អាមេរិក៖ ក្រុមហ៊ុន Apple បានបង្ហាញរបាយការណ៍ប្រាក់ចំណូលប្រចាំត្រីមាសចុងក្រោយឆ្នាំ 2017 ដោយនៅក្នុងរបាយការណ៍នោះបានបង្ហាញឱ្យដឹងថា ការលក់ iPhone បានធ្លាក់ចុះមកនៅត្រឹម 77,3លានគ្រឿង ហើយបើធៀបនឹងត្រីមាសដូចគ្នាឆ្នាំមុន ឃើញថាធ្លាក់ចុះ 1,15ភាគរយ ប៉ុន្តែការធ្លាក់ចុះនេះមិនបានទាញឱ្យប្រាក់ចំណូល Apple ធ្លាក់ចុះនោះទេ។
សារព័ត៌មាន Phone Arena បានចេញផ្សាយនាថ្មីៗនេះថា ក្នុងរយៈពេល 3ខែចុងក្រោយឆ្នាំ 2017 ក្រុមហ៊ុន Apple ទទួលបានប្រាក់ចំណូលរហូតដល់ 88,3ពាន់លានដុល្លារអាមេរិក ដែលប្រាក់ចំណូលនេះខ្ពស់ជាងឆ្នាំមុន ដែលមានត្រឹមតែ 78,4ពាន់លានដុល្លារអាមេរិក ជាពិសេសនោះគឺ Apple បានបំបែកកំណត់ត្រានៃការព្យាករណ៍របស់ក្រុមអ្នកវិភាគដែលបានទាញថា Apple រកចំណូលបានត្រឹមតែ 84 ទៅ 87ពាន់លានដុល្លារអាមេរិកប៉ុណ្ណោះ។
ការលក់ iPhone ធ្លាក់ចុះនេះ ត្រូវបានក្រុមអ្នកវិភាគមើលឃើញថា បណ្ដាលមកពី iPhone X មានតម្លៃខ្ពស់ និងលក់បានចំនួនតិច ដែលជាហេតុធ្វើឱ្យតួលេខនៃការលក់ iPhone នៅត្រីមាសចុងឆ្នាំ 2017 ធ្លាក់ចុះ។
ក្រុមហ៊ុន Apple បានបង្ហាញពីក្ដីរំពឹងខ្ពស់ទៅលើ iPhone ជំនាន់ថ្មី ដោយបានបញ្ជាក់ថា iPhone ឆ្នាំ 2018 នឹងមាន 3ម៉ូដែល ហើយជាពិសេស ម៉ូដែលនីមួយ២ នឹងបំពាន់នូវបច្ចេកវិទ្យាសំខាន់ៗចុងក្រោយដូចគ្នាទៅនឹង iPhone X៕
