ថ្នាក់ដឹកនាំក្រសួងពាណិជ្ជកម្មនៃព្រះរាជាណាចក្រកម្ពុជា និងព្រះរាជាណាចក្រថៃ បានបង្ហាញពីការប្តេជ្ញាជំរុញទំហំពាណិជ្ជកម្មទ្វេភាគីឱ្យបានដល់ 15ពាន់លានដុល្លានៅប៉ុន្មានឆ្នាំខាងមុខនេះ ខណៈដែលទំហំពាណិជ្ជកម្មរវាងប្រទេសទាំងពីរនាឆ្នាំកន្លងទៅបានបង្ហាញពីសញ្ញាកើនឡើងតិចតួចដោយសារការប្រកួតប្រជែងខ្លាំងពីបណ្តាប្រទេសមួយចំនួននៅក្នុងតំបន់។
ដើម្បីគាំទ្រដល់ការប្តេជ្ញាចិត្តនេះ រដ្ឋមន្ត្រីពាណិជ្ជកម្មនៃប្រទេសទាំងពីរបានចុះហត្ថលេខាលើឯកសារចំនួនពីរ គឺ 1) យុទ្ធសាស្ត្រកំណើននៃកិច្ចសហ-ប្រតិបត្តិការសេដ្ឋកិច្ចតាមបណ្តាខេត្តជាប់ព្រំដែន និង2) អនុស្សរណៈស្តីពីកិច្ចសហប្រតិបត្តិការជំរុញពាណិជ្ជកម្ម។
នៅក្នុងកិច្ចប្រជុំគណៈកម្មការចម្រុះផ្នែកពាណិជ្ជកម្មរវាងកម្ពុជា-ថៃលើកទី6 (6th JTC) ដែលមានរយៈពេលពីរថ្ងៃ ពីថ្ងៃទី21 ដល់22 ខែកុម្ភៈ ឆ្នាំ2018 ក្រោមអធិបតីភាពឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មនៃព្រះរាជាណាចក្រកម្ពុជា និងឯកឧត្តម សុនធិរ៉ាត់ សុនធិជីរ៉ាវង្ស (Sontirat Sontijirawong) រដ្ឋមន្ត្រីក្រសួងពាណិជ្ជកម្មនៃព្រះរាជាណាចក្រថៃឡង់ដ៍ និងមានការចូលរួមពីមន្ត្រីជាន់ខ្ពស់ និងតំណាងវិស័យឯកជននៃប្រទេសទាំងពីរប្រមាណជាង 100នាក់ដើម្បីពិនិត្យមើលឡើងវិញនូវវឌ្ឍនភាពនៃពាណិជ្ជកម្មទ្វេភាគី។
ឧកញ៉ា លឹម ហេង អនុប្រធានសភាពាណិជ្ជកម្មកម្ពុជាដែលបានចូលរួមក្នុងកិច្ចប្រជុំនោះដែរបានប្រាប់អ្នកយកព័ត៌មានឱ្យដឹងថា បន្ទាប់ពីការជួបជជែកគ្នាភាគីកម្ពុជាបានលើកបញ្ហាត្រង់ៗជាមួយភាគីថៃ ហើយរដ្ឋមន្ត្រីពាណិជ្ជកម្មថៃហាក់បានសម្ដែងឱ្យឃើញនូវឆន្ទៈក្នុងការដោះស្រាយបញ្ហាដែលសំណូមពរដោយអ្នកធុរកិច្ចកម្ពុជាផងដែរ។
លោកឱកញ៉ា បានបញ្ជាក់ថា៖ “យើងបានប្រាប់ គាត់រួចហើយ ពីផលលំបាករបស់យើងក្នុងការដឹកកសិផលទៅកាន់ប្រទេសគាត់ និងភាពយឺតយ៉ាវក្នុងការដឹកទំនិញឆ្លងកាត់ ដោយសារពេលព្រឹកមន្ត្រីតាមព្រំដែនបើកឱ្យនាំទំនិញចូលនៅម៉ោង 10:30។ យើងបានស្នើឱ្យគាត់ត្រួតពិនិត្យបញ្ហានេះ ចៀសវាងការរាំងស្ទះដល់ការឆ្លងកាត់ទំនិញរវាងប្រទេសទាំងពីរ ខ្ញុំសង្ឃឹមថា ការជជែកគ្នាក្នុងថ្ងៃនេះនឹងដោះស្រាយបានយ៉ាងហោចណាស់ក៏ 80% នៃបញ្ហាដែលខាងយើងបានលើកឡើងដែរ។
អ្នកប្រកបកិច្ចការធុរកិច្ចកម្ពុជា បានកត់សម្គាល់ថា នាពេលកន្លងមក ភាគីថៃតែងបង្កការលំបាកច្រើនដល់ការដឹកជញ្ជូន ដូចជាការបិទច្រកទ្វារព្រំដែនជាឯកតោភាគី បង្កភាពយឺតយ៉ាវក្នុងការបើកច្រកទ្វារព្រំដែន មាននីតិវិធីសាំញ៉ាំច្រើនពេក ដែលភាគីកម្ពុជាពិបាកដឹកជញ្ជូនទំនិញឆ្លងកាត់នៅតាមបន្ទាត់ព្រំដែន ដែលធ្វើឱ្យមានភាពរាំងស្ទះដល់ការដឹកជញ្ជូនកសិផលផ្សេងៗទៅកាន់ប្រទេសថៃ។
ឧកញ៉ា លឹម ហេង បន្ថែមថា៖ “វាជាសញ្ញាមួយល្អ ដែលគាត់ចេញមុខមកជួយអ្នកធុរកិច្ចក្នុងវិស័យឯកជននៅប្រទេសកម្ពុជា ដោយបានដឹងពីការលំបាករបស់ផ្នែកឯកជននៃប្រទេសកម្ពុជា ដើម្បីឱ្យភាគីថៃជួយយើង ហើយដូចគ្នានេះដែរ បើសិនភាគីថៃមានបញ្ហា គឺគាត់នឹងស្នើមកភាគីកម្ពុជាជួយដោះស្រាយដូចគ្នា។
នៅក្នុងឆ្នាំ2017កន្លងទៅ ទំហំពាណិជ្ជកម្មទ្វេភាគីរវាងកម្ពុជា និងប្រទេសថៃមានប្រមាណជាង 6ពាន់លានដុល្លារ ដោយក្នុងនោះតម្លៃទឹកប្រាក់នាំចេញមុខទំនិញនានារបស់កម្ពុជាទៅកាន់ទីផ្សារប្រទេសថៃមានប្រមាណ 894លានដុល្លារអាមេរិក ថយចុះប្រមាណ 5% បើធៀបនឹងឆ្នាំ2016 ដែលមានប្រមាណ 937លានដុល្លារអាមេរិក ខណៈការនាំចូលរបស់ថៃមកទីផ្សារកម្ពុជាមានប្រមាណ 5,270 លានដុល្លារអាមេរិក កើនឡើងជិត 13ភាគរយបើធៀបនឹងឆ្នាំ2016 ដែលមានត្រឹមតែ 4,672លានដុល្លារអាមេរិក។
ផលិតផលសំខាន់ៗដែលកម្ពុជានាំចេញទៅកាន់ទីផ្សារថៃ ភាគច្រើនជាទំនិញកសិផល ដូចជាពោត ដំឡូងមី សណ្តែកជាដើម រីឯទំនិញដែលប្រទេសថៃនាំចូលមកកម្ពុជាវិញ មានដូចជាគ្រឿងចក្រ យានយន្ត ឧបករណ៍អេឡិចត្រូនិក ប្រេងឥន្ធនៈ សម្ភារសំណង់ គ្រឿងឧបភោគបរិភោគ គ្រឿងសម្អាង សម្ភារប្រើប្រាស់ក្នុងផ្ទះជាដើម។
នាយករដ្ឋមន្ត្រីនៃប្រទេសទាំងពីរបានប្តេជ្ញាពង្រឹងកិច្ចសហប្រតិបត្តិការជាមួយគ្នាលើវិស័យសេដ្ឋកិច្ច ពាណិជ្ជកម្ម និងវិយោគដែលធ្វើយ៉ាងណាឱ្យទំហំពាណិជ្ជកម្មរវាងប្រទេសទាំងពីរមានសម្ទុះកើនឡើងទៅតាមអ្វីដែលភាគីទាំងសងខាងបានកំណត់ទុក គឺចំនួន 15ពាន់លានដុល្លារអាមេរិកនៅប៉ុន្មានឆ្នាំខាងមុខ៕