ប៉ុន្មានឆ្នាំចុងក្រោយនេះ វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ត្រូវបានគេមើលឃើញថាជាផ្នែកមួយយ៉ាងសំខាន់ក្នុងការអភិវឌ្ឍសង្គម ព្រោះថា ចាប់ផ្តើមពីធនធានមនុស្សផ្នែក STEM យុវជនជំនាន់ថ្មីរបស់កម្ពុជានឹងក្លាយជាអ្នកដែលមានសមត្ថភាពខ្លាំង ដែលអាចឆ្លើយតបជាមួយនឹងតម្រូវការជាក់ស្តែងរបស់សង្គមលើគ្រប់វិស័យ។
ថ្មីៗនេះ អង្គការ STEM កម្ពុជាបានប្រកាសបើកការប្រកួតដណ្ដើមជើងឯកស្ទែម ដែលជាការប្រកួតល្បងប្រាជ្ញាពិសេសសម្រាប់សិស្សកំពុងសិក្សាថ្នាក់វិទ្យាល័យថ្នាក់ទី10 ថ្នាក់ទី11 និងថ្នាក់ទី12 និងសម្រាប់និស្សិតឆ្នាំទី1 នៅថ្ងៃទី1ដល់ថ្ងៃទី3 ខែមិនាឆ្នាំ2018 ខាងមុខនេះ នៅពហុកីឡដ្ឋានជាតិអូឡាំពិក។
លក្ខខណ្ឌនៃការប្រកួត គឺធ្វើឡើងជាក្រុម ដោយក្រុមនីមួយៗត្រូវមានសមាជិកចំនួន 3នាក់ ដោយក្នុងនោះត្រូវតែមាននារីម្នាក់។ សមាជិកក្នុងក្រុមទាំងអស់ចាំបាច់ត្រូវតែជានិស្សិតឆ្នាំទី1 ឬសិស្សកំពុងសិក្សានៅវិទ្យាល័យ។ សមាជិកក្នុងក្រុមទាំងអស់ចាំបាច់ត្រូវមានវត្តមានគ្រប់ការប្រកួត ហើយក្រុមនីមួយៗមិនអាចផ្លាស់ប្តូរសមាជិកបាននោះទេ។
វិញ្ញាសាដែលនឹងត្រូវប្រកួតរួមមាន វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ដែលការប្រកួតនឹងធ្វើជាការជម្រុះបន្តរហូតដល់វគ្គបញ្ចប់។ បេក្ខជនទាំងអស់ដែលគ្រប់លក្ខណៈសម្រាប់ការប្រកួត ឬអាណាព្យាបាលចង់ឱ្យកូនចូលរួមប្រកួតអាចដាក់ពាក្យទៅកាន់អង្គការ STEM កម្ពុជា ឱ្យបានមុនថ្ងៃទី20 ខែកុម្ភៈនេះ៕
