គិតមកទល់បច្ចុប្បន្ន យ៉ាងហោចណាស់មានប្រជាជនមិនតិចជាង 5លាននាក់ទេដែលជំពាក់បំណុលធនាគារ ដែលភាគច្រើនគឺយកប្រាក់ទៅប្រកបរបររកស៊ីដើម្បីរកប្រាក់ចំណេញ ហើយមួយភាគទៀតយកទៅទិញដី ទិញផ្ទះ ទិញរថយន្ត ឬសម្ភារប្រើប្រាស់ផ្សេងៗទៀត តែពេលខ្លះភាគីធនាគារ ឬមីក្រូហិរញ្ញវត្ថុក៏ជួបហានិភ័យខ្លះដែរ ដោយអតិថិជនបង់ត្រឡប់មកវិញយឺតពេល និងមួយចំនួនតូចមិនបង់តែម្ដងក៏មានដែរ។ ដូច្នេះសួរថា តើការបង់សងត្រឡប់ទៅធនាគារយឺតពេល ឬលែងបង់ខណៈបំណុលសងមិនទាន់អស់នោះ តើវាផ្តល់លទ្ធផលអាក្រក់ អ្វីខ្លះត្រឡប់មកសាមីខ្លួនអតិថិជនវិញ?។
មន្ត្រីឥណទានជនបទម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះបានលើកឡើងថាកន្លងមកខ្លួនក៏ធ្លាប់ជួបអតិថិជនដែលមិនល្អដែរមានប្រមាណជា 2% ទៅ3%នៃអតិថិជនសរុប។ ជួនកាលអតិថិជនមានលទ្ធភាពដែរ តែគេចវេះមិនព្រមសង ហើយជួនកាលទៀតអតិថិជនមិនមានលទ្ធភាពសងតែម្តង។ មិនមានលទ្ធភាពសងដោយសារតែពួកគេខ្ចីប្រាក់ពីធនាគារយកទៅរកស៊ី តែការប្រកបមុខរបររកស៊ីនោះមិនទទួលបានជោគជ័យ ខាតទាំងដើមខាតទាំងចុង រួចក៏លែងមានលទ្ធភាពបង់ធនាគារតែម្តង។ ជាឧទាហរណ៍កសិករជនបទមួយចំនួនតូច ដល់ពេលដើមរដូវប្រកបរបរកសិកម្ម ពួកគាត់មិនមានលទ្ធភាព ក៏ខ្ចីប្រាក់ពីធនាគារមកធ្វើស្រែចម្ការ។ ដល់ពេលបានផល លក់មិនចេញ ធ្លាក់ថ្លៃ ឬខ្លះទៀតធ្វើដំណាំមិនបានផលល្អ ច្បាស់ណាស់ពួកគាត់នឹងជួបហានិភ័យក្នុងការរកប្រាក់សងត្រឡប់មកធនាគារមិនខាន។
មន្ត្រីឥណទានខាងលើបន្តថា នៅពេលអតិថិជនគេចវេះគ្មានដំណោះស្រាយនោះ គឺគ្មានអ្វីក្រៅពីអនុវត្តវិធានការតាមផ្លូវច្បាប់នោះទេ។ ដូចធ្លាប់បានដឹងកន្លងមកហើយថា ជារឿយៗនៅពេលដែលមានការគេចវេះនោះ ភាគីធនាគារនឹងប្តឹងទៅតុលាការដើម្បីអនុវត្តដីការឹបអូសទ្រព្យសម្បត្តិ ផ្ទះ ឬដីធ្លីជាដើម ដើម្បីយកមកលក់ឡៃឡុងសងបំណុលធនាគារ និងនៅសល់ប៉ុន្មានតុលាការប្រគល់ឱ្យទៅម្ចាស់ទ្រព្យវិញ។ ប៉ុន្តែសម្រាប់អតិថិជនដែលមិនមានលទ្ធភាពសង ខាងធនាគារ ឬគ្រឹះស្ថានមីក្រូហិរញ្ញវត្ថុអាចពន្យារពេលវេលាសមរម្យណាមួយ ដោយទុកឱកាសឱ្យរកប្រាក់មកសងធនាគារ ដូចជារង់ចាំដល់ពេលលក់ទិន្នផលកសិកម្មនៅឆ្នាំក្រោយឬគាត់ចេញទៅធ្វើការងារផ្សេងៗដើម្បីយកប្រាក់មកបង់ធនាគារជាដើម។ ផ្ទុយទៅវិញប្រសិនបើអតិថិជនមានមុខរបរច្បាស់លាស់ និងសងប្រាក់ទាន់ពេលមកធនាគារ ឬសាងកេរ្ត៍ឈ្មោះជាមួយធនាគារបានល្អ ខាងធនាគារនឹងពិចារណាផ្តល់ជូនកម្ចីបន្ត បើសិនមានតម្រូវការខ្ចីពេលក្រោយៗទៀត។
ទាក់ទងនឹងបញ្ហានេះលោក អឿ សុធារ័ត្ន ប្រធានអភិវឌ្ឍន៍ពាណិជ្ជកម្មនៃការិយាល័យឥណទានកម្ពុជា (CBC) បានមានប្រសាសន៍ថា មកទល់បច្ចុប្បន្នធនាគារ និងគ្រឹះស្ថានមីក្រូហិរញ្ញវត្ថុដែលជាសមាជិក (CBC) មានប្រមាណជា 140ស្ថាប័ន ហើយក្នុងនោះមានអតិថិជនជាង 5លាននាក់ដែលខ្ចីប្រាក់ពីស្ថាប័នទាំងពីរខាងលើចាប់តាំងពីការិយាល័យឥណទានបានបង្កើតមកនៅឆ្នាំ2012។ យ៉ាងណាក៏ដោយ ចំនួនអតិថិជនជាង 5លាននាក់ដែលបានជាប់ជំពាក់ប្រាក់ធនាគារនេះ មានជាង 3លាននាក់បានសងប្រាក់មកធនាគារវិញរួចហើយ នៅសល់តែប្រហែល 2លាននាក់ប៉ុណ្ណោះ។
លោកថា រាល់ពេលអតិថិជនខ្ចីប្រាក់ពីធនាគារ ឬគ្រឹះស្ថានមីក្រូហិរញ្ញវត្ថុ CBC តែងមានការកត់ត្រាជាប្រចាំ ដែលរបាយការណ៍នោះត្រូវបានផ្តល់ឱ្យមកពីធនាគារ ឬគ្រឹះស្ថានមីក្រូហិរញ្ញវត្ថុជារៀងរាល់ខែបន្ទាប់ពីចាប់ផ្តើមផ្ដល់កម្ចី ដើម្បីរក្សាទុកយ៉ាងមានសុវត្ថិភាព និងសម្ងាត់នៅCBC។ លុះពេលអតិថិជនត្រូវការខ្ចីប្រាក់លើកក្រោយ ខាងធនាគារ ឬគ្រឹះស្ថានមីក្រូហិរញ្ញវត្ថុនឹងមកស្នើសុំពិនិត្យមើលប្រវត្តិនៃការបង់ប្រាក់របស់អតិថិជន កាលពីពេលចាប់ផ្តើមខ្ចីកន្លងមក ហើយបើសិនជាអតិថិជនបង់ប្រាក់បានទាន់ពេលវេលា ភាគីធនាគារ ឬគ្រឹះស្ថានមីក្រូហិរញ្ញវត្ថុនឹងពិចារណាថា នឹងត្រូវផ្តល់ឱ្យបន្តទៀត ឬយ៉ាងណា? ប្រសិនបើអតិថិជនមានប្រវត្តិបង់មិនទាន់ពេល ឬមានការគេចវេះណាមួយនោះភាគីធនាគារ ឬគ្រឹះស្ថានមីក្រូហិរញ្ញវត្ថុនឹងពិចារណាថា តើត្រូវផ្ដល់ឱ្យបន្ត ឬមិនផ្ដល់ឱ្យបន្តទៀត។
ជាមួយគ្នានេះដែរ លោកជំទាវ ជា សិរី អគ្គនាយិកាបច្ចេកទេសធនាគារជាតិនៃកម្ពុជាបានមានប្រសាសន៍ថា ទោះជាអតិថិជនសងប្រាក់ត្រឡប់ទៅធនាគាររួច ឬនៅកំពុងបន្តសងក៏ដោយ ក៏ការកត់ត្រារបាយការណ៍ពីឥរិយាបថនៃការសងប្រាក់ត្រឡប់មកធនាគារវិញនៅតែរក្សាទុកយ៉ាងសុវត្ថិភាព និងសម្ងាត់នៅក្នុងការិយាល័យឥណទានកម្ពុជាទាំងអស់ដដែល មិនមែនអតិថិជនសងប្រាក់ហើយត្រូវបានលុបចោលវិញនោះទេ។ លោកជំទាវបានបញ្ជាក់ថា ការរក្សាទុកនេះគឺដើម្បីជួយសម្រួលទៅដល់ភាគីទាំងពីរ គឺភាគីអតិថិជន និងភាគីធនាគារ ឬគ្រឹះស្ថានមីក្រូហិរញ្ញវត្ថុ ដើម្បីឱ្យបានដឹងពីប្រវត្តិនៃការសងប្រាក់របស់អតិថិជនម្នាក់ៗសម្រាប់ជាការពិចារណាមុននឹងសម្រេចផ្តល់កម្ចីនៅពេលក្រោយៗទៀត ហើយបើសិនជាអតិថិជនមានប្រវត្តិសងត្រឡប់មកវិញល្អ នោះការខ្ចីប្រាក់ពីធនាគារឬគ្រឹះស្ថានមីក្រូហិរញ្ញវត្ថុលើកក្រោយអាចងាយស្រួល និងឆាប់បាន ដែលនេះជាអត្ថប្រយោជន៍នៃការបង់ប្រាក់ទាន់ពេលវេលា៕