អ្នកគាំទ្ររបស់ក្រុម Manchester United បានឆ្លើយតបទៅនឹងការរិះគន់របស់លោក Jose Mourinho អំពីបរិយាកាសដ៏ស្ងាត់ស្ងៀមនៅឯកីឡដ្ឋាន Old Trafford។ លោក Mourinho បាននិយាយថា អ្នកគាំទ្ររបស់ក្រុម Man United មានភាពស្ងាត់ស្ងៀមអំឡុងពេលក្រុមរបស់ពួកគេដណ្តើមបានជ័យជម្នះក្នុងលទ្ធផល 2-0 លើក្រុម Huddersfield ក្នុងការប្រកួតក្របខ័ណ្ឌ Premier League កាលពីថ្ងៃសៅរ៍។
អ្នកចាត់ការទូទៅរបស់ក្រុម Man United រូបនេះ បានបន្តលើកឡើងពីកីឡដ្ឋាន Fratton Park របស់ក្លិប Portsmouth ជាគំរូនៃការមានបរិយាកាសដ៏ល្អមួយ។ ក្នុងសេចក្តីថ្លែងការណ៍មួយ ក្រុមអ្នកគាំទ្រដែលមានឈ្មោះថា Trust របស់ក្លិប Manchester United បានឲ្យដឹងថា៖ «យើងធ្វើការកត់សម្គាល់ទៅលើការបកស្រាយបន្ថែមទៀតរបស់អ្នកចាត់ការទូទៅរបស់យើងទាក់ទងនឹងបរិយាកាសមិនល្អនៅកីឡដ្ឋាន Old Trafford ក្រោយពីការប្រកួតលើទឹកដីខ្លួនឯងជាមួយនឹងក្រុម Huddersfield»។
សេចក្តីថ្លែងការណ៍នោះបានបន្ថែមទៀតថា៖ «បរិយាកាសស្ងាត់ស្ងៀមនោះមិនមែនមានន័យថា ត្រូវបានកំណត់ទុកនៅកីឡដ្ឋាន Old Trafford ឡើយ។ វាជាបញ្ហាមួយដែលជះឥទ្ធិពលលើក្លិបនានាទូទាំងប្រទេសនេះ។ វាមិនមែនជាបញ្ហាដ៏ជាក់លាក់មួយចំពោះអ្នកគាំទ្ររបស់ Manchester United ឡើយ ព្រោះថា ការគាំទ្ររបស់យើងតែងតែត្រូវបានទទួលស្គាល់ ដោយអ្នកគាំទ្រដែលស្មារតីយុត្តិធម៌ ក្រោមស្ថានភាពដ៏ល្អបំផុតក្នុងប្រទេសនេះ»៕
ប្រភពពី៖ Worldsoccertalk
