ពោតបារាំង គឺជាបន្លែប្រភេទថ្មីដែលកសិករទើបចាប់ផ្តើមដាំកាលពីប៉ុន្មានឆ្នាំកន្លងទៅនេះ ហើយមានការគាំទ្រកាន់តែច្រើនឡើងៗនៅលើទីផ្សារ ដោយសារវាអាចច្នៃធ្វើម្ហូបបានច្រើន ប្រភេទ ដូចជាធ្វើអន្លក់ ឆា អាំងជ្រលក់ញ៉ាំផ្ទាប់ជាមួយសាច់អាំងក៏បាន។
អ្នកស្រី ស្រីម៉ៅ កសិករនៅភូមិកោះរំដួល ឃុំរកាខ្ពស់ ស្រុកស្អាង ខេត្តកណ្តាល បានប្រាប់ឱ្យដឹងថា អ្នកស្រីបានដាំពោតបារាំងនេះ 2ឆ្នាំមកហើយ ដោយសង្កេតឃើញថាមានការពេញនិយមកាន់តែច្រើន ហើយឆ្នាំនេះគឺបានថ្លៃជាងកាលពីឆ្នាំទៅ ដោយកាលពីដើមដៃលក់បាន1គីឡូក្រាមពី5,000 ទៅ7,000រៀល ប៉ុន្តែដល់ពាក់កណ្តាលដៃនេះរាងធ្លាក់ថ្លៃបន្តិចនៅសល់ជាង3,000រៀលប៉ុណ្ណោះ ប៉ុន្តែទោះជាយ៉ាងនេះក៏ដោយ ក៏វាបានថ្លៃល្អជាងឆ្នាំមុនដែលលក់បានតម្លៃតែជាង 2,000រៀលប៉ុណ្ណោះក្នុងមួយគីឡូក្រាម។
កសិករដដែលបានបន្តថា គ្រួសារគាត់បានដាំពោតបារាំងលើផ្ទៃដីជាង 3000ម៉ែត្រការ៉េ ហើយក្នុង1ថ្ងៃអាចបេះលក់បានពី20 ទៅ30គីឡូក្រាម ហើយមិនបាច់ដឹកយកទៅផ្សារនោះទេ គឺមានម៉ូយមកចាំទទួលទិញដល់ចម្ការតែម្តង មានប៉ុន្មានក៏មិនបារម្ភខ្លាចថានៅសល់ដែរ។ ចំណែកលោក ប្រុញ សុខនី ជាកសិករ និងជាឈ្មួញកណ្ដាលផងនោះបានឱ្យដឹងថា ដោយសារឃើញដំណាំនេះកំពុងមានការគាំទ្រខ្លាំងនៅលើទីផ្សារ មានម៉ូយកុម្ម៉ង់ទិញច្រើននោះ គ្រួសារគាត់ក៏បានសម្រេចចិត្តដាំពោតបារាំងនេះដែរ។ លោកបន្តថា ឆ្នាំនេះតម្លៃពោតបារាំងបានថ្លៃជាងឆ្នាំមុនដោយកាលពីដំបូងដៃលក់បោះដុំបានពី5,000 ទៅ7,000រៀលក្នុង1គីឡូក្រាម ហើយឥឡូវទោះបីចុះថ្លៃបន្តិចក៏ដោយ ក៏នៅតែបានជាង3,000រៀលដែរ ខុសពីឆ្នាំមុនដែលដើមដៃបានថ្លៃបំផុតត្រឹមតែជាង2,000រៀលប៉ុណ្ណោះ។
លោកក៏បានឱ្យដឹងដែរថា ក្នុងមួយថ្ងៃគិតជាមធ្យមទាំងបេះរបស់ខ្លួនឯង និងប្រមូលទិញពីកសិករក្នុងភូមិបានពី500គីឡូក្រាម ទៅ1តោនដែរ ដោយដឹកយកទៅលក់នៅផ្សារនាគមាសដែលអាចចំណេញបានពី500 ទៅ1,000រៀលដែរក្នុង1គីឡូក្រាម។
លោកបានបន្ថែមថា ពោតបារាំងគឺត្រូវការមើលថែទាំច្រើន ពិសេសគឺសត្វល្អិតចង្រៃតែម្តង ហើយក្នុងនាមជាកសិករដែរនោះ លោកក៏សូមអំពាវនាវដល់ស្ថាប័នពាក់ព័ន្ធមេត្តាជួយទប់ស្កាត់កុំឱ្យឈ្មួញដំឡើងថ្លៃជី និងថ្នាំសម្លាប់សត្វល្អិត។
ប្រធានមន្ទីរកសិកម្មរុក្ខាប្រមាញ់ និងនេសាទខេត្តកណ្តាល បានមានប្រសាសន៍ថា ទូទាំងខេត្តមានផ្ទៃដីដាំបន្លែចម្រុះចំនួន 8,800ហិកតា និងអាចផលិតបានប្រមាណ 145តោនក្នុង1ថ្ងៃ ហើយស្អាងជាស្រុកមួយដែលផលិតបន្លែបានច្រើនជាងគេ។
ប៉ុន្តែទោះបីជាយើងអាចផលិតបានប៉ុនហ្នឹងក្តី ក៏នៅតែមិនអាចផ្គត់ផ្គង់គ្រប់គ្រាន់ដែរ ពោលគឺក្នុងមួយឆ្នាំយើងមានការខ្វះខាត និងនាំចូលពីប្រទេសជិតខាងចំនួនច្រើនជាងហ្នឹងដល់ទៅ4 ទៅ6ដងឯណោះ ដូច្នេះកសិករគួរតែបង្កើនការដាំដុះឱ្យអស់លទ្ធភាព ដើម្បីបង្គ្រប់ការខ្វះខាត និងកាត់បន្ថយការនាំបន្លែចូល៕
