នាពេលបច្ចុប្បន្ននេះ អាជីវកម្មជាច្រើនបាន និងកំពុងបើកឡើងដំណាលគ្នា ខណៈអាជីវកម្មខ្លះអាចឈរជើងក្នុងទីផ្សារបានរហូតដល់ទៅរាប់ឆ្នាំ តែអាជីវកម្មខ្លះទៀតបែជាត្រូវបិទទៅវិញក្នុងរយៈពេលយ៉ាងខ្លី ដោយក្នុងនោះកត្តាធនធានមនុស្ស គឺជារឿងសំខាន់មួយដែលជាបច្ច័យធំមួយដែរក្នុងបញ្ហាទាំងអស់នេះ។
ពាក់ព័ន្ធនឹងបញ្ហានេះ លោក អឿ គីមលីវ័ន្ត នាយកគ្រប់គ្រងទូទៅ នៃក្រុមហ៊ុនធនធានមនុស្ស First Idea Consulting បានលើកឡើងថា ក្រុមហ៊ុនទាំងអស់សុទ្ធតែយកចិត្តទុកដាក់ និងមានការកង្វល់ពីបញ្ហាធនធានមនុស្សគ្រាន់តែក្រុមហ៊ុនថ្មីគាត់ត្រូវយកចិត្តទុកដាក់ខ្លាំងជាងគេ ព្រោះគាត់ស្ថិតក្នុងដំណាក់កាលចាប់ផ្ដើមដែល មានការលំបាក និងត្រូវធ្វើរឿងជាច្រើនទៀត។ សម្រាប់ដំណាក់កាលនេះ ម្ចាស់អាជីវកម្មត្រូវជ្រើសរើសយកបុគ្គលិកដែលជាមនុស្សយកចិត្តទុកដាក់ខ្លាំងក្នុងការងារ និងលះបង់ច្រើនបន្តិច ព្រោះថា ស្ថិតក្នុងដំណាក់កាលចាប់ផ្ដើម
អាជីវកម្មថ្មីដែលសកម្មភាព និងការដំណើរការក្រុមហ៊ុនទាំងមូលមិនទាន់ដើរបានល្អខ្លាំងនៅឡើយ ហេតុនេះបុគ្គលិកដែលអាចរួមដំណើរទៅជាមួយគ្នាបាន គឺចាំបាច់ត្រូវតែជាមនុស្សដែលមានការលះបង់ខ្ពស់ ហើយមានចិត្តអំណត់ ជាមួយនឹងការយកចិត្តទុកដាក់ដើម្បីរួមគ្នាសម្រេចជោគវាសនាក្រុមហ៊ុន។
លោក អឿ គីមលីវ័ន្ត បាននិយាយថា ៖ “ក្រុមហ៊ុនថ្មីៗអាចមានការលំបាកបន្តិចក្នុងការជ្រើសរើសបុគ្គលិក ព្រោះក្រុមហ៊ុនដែលមិនទាន់មានកេរ្តិ៍ឈ្មោះល្បី មិនសូវមានបេក្ខជនចាប់អារម្មណ៍ដាក់ពាក្យនោះទេ ហេតុនេះអ្វីដែលម្ចាស់អាជីវកម្មត្រូវធ្វើ គឺព្យាយាមគ្រប់លទ្ធភាពដើម្បីបង្ហាញពីផលប្រយោជន៍ដែលក្រុមហ៊ុននឹងផ្តល់ជូនបុគ្គលិក រួមជាមួយនឹងការបង្ហាញពីឱកាសសម្រាប់ភាពលូតលាស់ដល់ពួកគេ។
អ្នកគ្រប់គ្រងក្រុមហ៊ុនធនធានមនុស្សខាងលើបានលើកឡើងផងដែរថា ការបង្ហាញពីឱកាសអភិវឌ្ឍន៍ គឺជារឿងសំខាន់មួយដែលក្រុមហ៊ុនទើបបើកថ្មីត្រូវយកចិត្តទុកដាក់ខ្លាំង ព្រោះគោលបំណងរបស់បុគ្គលិកក្នុងការធ្វើការងារនៅក្នុងក្រុមហ៊ុនថ្មីៗ គឺភាគច្រើនគាត់ចង់រៀនសូត្រ និងអភិវឌ្ឍខ្លួនទៅជាមួយស្ថាប័នដើម្បីទទួលបានឱកាសល្អនៅថ្ងៃអនាគត។ ម្យ៉ាងវិញទៀត ម្ចាស់ក្រុមហ៊ុនដែលទើបនឹងបើកថ្មីក៏គួរតែផ្តល់តម្លៃចម្បង និងបញ្ជាក់ពីការទទួលខុសត្រូវ និងអត្តចរិតប្រកបដោយភាពវិជ្ជមានរបស់បុគ្គលិកផងដែរ ព្រោះថា ចំណុចនេះសំខាន់ជាងជំនាញទៅទៀត។ ជាធម្មតា ជំនាញ គឺយើងអាចបណ្តុះបណ្តាលបាន តែសម្រាប់អត្តចរិត និងការទទួលខុសត្រូវគឺជារឿងដែលមិនអាចមើលរំលងបានឡើយ។
ស្របជាមួយគ្នានេះដែរ លោក ស៊ិន បញ្ញាវុឌ្ឍីសាស្ត្រាចារ្យផ្នែកគ្រប់គ្រងបានលើកឡើងថា សម្រាប់អាជីវកម្មបើកថ្មីៗ គួរជ្រើសរើសយកបុគ្គលិកដែលមានឆន្ទៈចង់ជួយ ច្រើនជាងបុគ្គលិកដែលបម្រើការងារបែបធម្មតា ព្រោះថា អាជីវកម្មថ្មីជាអាជីវកម្មដែលទាមទារឱ្យមានការដោះស្រាយបញ្ហាច្រើន ហើយពេលខ្លះទាំងអ្នកគ្រប់គ្រង និងបុគ្គលិកក៏ហត់នឿយច្រើនជាងអាជីវកម្មដែលគេបើកដំណើរការបានយូរហើយដែរ ហេតុនេះបុគ្គលិកម្នាក់ៗចាំបាច់ត្រូវតែយល់ពីស្ថានភាពអាជីវកម្មដែលទើបនឹងបង្កើតថ្មីនេះឱ្យបានច្បាស់ទើបមិនមានបញ្ហា។ ម្យ៉ាងវិញទៀត ប្រសិនបើបុគ្គលិកទូទៅដែលដាក់ពាក្យដើម្បីឱ្យតែមានការងារធ្វើ ឬជាអ្នកដែលដាក់ពាក្យដោយសម្លឹងឃើញតែផលប្រយោជន៍ គាត់អាចនឹងមានការនឿយហត់នៅពេលដែលគាត់ត្រូវធ្វើការងារច្រើនជាងគេ តែប្រាក់ខែទទួលបានដូចគេដែរនោះ។
លោកសាស្ត្រាចារ្យ ស៊ិន បញ្ញាវុឌ្ឍី បាននិយាយថា ៖ “បុគ្គលិកដែលមានភាពឆ្លាតវៃ មានជំនាញខ្ពស់ តែបែរជាមកចាប់យកឱកាសធ្វើការងារក្នុងក្រុមហ៊ុនទើបបើកថ្មីណាមួយដែលគេទុកចិត្ត ក៏អាចជាជម្រើសល្អមួយដែរ ព្រោះថា ប្រសិនបើពួកគេជួយឱ្យស្ថាប័ននោះរីកចម្រើនទៅមុខបានដោយជោគជ័យនោះ គេក៏នឹងក្លាយជាផ្នែកសំខាន់មួយនៅក្នុងស្ថាប័ននោះ។
លោកសាស្ត្រាចារ្យបានលើកឡើងផងដែរថាក្រៅពីនេះក្រុមហ៊ុនដែលទើបនឹងបង្កើតថ្មី ជាក្រុមហ៊ុនដែលយើងជាបុគ្គលិកអាចមានឱកាសអភិវឌ្ឍខ្លួនបានលឿន ព្រោះក្រុមហ៊ុនថ្មីនេះមិនទាន់ឆ្អែតលើការរីកចម្រើនដូចក្រុមហ៊ុនបើកមកយូរឆ្នាំហើយនោះទេ ហេតុនេះបុគ្គលិកខ្លាំងៗមួយចំនួនអាចនឹងអភិវឌ្ឍខ្លួនជាមួយនឹងស្ថានភាពជាក់ស្តែងរបស់ក្រុមហ៊ុនដែរ។ លើសពីនេះទៅទៀតសម្រាប់អ្នកគ្រប់គ្រង ឬម្ចាស់អាជីវកម្មវិញ ក៏ទាមទារឱ្យមានវិធីបញ្ចុះបញ្ចូលបុគ្គលិកស្នូល ឬបុគ្គលិកដែលមានជំនាញខ្លាំង មានបទពិសោធយូរឆ្នាំ ដើម្បីរួមចំណែកអភិវឌ្ឍក្រុមហ៊ុនឱ្យឆ្ពោះទៅរកភាពរីកចម្រើនខ្លាំងដូចគ្នាដែរ៕