសម្លៀកបំពាក់ កាបូប ស្បែកជើង និងឧស្សាហកម្មដទៃទៀតក្នុងទឹកប្រាក់វិនិយោគប្រមាណ 85លានដុល្លារអាមេរិកស្មើនឹង 1.64% នៃទុនវិនិយោគ សរុបប្រចាំឆ្នាំ2017៕
