ស្របពេលដែលកំណើនទេសចរទៅកម្សាន្តនៅខេត្តព្រះសីហនុមានចំនួនកាន់តែច្រើនឡើង ពីមួយឆ្នាំទៅមួយឆ្នាំនោះ បានធ្វើឱ្យគម្រោងអគារសំណង់ស្នាក់នៅផ្សេងៗចាប់ផ្តើមសាងសង់ នៅទីនោះកាន់តែច្រើនឡើងៗ ឧទាហរណ៍ ដូចជាគម្រោងខុនដូ Seagate Suite ដែលមានកម្ពស់ 43ជាន់ និងកំពុងចាប់ផ្តើមដំណើរការសាងសង់ជាដើម។
លោក សុត វីរៈ នាយកប្រតិបត្តិក្រុមហ៊ុន Huttons CPL មានប្រសាសន៍ថា កត្តាដែលធ្វើឱ្យគម្រោងខុនដូ Seagate Suite បោះទីតាំងនៅខេត្តព្រះសីហនុគឺដោយសារ៖ ទី1.ឆ្នេរសមុទ្រខេត្តព្រះសីហនុជាប់ចំណាត់ថ្នាក់លេខ13 ជាឆ្នេរសមុទ្រស្អាតជាងគេនៅលើពិភពលោកដែលផ្តល់ចំណាត់ថ្នាក់ដោយកាសែត New York Time ជាកត្តាធ្វើឱ្យភ្ញៀវទេសចរទាំងក្នុង និងក្រៅប្រទេសនាំគ្នាទៅទស្សនាកម្សាន្តនៅទីនោះកាន់តែច្រើនឡើងៗ ដែលក្នុងរយៈពេល 6ខែចុងក្រោយនាឆ្នាំ2017កន្លងទៅនេះទទួលបានភ្ញៀវទេសចរប្រមាណជា 625,000នាក់ ក្នុងនោះទេសចរចិនមានចំនួនច្រើនជាងគេ។ ទី2. ហេដ្ឋារចនាសម្ព័ន្ធត្រូវបានរដ្ឋាភិបាលរៀបចំរួចរាល់សម្រាប់ទទួលអ្នកវិនិយោគទាំងក្នុង និងក្រៅប្រទេស ជាពិសេសកំពង់សោមមានព្រលានយន្តហោះមួយក្នុងចំណោមព្រលានយន្តហោះ3 ដែលកំពុងដំណើរការនៅក្នុងព្រះរាជាណាចក្រកម្ពុជា និងពីរទៀតគឺព្រលានយន្តហោះអន្តរជាតិភ្នំពេញ និងព្រលានយន្តហោះខេត្តសៀមរាប។
ជាមួយគ្នានេះដែរ រដ្ឋាភិបាលបានត្រៀមសាងសង់ផ្លូវល្បឿនលឿនពីទីក្រុងភ្នំពេញទៅខេត្តព្រះសីហនុក្នុងរយៈចម្ងាយផ្លូវប្រមាណជា 190គីឡូម៉ែត្រដែលនឹងចំណាយពេលធ្វើដំណើរទៅ-មកប្រមាណតែ 2ម៉ោងប៉ុណ្ណោះ។ ទី3. ខេត្តព្រះសីហនុមានឧទ្យានជាតិ រាម ដែលជាកន្លែងពេញនិយមសម្រាប់ទាក់ទាញភ្ញៀវទេសចរឱ្យចូលមកទស្សនាកម្សាន្ត និងជាកន្លែងវិនិយោគដ៏ធំរបស់ចិន ដូចជាក្រុមហ៊ុនអចលនទ្រព្យ Prince Real Estate ដែលកំពុងវិនិយោគក្នុងទឹកប្រាក់ 1,000លានដុល្លារ ហើយលើសពីនេះទៀតខេត្តព្រះសីហនុជាទីតាំងដែលអាចសាងសង់កាស៊ីណូបាន ដែលនឹងធ្វើឱ្យទីនោះក្លាយទៅជាម៉ាកាវទី2 នាពេលអនាគតបាន។
គម្រោងខុនដូ Seagate Suite បានប្រើទុនជាង100លានដុល្លារ សម្រាប់ការសាងសង់ដែលមានកម្ពស់ 43ជាន់ មានចំនួន 1,118 units ដែលត្រូវបានបែងចែកជាទីតាំងផ្សេងៗគ្នា ដូចជាចាប់ជាន់ទី1 ដល់ជាន់ទី5 គឺជាកន្លែងចតរថយន្ត ចាប់ពីទី6 ទៅជាន់ទី7 បង្កើតជាផ្សារលក់ទំនិញផ្សេងៗ និងជាន់ទី8 គឺជាអាងហែលទឹកប្រវែង70ម៉ែត្រ និងមានបន្ទប់ស្ទីមសោណា និងកន្លែងហាត់ប្រាណផ្សេងៗទៀតផង។
ចាប់ពីជាន់ទី9 ដល់ទី15 គឺគម្រោងសណ្ឋាគារផ្កាយ5 ដែលគម្រោងនេះបើសិនជាអតិថិជនទិញហើយដាក់ជួលវិញ យើងនឹងមានការផ្តល់ជូននូវថ្លៃឈ្នួល8%ក្នុងមួយឆ្នាំនៃតម្លៃទិញសម្រាប់រយៈពេល10ឆ្នាំ។ ប៉ុន្តែសម្រាប់អ្នកទិញដើម្បីរស់នៅផ្ទាល់ខ្លួន គឺអាចយកពីជាន់ទី16 ទៅដល់ជាន់ទី20 ដែលមានតម្លៃល្អជាងខាងក្រោមប៉ុន្តែធានាជួលត្រឹមរយៈពេលតែ 2ឆ្នាំប៉ុណ្ណោះ។ សម្រាប់តម្លៃវិញក្នុងមួយ Unit គឺចាប់ពី 7ម៉ឺនដុល្លារឡើងទៅ ដោយអតិថិជនអាចបង់រំលស់រយៈពេល 3ឆ្នាំដោយមិនគិតការប្រាក់ទៀតផង។ តែបើទិញនៅពេលបច្ចុប្បន្ននេះវិញ ក្រុមហ៊ុននឹងបញ្ចុះតម្លៃជូន8% បើទិញចាប់ពី 2 Units ឡើងទៅបញ្ចុះជូន9% ហើយបើទិញ3 Units បញ្ចុះតម្លៃជូនដល់10%។
លោក សុត វីរៈ បានបញ្ជាក់ថា កាលពីពេលកន្លងទៅគម្រោងខុន បានដូសាងសង់ឡើងដើម្បីតម្រូវការសម្រាប់ជនបរទេសដែលមកស្នាក់នៅធ្វើការងារ និងវិនិយោគនៅក្នុងប្រទេសកម្ពុជាប៉ុណ្ណោះដោយសារតែជនបរទេសមិនមានសិទ្ធិទិញដីធ្លីធ្វើជាកម្មសិទ្ធឡើយ តែបច្ចុប្បន្ននេះជនបរទេសខ្លះបានទិញដីសម្រាប់ទុកលក់វិញដើម្បីរកប្រាក់ចំណេញ ចំណែកប្រជាជនខ្មែរយើងក៏ចាប់ផ្តើមមានទំនោរក្នុងការរស់នៅលើខុនដូជាបណ្តើរៗហើយដែរ ពិសេសទិញសម្រាប់ទៅស្នាក់នៅកម្សាន្តនាថ្ងៃឈប់សម្រាកពីការងារ៕
