តម្រូវការស៊ីម៉ង់ត៍សម្រាប់ផ្គត់ផ្គង់ និងបំពេញក្នុងវិស័យសំណង់ក្នុងប្រទេសកម្ពុជាបានកើនឡើងយ៉ាងខ្លាំង ខណៈវិស័យនេះកំពុងរីកធំធាត់ឡើងវិញ បន្ទាប់ពីជាប់គាំងនៅឆ្នាំ2009 ដោយសារវិបត្តិសេដ្ឋកិច្ចសកលរួចមក។
បច្ចុប្បន្ននេះ កម្ពុជាមានក្រុមហ៊ុនដែលដំណើរការរោងចក្រផលិតស៊ីម៉ង់ត៍ចំនួនពីររួចមកហើយនៅខេត្តកំពត គឺ ក្រុមហ៊ុនស៊ីម៉ង់ត៍កម្ពុជាចក្រីទីង(Cambodia Chakrey Ting Cement Co., Ltd)ដែលជាក្រុមហ៊ុនចិន ដែលមានសមត្ថភាពផលិតបានប្រមាណ 2លានតោនក្នុងមួយឆ្នាំហើយ និងក្រុមហ៊ុនមួយទៀត គឺក្រុមហ៊ុន kampot Cementដែលដំណើរការរោងចក្រនៅខេត្តកំពតដែរ យីហោ ខេស៊ីម៉ង់ត៍ បច្ចុប្បន្ននេះកំពុងដំណើរការផលិតស៊ីម៉ង់ត៍បានជិត 2លានតោនដែលមានខ្សែចង្វាក់ផលិតកម្មពីរ គឺខ្សែទីមួយមានសមត្ថភាពផលិតបាន 2,800តោនក្នុងមួយថ្ងៃ និងខ្សែទីពីរមានសមត្ថភាពផលិតបាន 2,500តោនក្នុងមួយថ្ងៃ។
ថ្មីៗនេះក៏មានរោងចក្រស៊ីម៉ង់ត៍ថ្មីមួយទៀតដែលទើបនឹងសម្ពោធដាក់ឱ្យដំណើរការផលិតស៊ីម៉ង់ត៍កាលពីពេលថ្មីៗនេះ ដើម្បីបំពេញតម្រូវការទីផ្សារក្នុងស្រុកដែលមានកំណើនជាបន្តបន្ទាប់ក្នុងវិស័យសំណង់ដែរ។
រោងចក្រផលិតស៊ីម៉ង់ត៍ថ្មីនេះឈ្មោះថា ជីបម៉ុង អុិនស៊ី ស៊ីមេន ខបភើរេសិន ដែលកើតចេញពីការវិនិយោគរួមគ្នារវាងក្រុមហ៊ុន ជីបម៉ុង និងក្រុមហ៊ុន ថៃ ស្យ៉ាម ស៊ីធី ស៊ីមេន ក្នុងទឹកប្រាក់ 262លានដុល្លារដែលមានសមត្ថភាពផលិតស៊ីម៉ង់ត៍បានរហូតដល់ទៅ 5,000តោនក្នុងមួយថ្ងៃ ឬប្រមាណ 1.7លានតោនក្នុងមួយឆ្នាំ។
សមត្ថភាពផលិតស៊ីម៉ង់ត៍របស់ក្រុមហ៊ុន ជីបម៉ុង អុិនស៊ី ស៊ីមេន ខបភើរេសិន នាពេលនេះបានធ្វើឱ្យកម្លាំងផលិតស៊ីម៉ង់ត៍ក្នុងស្រុកកើនឡើងយ៉ាងហោចណាស់ក៏ដល់ 5,634,500តោនដែរក្នុងមួយឆ្នាំចេញពីទីតាំងខេត្តកំពតតែមួយ ដោយមិនរាប់បញ្ចូលរោងចក្រស៊ីម៉ង់ត៍ដែលសាងសង់ឡើងក្នុងទឹកដីខេត្តបាត់ដំបង ដែលវិនិយោគដោយក្រុមហ៊ុនមកពីប្រទេសចិននោះទេ។
កាលពីឆ្នាំ2011 កម្ពុជានាំចូលស៊ីម៉ង់ត៍ 816,000តោនពីប្រទេសថៃ វៀតណាម និងប្រទេសចិនហើយការនាំចូលបានកើនឡើងជាលំដាប់ ខណៈតម្រូវការបានកើនឡើងច្រើន ស្របពេលវិនិយោគិនបរទេស និងក្នុងស្រុកបានបោះទុនយ៉ាងច្រើនទៅលើវិស័យសំណង់។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានបង្ហាញឱ្យដឹងថា នៅឆ្នាំ2007 វិស័យសំណង់បានហក់ឡើងដល់ចំណុចខ្ពស់បំផុតដែលមិនធ្លាប់មាន គឺទទួលបានទុនវិនិយោគដល់ទៅ3,200លានដុល្លារអាមេរិក ហើយនៅឆ្នាំ2008ទទួលបានការវិនិយោគសរុបជាង 3,100លានដុល្លារចំពេលមានវិបត្តិសេដ្ឋកិច្ចសកលធ្វើដែលឱ្យនិន្នាការវិស័យសំណង់មានការធ្លាក់ចុះជាបន្តបន្ទាប់។
ការផ្តល់ឥណទានរបស់គ្រឹះស្ថានធនាគារទៅឱ្យវិស័យសំណង់ និងអចលនទ្រព្យនៅកម្ពុជាគិតត្រឹមឆ្នាំ2017 មានទំហំទឹកប្រាក់សរុបប្រមាណ 3.91ពាន់លានដុល្លារអាមេរិក ដែលស្មើនឹងប្រមាណ 24,28ភាគរយនៃចំនួនឥណទានសរុប។ នេះបើយោងតាមរបាយការណ៍ធនាគារជាតិនៃកម្ពុជា។
របាយការណ៍ដដែលនោះបានបង្ហាញថា ការផ្តល់ឥណទានផ្នែកសំណង់មានទំហំទឹកប្រាក់ប្រមាណ 1,52ពាន់លានដុល្លារ ការផ្តល់ឥណទានផ្នែកទិញផ្ទះជាកម្មសិទ្ធិផ្ទាល់ខ្លួន មានតម្លៃទឹកប្រាក់ប្រមាណ 1,48ពាន់លានដុល្លារអាមេរិក និងការផ្តល់ឥណទានផ្នែកការជួញដូរអចលនទ្រព្យមានតម្លៃទឹកប្រាក់ប្រមាណ 917លានដុល្លារអាមេរិក៕
