ដើម្បីដាក់ដំណើរការឱ្យបានទាន់ពេលវេលានៅមុនពេលចូលឆ្នាំខ្មែរខាងមុខ ក្រសួងសាធារណការបានពន្លឿនការសាងសង់ផ្លូវរថភ្លើងខ្នាតតូច ចូលទៅព្រលានយន្តហោះអន្តរជាតិភ្នំពេញបានប្រមាណជាជិត 40%ហើយ គិតមកទល់ថ្ងៃនេះ។
បើតាមការឱ្យដឹងពីមន្ត្រីក្រសួងសាធារណការ និងដឹកជញ្ជូនបានឱ្យដឹងថា គិតមកទល់ថ្ងៃទី5 ខែកុម្ភៈ ឆ្នាំ2018នេះ ការស្ថាបនាផ្លូវរថភ្លើងចូលព្រលានយន្តហោះអន្តរជាតិភ្នំពេញសម្រេចបានប្រមាណជា 500ម៉ែត្រក្នុងប្រវែងសរុប 1,300ម៉ែត្រហើយ។
រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា នៅមុនថ្ងៃចូលឆ្នាំខ្មែរឆ្នាំ2018ខាងមុខនេះ កម្ពុជានឹងដាក់ឱ្យដំណើរការផ្លូវរថភ្លើងដឹកអ្នកដំណើរពីស្ថានីយរថភ្លើងក្នុងរាជធានីភ្នំពេញឆ្ពោះទៅព្រលានយន្តហោះអន្តរជាតិភ្នំពេញជាផ្លូវការ។ ឯកឧត្តមបានបញ្ជាក់ថា រថភ្លើងខ្នាតតូចនេះមានចំនួន 3គ្រឿង ដែលមួយគ្រឿងអាចដឹកអ្នកដំណើរបានចំនួន 100នាក់ដោយនឹងដឹកជញ្ជូនអ្នកដំណើរឥតគិតថ្លៃរយៈពេល 3ខែ៕
