ខ្យងក្រហមដែលគេស្គាល់ថា មានប្រភពមកពីប្រទេសថៃនោះ កន្លងមកតែងមានការរអ៊ូរទាំពីកសិករជាច្រើនថា វាពូកែខាងបំផ្លាញផលដំណាំរបស់ពួកគាត់ខ្លាំងណាស់ ពិសេសដំណាំស្រូវតែម្តង ដែលមានការលំបាកក្នុងការទប់ស្កាត់យ៉ាងខ្លាំង។ ប៉ុន្តែបច្ចុប្បន្នខ្យងប្រភេទនេះត្រូវបានគេយកទៅកែច្នៃធ្វើជាជីធម្មជាតិដ៏មានប្រយោជន៍សម្រាប់កសិកម្ម និងសុខភាពយើងទាំងអស់គ្នា។
លោក ប៊ុន ចាន់តូនី ប្រធានការិយាល័យកសិកម្មស្រុកកៀនស្វាយ និងជាអ្នកផលិតជី អ៊ីអឹម (EM) ធម្មជាតិ មានប្រសាសន៍ថា លោកបានចេះជំនាញផលិតជីធម្មជាតិ EM និងថ្នាំបណ្តេញសត្វល្អិតនេះតាំងពីឆ្នាំ1994មកម្ល៉េះ ដោយបានសិក្សាពីអង្គការ អាយប៉ាក របស់ជប៉ុន។ ប៉ុន្តែទើបនឹងយកមកអនុវត្តសាកល្បងលើដំណាំំបានត្រឹមតែជាង10ឆ្នាំប៉ុណ្ណោះដែលដំបូងឡើយគឺបានធ្វើការសាកល្បងដោយខ្លួនឯងលើដំណាំស្រូវ បន្លែ និងប្រភេទដំណាំហូបផ្លែជាច្រើនទៀត ហើយក៏ឃើញថា ទទួលបានលទ្ធផលល្អ និងមានការគាំទ្រពីមន្ទីរកសិកម្មខេត្ត
កណ្តាលផងនោះ លោកក៏ចាប់ផ្តើមផលិតដើម្បីធ្វើអាជីវកម្ម និងបើកក្រុមហ៊ុនឡើងតែម្តងក្នុងរយៈពេលជាង1ឆ្នាំចុងក្រោយនេះ។
លោកក៏បានប្រាប់ឱ្យដឹងដែរថា ផលិតផលដែលលោកផលិតឡើង គឺមិនត្រឹមតែសម្រាប់ប្រើទៅលើតែដំណាំនោះទេ តែថែមទាំងអាចប្រើប្រាស់ទៅលើការចិញ្ចឹមសត្វគ្រប់ប្រភេទ និងប្រើសម្រាប់បំបាត់ក្លិនយ៉ាងមានប្រសិទ្ធភាពបានទៀតផង។ ផលិតផលដែលលោកផលិតឡើងនេះមាន 3ប្រភេទ រួមមានជីបំប៉នដែលអាចប្រើបានទាំងសត្វ និងរុក្ខជាតិ។ ទី2 ថ្នាំសម្រាប់បណ្តេញសត្វល្អិតចង្រៃ និងទី3 ជាប្រភេទជីដែលផលិតអំពីខ្យងមាសសម្រាប់បំប៉នឫស ដើម និងស្លឹក។
លោក ប៊ុន ចាន់តូនី ក៏បានបញ្ជាក់ប្រាប់ដែរថា ដំបូងឡើយ គឺពិតជាមានការលំបាកខ្លាំង ព្រោះថា កសិករមិនសូវជាឱ្យតម្លៃ និងគាំទ្រផលិតផលបែបធម្មជាតិប៉ុន្មានឡើយ ប៉ុន្តែដល់ពេលពួកគាត់ជួបបញ្ហាប្រឈម និងគ្មានជម្រើសទើបងាកមកសាកល្បងជីរបស់លោក។ បន្ទាប់មកឃើញថា ដំណាំលូតលាស់ល្អ បានផលច្រើន ហើយមិនប៉ះពាល់ដល់សុខភាពទៀតផង ទើបកសិករជាច្រើនបានផ្លាស់ប្តូរផ្នត់គំនិតដោយខ្លួនឯង ងាកមកប្រើជីក៏ដូចជាថ្នាំដែលផលិតតាមគោលការណ៍ធម្មជាតិនេះយ៉ាងផុលផុស។ ក្រៅពីនោះលោកក៏បានបង្រៀនដល់បណ្តាអង្គការ សមាគម និងប្រជាកសិករជាច្រើនវគ្គរួចមកហើយដែរ។
លោក លី ម៉ន កសិករនៅភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ និងលោក ឌី រ៉ា កសិករនៅភូមិកោះផុស ឃុំដីឥដ្ឋ ស្រុកកៀនស្វាយ បាននិយាយស្រដៀងគ្នាដែរថាដំបូងឡើយពួកគាត់មិនសូវមានជំនឿលើជីធម្មជាតិបែបនេះទេ ប៉ុន្តែដល់ពេលប្តូរមកប្រើជីធម្មជាតិបានមួយរយៈមកឃើញថា ល្អមែន ចំណាយប្រាក់ក៏តិចជាងជី និងថ្នាំពុលគីមី និងមិនប៉ះពាល់ដល់សុខភាពទៀតផង។ ដំណាំក៏ល្អ ទិន្នផលក៏ទទួលបានខ្ពស់ ហើយលក់បានថ្លៃជាងមុនទៀត ព្រោះដំណាំរបស់យើងដាំតាមគោលការណ៍ធម្មជាតិ ហើយក៏បានអំពាវនាវដល់កសិករដទៃទៀតគួរតែងាកមកប្រើប្រាស់ជី និងថ្នាំបណ្តេញសត្វល្អិតបែបធម្មជាតិនេះវិញដើម្បីលើកស្ទួយជីវភាពគ្រួសារ និងថែរក្សាសុខភាពរបស់មនុស្សយើង៕
