គិតត្រឹមដំណាច់ឆ្នាំ2017កន្លងទៅ កម្ពុជាមានរោងចក្រខ្នាតធំប្រមាណជាជាង 1,500រោងចក្រដែលបានចុះបញ្ជី និងផ្តល់ការងារដល់ពលរដ្ឋខ្មែរចំនួនប្រមាណជាង 98ម៉ឺននាក់ នេះបើតាមរបាយការណ៍របស់ក្រសួងឧស្សាហកម្ម និងសិប្បកម្ម។
ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មបានមានប្រសាសន៍នៅក្នុងពិធីបិទសន្និបាតបូកសរុបលទ្ធផលការងារឆ្នាំ2017 និងលើកទិសដៅការងារឆ្នាំ2018 បានឱ្យដឹងថា គិតត្រឹមដំណាច់ឆ្នាំ2017 រោងចក្រខ្នាតធំដែលបានចុះបញ្ជីមានចំនួនសរុប 1,522 រោងចក្រ ស្មើនឹង 137% ធៀបនឹងឆ្នាំ2013។
ក្នុងនោះផ្នែកឧស្សាហកម្មតម្បាញ កាត់ដេរសម្លៀកបំពាក់ ស្បែកជើង និងកាបូបមានចំនួន 1,031រោងចក្រ ស្មើនឹង129% ដែលបានផ្តល់ការងារដល់ពលរដ្ឋខ្មែរសរុបមានចំនួន 982,203 នាក់ ស្មើនឹង143% ប្រៀបធៀបនឹងឆ្នាំ2013។ ចំណែកឯសហគ្រាសធុនតូច មធ្យម និងសិប្បកម្មមានចំនួនសរុប 155,640មូលដ្ឋាន ស្មើនឹង130% បើធៀបនឹងឆ្នាំ2013 ហើយបានផ្តល់ការងារជូនប្រជាពលរដ្ឋបានចំនួនប្រមាណ 1,106,745នាក់ ស្មើនឹង229% ធៀបនឹងរយៈពេលដូចគ្នាខាងលើនេះ។
ចំណុចនេះឯកឧត្តមទេសរដ្ឋមន្ត្រីបានទាញការចាប់អារម្មណ៍ថា ក្នុងទិដ្ឋភាពបច្ចុប្បន្ន កម្ពុជាកំពុងតែផ្លាស់ប្តូររចនាសម្ព័ន្ធសេដ្ឋកិច្ចពីប្រទេសដែលពឹងផ្អែកលើវិស័យកសិកម្មទៅជាប្រទេសពឹងផ្អែកលើវិស័យឧស្សាហកម្ម និងសេវាកម្ម ជាក់ស្តែងតាមតួលេខបង្ហាញថា វិស័យឧស្សាហកម្មបានចូលរួមចំណែកនៃកំណើនផលទុនសរុបក្នុងស្រុកមានការកើនឡើងជារៀងរាល់ឆ្នាំ គឺពីទំហំ 24.1% នៅឆ្នាំ2013 ដល់ទំហំ 30.9%នៅឆ្នាំ 2017 ស្របពេលដែលវិស័យកសិកម្មមានទំហំ 24.9% នៅឆ្នាំ2017 ។
ប្រការនេះធ្វើឱ្យកម្ពុជាប្រែក្លាយពីប្រទេសមានចំណូលទាប ទៅជាប្រទេសមានចំណូលមធ្យមកម្រិតទាប និងកំពុងបន្តដំណើរឈានទៅក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ2030៕
