នាពេលថ្មីៗនេះ ទន្ទឹមនឹងសំណង់អគារ និងគម្រោងអភិវឌ្ឍន៍នានាដែលត្រូវបានបោះទុនវិនិយោគយ៉ាងច្រើនដោយវិនិយោគិនចិននោះ ក្រសួងទេសចរណ៍បានចេញរបាយការណ៍មួយបង្ហាញថា ចំនួនភ្ញៀវទេសចរចិនបានកើនឡើងយ៉ាងខ្លាំងនាប៉ុន្មានឆ្នាំចុងក្រោយនេះ។
រដ្ឋមន្ត្រីក្រសួងទេសចរណ៍ ឯកឧត្តម ថោង ខុន បានលើកឡើងថា ចំនួនភ្ញៀវទេសចរជាតិ និងអន្តរជាតិ កំពុងកើនឡើងជារៀងរាល់ឆ្នាំ ដោយនៅក្នុងឆ្នាំ2017 កន្លងមក កម្ពុជាទទួលបានភ្ញៀវទេសចរអន្តរជាតិចំនួន 5.6លាននាក់ គឺកើនឡើងប្រមាណ 12% បើប្រៀបធៀបនឹងឆ្នាំ 2016។ តាមការព្យាករ នៅឆ្នាំ2020 កម្ពុជានឹងទទួលបានភ្ញៀវទេសចរអន្តរជាតិយ៉ាងតិច 7លាននាក់ ក្នុងនោះតំបន់ឆ្នេរសមុទ្រនឹងទទួលបានប្រមាណ 2លាននាក់ ហើយភ្ញៀវទេសចរជាតិអាចនឹងមានបរិមាណដល់ 4លាននាក់។
សម្រាប់ខេត្តព្រះសីហនុវិញ នៅឆ្នាំ2017 ទទួលបានភ្ញៀវទេសចរជាតិជាង 1លាននាក់ និងភ្ញៀវទេសចរអន្តរជាតិប្រមាណ 47ម៉ឺននាក់។ ចំនួននេះត្រូវបានគេមើលឃើញថា មានការកើនឡើងចំនួន 16% ដែលក្នុងនោះមានភ្ញៀវទេសចរចិនមានចំនួន 12ម៉ឺននាក់ កើនឡើង 126%។ ផ្អែកលើទិន្នន័យនេះបង្ហាញឱ្យឃើញថា ភ្ញៀវទេសចរចិនស្ថិតក្នុងចំណាត់ថ្នាក់លេខ1 ក្នុងចំណោមភ្ញៀវទេសចរមកពីបណ្តាប្រទេសនានាដែលមកទស្សនាកម្ពុជា៕
