វិស័យមូលបត្រជាផ្នែកសំខាន់មួយក្នុងការជំរុញឱ្យមានសកម្មភាពសេដ្ឋកិច្ចរស់រវើកនៃអាជីវកម្មនៅក្នុងប្រទេស ហើយវិស័យនេះក៏ត្រូវបានគេមើលឃើញផងដែរថា មានសក្តានុពលក្នុងការអភិវឌ្ឍសង្គមឱ្យមានការរីកចម្រើនបានយ៉ាងឆាប់រហ័ស។
ថ្មីៗនេះ ធនាគារអភិវឌ្ឍន៍អាស៊ី (ADB) បានចេញផ្សាយសៀវភៅ “មគ្គុទ្ទេសក៍ស្តីពីសញ្ញាប័ណ្ណសម្រាប់ អាស៊ាន+3” (Asean +3 Bond Market Guide) ដែលឯកសារនេះមានសារៈសំខាន់ខ្លាំង និងផ្តោតខ្លាំងលើប្រទេសកម្ពុជា និងមីយ៉ាន់ម៉ា។ នៅក្នុងឯកសារនេះ គឺមានការបង្ហាញពីព័ត៌មានលម្អិតអំពីបរិយាកាសនៃការវិនិយោគ នីតិវិធីផ្លូវច្បាប់ និងឱកាសសម្រាប់ទីផ្សារសញ្ញាប័ណ្ណក្នុងប្រទេសទាំង2នេះ។
ទីផ្សារសញ្ញាប័ណ្ណ ឬហៅម្យ៉ាងទៀតថា មូលបត្របំណុល ជាកម្ចីរយៈពេលវែងដែលបានបោះផ្សាយក្នុងទម្រង់ជាមូលបត្រដោយក្រុមហ៊ុនសាជីវកម្ម រដ្ឋាភិបាល ឬភ្នាក់ងាររដ្ឋាភិបាល។ សញ្ញាប័ណ្ណ ជាកម្ចីដែលផ្តល់ដោយអ្នកកាន់កាប់សិទ្ធិសញ្ញាបណ្ណ ដែលអ្នកទាំងអស់នោះជាអ្នកទិញមូលបត្របំណុល ឬផ្តល់ប្រាក់កម្ចី ដល់ក្រុមហ៊ុនបោះផ្សាយសញ្ញាប័ណ្ណ។
បើតាមការចេញផ្សាយដោយធនាគារអភិវឌ្ឍន៍អាស៊ីបានបង្ហាញថា សៀវភៅនេះ គឺជាផ្នែកមួយនៃការបោះពុម្ពផ្សាយស្តីពីទីផ្សារសញ្ញាប័ណ្ណដែលប្រើរូបិយបណ្ណក្នុងស្រុកនៅតំបន់អាស៊ី ដើម្បីជួយដល់ស្ថាប័នដែលបោះផ្សាយសញ្ញាប័ណ្ណ អ្នកវិនិយោគ និងអន្តរការីឱ្យកាន់តែយល់ច្បាស់ពីស្ថានភាពអំណោយផលនៃប្រទេសនីមួយ។ លើសពីនេះទៅទៀត សៀវភៅ មគ្គុទ្ទេសក៏ស្តីពីសញ្ញាប័ណ្ណនេះ ក៏ជាផ្នែកមួយក្នុងការសម្រួល ក៏ដូចជាលើកទឹកចិត្តឱ្យមានសកម្មភាពកាន់តែខ្លាំងក្នុងទីផ្សារមូលបត្រនៅតំបន់អាស៊ីអាគ្នេយ៍ ដែលវាធ្លាប់បានបោះពុម្ពរួចមកហើយសម្រាប់ប្រទេសប្រ៊ុយណេ ប្រទេសចិន ទីក្រុងហុងកុង ប្រទេសឥណ្ឌូនេស៊ី ជប៉ុន ឡាវ សិង្ហបុរី ថៃ និងហ្វីលីពីន។
ប្រធានសេដ្ឋវិទូរបស់ធនាគារអភិវឌ្ឍន៍អាស៊ី លោក Yasuyki Sawada បានថ្លែងថា ទីផ្សារសញ្ញាប័ណ្ណនៅកម្ពុជា និងមីយ៉ាន់ម៉ា កំពុងស្ថិតក្នុងដំណាក់កាលទើបនឹងអភិវឌ្ឍន៍នៅឡើយ តែទីផ្សារនៅក្នុងប្រទេសទាំង2នេះ គឺកំពុងមានការកើនឡើង ដែលវាជារឿងចាំបាច់ក្នុងការជំរុញឱ្យមានសកម្មភាពដើម្បីប្រមូលហិរញ្ញប្បទានសម្រាប់ការអភិវឌ្ឍហេដ្ឋារចនាសម្ព័ន្ធ ដើម្បីគាំទ្រដល់ការអភិវឌ្ឍផ្នែកធុរកិច្ចកាន់តែខ្លាំង។
លោក Yasuyki Sawada បាននិយាយថា៖ “ទីផ្សារសញ្ញាប័ណ្ណក្នុងស្រុកដែលមានភាពរឹងមាំ មានតួនាទីសំខាន់សម្រាប់ជំរុញកំណើន និងការអភិវឌ្ឍប្រទេស។
គួរបញ្ជាក់ផងដែរថា ទីផ្សារសញ្ញាប័ណ្ណអាស៊ីបានពង្រីកខ្លួនយ៉ាងលឿន ដែលរហូតមកដល់ពេលនេះ ទីផ្សារសញ្ញាប័ណ្ណនៅអាស៊ីបូកចិន និងសាធារណរដ្ឋកូរ៉េ បានកើនឡើងពី 2.5ទ្រីលានដុល្លារ ក្នុងឆ្នាំ 2015 ដល់ 11.6ទ្រីលានដុល្លារនៅចុងខែកញ្ញាឆ្នាំ2017កន្លងមកនេះ។ ស្របពេលជាមួយគ្នានេះដែរ ធនាគារអភិវឌ្ឍន៍អាស៊ី បានព្យាករថា ការអភិវឌ្ឍហេដ្ឋារចនាសម្ព័ន្ធក្នុងទ្រង់ទ្រាយធំនៅតំបន់នេះត្រូវការថវិកាជាង 1.7ទ្រីលានដុល្លារ រហូតដល់ឆ្នាំ2030 ហើយការជ្រើសរើសមូលបត្របំណុល ឬសញ្ញាប័ណ្ណ បានក្លាយជារឿងមួយដែលក្រុមហ៊ុននានាចាប់អារម្មណ៍ខ្លាំង ជាពិសេសគឺសម្រាប់វិនិយោគិនដែលជាប់បំណុលក្នុងរយៈពេលវែងដូចជា ក្រុមហ៊ុនធានារ៉ាប់រង និងស្ថាប័នមូលធននិវត្តន៍ជាដើម៕