លោក Jurgen Klopp អ្នកចាត់ការទូទៅរបស់ក្រុម Liverpool បានបញ្ជាក់ថា ការឈានទៅវគ្គ 8ក្រុមចុងក្រោយនៃក្របខ័ណ្ឌ Champions League គឺជាកន្លែងដែលក្រុមរបស់ត្រូវទៅ ក្រោយពីបានបញ្ចប់ការរង់ចាំរយៈពេល 9ឆ្នាំ ដើម្បីឈានទៅវគ្គ 1/4 ផ្តាច់ព្រ័ត្រនេះ កាលពីថ្ងៃអង្គារ។
បើទោះបីត្រឹមតែអាចបញ្ចប់ក្នុងលទ្ធផលស្មើ 0-0 ក្នុងការប្រកួតវគ្គ 16ក្រុមចុងក្រោយ ជើងទី2 នាកីឡដ្ឋាន Anfield ក៏ដោយ ប៉ុន្តែ ក្រុម Liverpool បានយកឈ្នះលើក្រុម Porto ដោយងាយក្នុងលទ្ធផលទាំង 2ជើង 5-0 ក្រោយពីការដណ្តើមបានជ័យជម្នះដ៏ធំរបស់ពួកគេនៅលើទឹកដីរបស់ព័រទុយហ្គាល់ កាលពី៣សប្តាហ៍មុន។
លោក Klopp ដែលកំពុងតែស្ថិតក្នុងរដូវកាលទី2 របស់លោកក្នុងនាមជាគ្រូបង្វឹករបស់ Liverpool នោះ បានឲ្យដឹងថា៖ «ខ្ញុំពិតជាមានអារម្មណ៍ល្អណាស់។ ខ្ញុំគិតថា ឆ្នាំនេះ យើងមានកម្មសិទ្ធិក្នុងវគ្គនេះ ហើយវាគួរតែមិនមានជារឿងដ៏គួរឲ្យភ្ញាក់ផ្អើលខ្លាំងឡើយ»។
គ្រូបង្វឹកសញ្ជាតិអាល្លឺម៉ង់រូបនេះ បានបន្ថែមទៀតថា៖ «វគ្គបន្ទាប់ នឹងលំបាក ក្រុម 7ផ្សេងទៀតសុទ្ធសឹងជាក្រុមខ្លាំង ហើយប្រហែលជាក្រុម 4ក្នុងចំណោមនោះ គឺជាក្រុមមកពីអង់គ្លេស ដែលនឹងមិនមានស្រួលឡើយ។ ខ្ញុំគិតថា យើងនឹងមានឱកាសមួយសម្រាប់ទៅវគ្គ 1/2ផ្តាច់ព្រ័ត្រ។ យើងនឹងធ្វើដំណើរម្តងមួយជំហានៗ ហើយនៅរាត្រីនេះវាពិតជាផ្តល់នូវការរំភើបណាស់»។
ស្របពេលជាមួយគ្នានេះ ខ្សែប្រយុទ្ធ Cristiano Ronaldo និងខ្សែបម្រើ Casemiro សុទ្ធសឹងបានរកគ្រាប់បាល់បញ្ចូលទីដូចគ្នាសម្រាប់ក្រុម Real Madrid ខណៈដែលក្រុមម្ចាស់ការពារតំណែងជើងឯកមួយនេះ បានយកឈ្នះក្នុងលទ្ធផល 2-1 លើក្រុម Paris Saint-Germain ដែលអវត្តមាន Neymar ដើម្បីកក់កៅអីរបស់ពួកគេទៅកាន់វគ្គ 8ក្រុមចុងក្រោយនៃក្របខ័ណ្ឌ Champions League កាលពីថ្ងៃអង្គារ។ លទ្ធផលនេះ បានធ្វើឲ្យក្រុម Real ដណ្តើមបានជ័យជម្នះទាំង២ជើងក្នុងលទ្ធផល 5-2 ក្រោយពីឈ្នះ 3-1 ក្នុងការប្រកួតជើងទី1 កាលពី៣សប្តាហ៍មុន៕
ប្រភពពី៖ The Straits Times
