ការបណ្តុះបណ្តាលផ្នែកធុរកិច្ចជារឿងសំខាន់មួយសម្រាប់កម្ពុជា ព្រោះកម្ពុជាជាប្រទេសដែលសម្បូរទៅដោយធនធានមនុស្សវ័យក្មេង ប្រកបដោយចំណេះដឹង និងមានសក្តានុពលខ្លាំងលើកម្លាំងពលកម្ម រួមទាំងចំណេះដឹងសម្រាប់ចូលរួមអភិវឌ្ឍសង្គមផងដែរ។
នាពេលថ្មីៗនេះ ក្រសួងអប់រំ យុវជន និងកីឡាបានដាក់ចេញនូវកម្មវិធីថ្មីដើម្បីបណ្តុះបណ្តាលជំនាញធុរកិច្ចក្នុងថ្នាក់វិទ្យាល័យនៅទូទាំងប្រទេសដោយក្នុងនោះ ក្រសួងរំពឹងថា នឹងមានសិស្សប្រមាណ500នាក់ចូលរួមវគ្គបណ្តុះបណ្តាលនេះ។
រដ្ឋមន្ត្រីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ ជួនណារ៉ុន បានលើកឡើងថា ការបណ្តុះបណ្តាលជំនាញធុរកិច្ចគឺជាផ្នែកយ៉ាងសំខាន់មួយដែលក្រសួងបានគិតគូរ និងជំរុញឱ្យប្រជាជនមានភាពជាសហគ្រិនកាន់តែច្រើន។
នៅពេលដែលយើងមានសហគ្រិនច្រើន នោះពួកគេនឹងអាចស្រូបទាញកម្លាំងធនធានមនុស្សកាន់តែច្រើនដើម្បីបម្រើការងារក្នុងក្រុមហ៊ុន សហគ្រាស ឬចង្វាក់ផលិតកម្មដែលបង្កើតឡើងដោយកូនខ្មែរ។
ឯកឧត្តម ហង់ ជួនណារ៉ុន មានប្រសាសន៍ថា ៖ “យើងនឹងបង្កើនការបណ្តុះបណ្តាលឱ្យបានកាន់តែទូលំទូលាយនៅទូទាំងប្រទេស ដោយការបណ្តុះ-បណ្តាលគ្រូបន្ថែមឱ្យមានសមត្ថភាពខ្ពស់ ហើយមានលទ្ធភាពគ្រប់គ្រាន់ដើម្បីធ្វើការបណ្តុះបណ្តាលសិស្សឱ្យមានចំណេះដឹងកាន់តែខ្លាំង។
ឯកឧត្តម តូច ជឿន អគ្គនាយកនៃ អគ្គនាយកដ្ឋានយុវជននៃក្រសួងអប់រំ យុវជន និងកីឡា បានថ្លែងក្នុងសិក្ខាសាលាស្តីពីការចែករំលែកបទពិសោធស្តីពីការអនុវត្តគម្រោងសាកល្បងអប់រំសហគ្រិនភាព កាលពីដើមខែមីនាថា ក្រសួងនឹងពង្រីកការបណ្តុះបណ្តាលជំនាញធុរកិច្ចដល់សិស្សនៅតាមវិទ្យាល័យទូទាំងប្រទេស ដើម្បីបង្កលទ្ធភាពឱ្យសិស្សអាចរកការងារធ្វើនៅតាមបណ្តាក្រុមហ៊ុនឬអាចបង្កើតមុខរបរដោយខ្លួនឯង បង្កើតការងារជូនដល់ប្រជាពលរដ្ឋ បង្កើនប្រាក់ចំណូលដល់ក្រុម គ្រួសារក៏ដូចជាសេដ្ឋកិច្ចជាតិផងដែរ។
ឯកឧត្តម តូច ជឿន មានប្រសាសន៍ថា ៖ “ជំនាញធុរកិច្ចនេះ គឺបង្ហាត់បង្រៀនសិស្សនូវជំនាញទាក់ទងនឹងការបង្កើតគំនិតធ្វើអាជីវកម្ម ភាពជាអ្នកដឹកនាំ និងផ្តល់ឱកាសឱ្យសិស្សបានអនុវត្តជាក់ស្តែងឱ្យច្រើននៅក្នុងថ្នាក់រៀនផងដែរ។
ឯកឧត្តម បានលើកឡើងផងដែរថាយើងចង់តម្រង់ទិសឱ្យសិស្សអាចបង្កើតមុខរបរដោយខ្លួនឯងតាមរយៈការបណ្តុះបណ្តាលសហគ្រិនភាព ព្រោះវាជាមធ្យោបាយយ៉ាងសំខាន់ក្នុងការបង្កើតការងារដល់សង្គម និងបង់ពន្ធជូនរដ្ឋ។ ម្យ៉ាងវិញទៀត វាក៏ជាមធ្យោបាយក្នុងការបង្កើតធនធានមនុស្ស ឬដណ្តើមធនធានទ្រព្យសម្បត្តិក្នុងកម្រិតតំបន់ ឬជាអន្តរជាតិថែមទៀតផង។
អ្នកសម្របសម្រួលអង្គការអន្តរជាតិខាងការងារប្រចាំកម្ពុជា ដែលហៅកាត់ថា ILO លោក ទុនសុភ័ណ បានលើកឡើងថា ការសិក្សាស្តីពីធុរកិច្ចនេះ គឺពិតជាមានសារៈសំខាន់ណាស់សម្រាប់សិស្សកម្រិតវិទ្យាល័យ ព្រោះពួកគេអាចនឹងមានជំនាញ បន្ថែមក្នុងការធ្វើជំនួញនៅវ័យក្មេង ចេះធ្វើទីផ្សារ (ម៉ាឃីតធីង) ក្នុងមុខជំនួញ និងចេះគ្រប់គ្រងចំណូលចំណាយប្រចាំថ្ងៃជាដើម៕
