ដោយឈរលើសេ្ថរភាពនយោបាយ និងកំណើនសេដ្ឋកិច្ចថេរក្នុងរយៈពេលជាង 2ទសវត្សរ៍ចុងក្រោយនេះ បានធ្វើឱ្យកម្ពុជាទាក់ទាញវិនិយោគិនបរទេស ចូលមកបណ្តាក់ទុននៅកម្ពុជា កាន់តែច្រើនឡើងៗ ឧទាហរណ៍ដូចជា វិនិយោគទុនកូរ៉េដែលចូលមកវិនិយោគនៅកម្ពុជា កើនឡើងដល់ 900ក្រុមហ៊ុន និងមានទឹកប្រាក់វិនិយោគសរុបប្រមាណជាង 4,500លានដុល្លារ។
លោក OH Nak Young ឯកអគ្គរដ្ឋទូតនៃសាធារណរដ្ឋកូរ៉េប្រចាំនៅកម្ពុជាបានមានប្រសាសន៍ថា ទំនាក់ទំនងការទូតផ្លូវការវាងប្រទេសទាំងពីរត្រូវបានកសាងឡើងវិញតាំងពី ឆ្នាំ1997មកម្ល៉េះ ដែលមានរយៈពេលប្រមាណជា 21ឆ្នាំមកហើយ ក្រោយពីកម្ពុជាបានបោះឆ្នោតជ្រើសរើសនាយករដ្ឋមន្ត្រីឡើងវិញកាលពីឆ្នាំ1993។ ទោះជាទំនាក់ទំនងរវាងកម្ពុជា និងកូរ៉េមានរយៈពេលខ្លីក៏ដោយក៏ទំនាក់ទំនងរវាងប្រទេសទាំងពីរបាននិងកំពុងតែរីកចម្រើនលើវិស័យជាច្រើនគួរឱ្យកត់សម្គាល់ ក្នុងនោះមានដូចជា វិស័យនយោបាយសេដ្ឋកិច្ច កិច្ចសហប្រតិបត្តិការអភិវឌ្ឍន៍សង្គម និងវប្បធម៌ជាដើម។
លោកបន្តទៀតថា ប្រទេសកម្ពុជា និងកូរ៉េមានរចនាសម្ព័ន្ធលើវិស័យសេដ្ឋកិច្ច និងសង្គមដែលបំពេញនូវកង្វះខាត ដែលអាចជួយគ្នាទៅវិញទៅមកបាន។ ពោលគឺទំនាក់ទំនងរបស់ប្រទេសទាំងពីរមានការរីកចម្រើនឥតឈប់ឈរ នៅពេលដែលមានការផ្សំឡើងរវាងកម្លាំងពលកម្ម ប្រកបដោយភាពសម្បូរបែបនៃកសិដ្ឋានដ៏ទូលំទួលាយ លក្ខខណ្ឌភូមិសាស្ត្រ ភាពបើកចំហ លើវិស័យសេដ្ឋកិច្ច ខ្ពស់របស់កម្ពុជា និងបច្ចេកវិទ្យាលទ្ធភាពធ្វើហិរញ្ញប្បទាន និងបទពិសោធសេដ្ឋកិច្ចរបស់កូរ៉េ។
យោងតាមរបាយការណ៍របស់ស្ថានទូតកូរ៉េប្រចាំនៅកម្ពុជាបានបង្ហាញថា ទំហំពាណិជ្ជកម្មរវាងប្រទេសទាំងពីរបានកើនឡើងរហូតដល់ 900លានដុល្លារអាមេរិក ខណៈដែលចំនួនមនុស្សធ្វើដំណើរទស្សនកិច្ចទៅវិញទៅមកប្រចាំឆ្នាំមានចំនួនជាង 40ម៉ឺននាក់ ហើយពលករឧស្សហកម្មកម្ពុជាប្រមាណ 4ម៉ឺននាក់កំពុងធ្វើការនៅកូរ៉េ។ ក្រៅពីនេះប្រទេសកូរ៉េក៏បាននិងកំពុងតែផ្តល់ជំនួយអភិវឌ្ឍន៍ផ្លូវការសរុបប្រមាណ 600លានដុល្លារអាមេរិកដល់កម្ពុជាផ្តោតលើវិស័យជាច្រើននាពេលកន្លងមក។
ចំណែករបាយការណ៍របស់ក្រុមប្រឹក្សាអភិវឌ្ឍន៍កម្ពុជាវិញ បានឱ្យដឹងថា គិតមកត្រឹមឆ្នាំ2017 កម្ពុជាបានទទួលគម្រោងវិនិយោគរបស់សាធារណរដ្ឋកូរ៉េចំនួន 208គម្រោង ក្នុងទុនវិនិយោគសរុបប្រមាណ 4,700លានដុល្លារអាមេរិក។ ជាការកត់សម្គាល់គម្រោងវិនិយោគរបស់សាធារណរដ្ឋកូរ៉េ មានការកើនឡើងជាលំដាប់ ជាពិសេសនៅឆ្នាំ2017 អ្នកវិនិយោគសាធារណរដ្ឋកូរ៉េបានបោះទុនវិនិយោគដល់ទៅ 202លានដុល្លារអាមេរិក ច្រើនជាងពេលណាៗទាំងអស់ក្នុងរយៈពេលប្រាំឆ្នាំចុងក្រោយនេះ និងឈរនៅលំដាប់ទី5 ក្នុងចំណោមទុនវិនិយោគបរទេសមកកម្ពុជា ដែលទំហំវិនិយោគនេះបានបង្ហាញអំពីភាពកាន់តែជឿជាក់ទៅលើបរិយាកាសវិនិយោគនៅកម្ពុជាពីសំណាក់អ្នកវិនិយោគសាធារណរដ្ឋកូរ៉េ។
ជាមួយគ្នានេះផងដែរ ឯកឧត្តម សុខ ចិន្តាសោភាបានសម្តែងនូវការស្វាគមន៍ និងគាំទ្រចំពោះការដាក់ចេញនូវគោលនយោបាយភាគខាងត្បូងថ្មីរបស់សាធារណរដ្ឋកូរ៉េ ហើយឯកឧត្តមក៏បានសម្តែងនូវក្តីសង្ឃឹមយ៉ាងមុតមាំថា គោលនយោបាយថ្មីនេះនឹងក្លាយជាចលករយ៉ាងសំខាន់ក្នុងការជំរុញកិច្ចសហប្រតិបត្តិសេដ្ឋកិច្ចក្នុងតំបន់ និងទ្វេភាគី ជាពិសេសការជំរុញនិងទាក់ទាញអ្នកវិនិយោគសាធារណរដ្ឋកូរ៉េកាន់តែច្រើនមកកម្ពុជា ហើយក៏នឹងចូលរួមចំណែកផងដែរក្នុងការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ 2015-2025 ដែលជាយុទ្ធសាស្ត្រកំណើនថ្មី សំដៅកែប្រែរចនាសម្ព័ន្ធឧស្សាហកម្មកម្ពុជាពីឧស្សាហកម្មអតិពលកម្ម ទៅជាឧស្សាហកម្មផ្អែកលើជំនាញត្រឹមឆ្នាំ2025។
ទន្ទឹមនឹងនេះ ឯកឧត្តមក៏បានធ្វើការអំពាវនាវដល់ភាគីសាធារណរដ្ឋកូរ៉េ បន្តគាំទ្រការអភិវឌ្ឍហេដ្ឋារចនាសម្ព័ន្ធទាំងក្នុងក្របខណ្ឌហិរញ្ញប្បទានសហប្រតិបត្តិការ និងការវិនិយោគឯកជន។
គួរបញ្ជាក់ផងដែរថា ក្រុមហ៊ុនកូរ៉េភាគច្រើនធ្វើការវិនិយោគ ទៅលើវិស័យវាយនភណ្ឌកាត់ដេរ ហិរញ្ញវត្ថុ អចលនទ្រព្យ សំណង់ និងវិស័យកសិកម្មជាដើម៕
