ដោយមើលឃើញពីវិស័យសំណង់ ជាពិសេសលំនៅឋាននៅកម្ពុជា ដែលភាគច្រើនសាងសង់ឡើងដោយផ្តោតលើអ្នកមានចំណូលខ្ពស់នោះ ក្រុមហ៊ុនសំណង់ដ៏ធំមួយរបស់ចិន បានគ្រោងចូលមកវិនិយោគលើវិស័យសំណង់លំនៅឋាននៅកម្ពុជាសម្រាប់លក់ជូនពលរដ្ឋដែលមានចំណូលមធ្យម និងទាប។
លោក Ghu Shan ប្រធានក្រុមហ៊ុន China Construction Development Corporation (CCDC) បានដឹកនាំប្រតិភូចូលជួបពិភាក្សាការងារជាមួយឯកឧត្តម ជា សុផារ៉ា ទេសរដ្ឋមន្ត្រី និងជារដ្ឋមន្ត្រីក្រសួងដែនដី នគរូបនីយកម្ម និងសំណង់កាលពីសប្តាហ៍មុននេះ ដោយបានលើកឡើងថា ដើម្បីចូលរួមក្នុងការអភិវឌ្ឍប្រទេសកម្ពុជា និងដើម្បីឆ្លើយតបទៅនឹងតម្រូវការជាក់ស្តែងរបស់កម្ពុជា ស្របពេលដែលកម្ពុជាកំពុងមានកំណើនសេដ្ឋកិច្ចខ្ពស់ ក្រុមហ៊ុនមានបំណងចង់ធ្វើការវិនិយោគលើវិស័យសំណង់នៅកម្ពុជានៅពេលឆាប់ៗខាងមុខ។
លោកបន្តថា CCDC គឺជាក្រុមហ៊ុនដែលមានជំនាញវិនិយោគលើវិស័យសំណង់ដូចជាព្រលានយន្តហោះ សំណង់អគារខ្ពស់ៗ ផ្សារទំនើប និងសំណង់លំនៅឋានមានតម្លៃសមរម្យជូនប្រជាជនដែលមានចំណូលទាប និងមធ្យម ជាដើម។ ក្នុងដំណើរទស្សនកិច្ចជាផ្លូវការមកកាន់ប្រទេសកម្ពុជានាពេលនេះ ក្រុមហ៊ុនមានបំណងសិក្សាស្វែងយល់ពីកាលានុវត្តភាពវិស័យសំណង់នៅកម្ពុជា ព្រមទាំងគោលនយោបាយ និងឯកសារគតិយុត្តនានាពាក់ព័ន្ធនឹងវិស័យសំណង់។
ជាមួយគ្នានេះ ប្រតិភូចិនក៏បានស្នើសុំស្វែងរកព័ត៌មានពាក់ព័ន្ធនឹងការសាងសង់លំនៅឋានមានតម្លៃសមរម្យដើម្បីសុំកិច្ចសហប្រតិបត្តិការធ្វើការវិនិយោគ និងចុះអនុស្សរណៈយោគយល់គ្នារវាងក្រសួងរៀបចំដែនដី នគរូបនីយកម្ម និងសំណង់ជាមួយក្រុមហ៊ុន CCDCផងដែរមុនឈានដល់ការសម្រេចសាងសង់សំណង់លំនៅឋានតម្លៃសមរម្យនេះ។
ឆ្លើយតបនឹងសំណើរបស់ប្រតិភូចិននៅពេលនោះ ឯកឧត្តម ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងដែនដី នគរូបនីយកម្ម និងសំណង់បានថ្លែងស្វាគមន៍ចំពោះក្រុមហ៊ុនដែលមានឆន្ទៈចង់វិនិយោគលើវិស័យលំនៅឋានតម្លៃសមរម្យនៅកម្ពុជាដើម្បីរួមចំណែកជាមួយរដ្ឋាភិបាលក្នុងការកាត់បន្ថយភាពក្រីក្រនៅកម្ពុជាបន្ថែមទៀត។ ជាមួយគ្នានេះដែរ ឯកឧត្តមបានស្នើឱ្យក្រុមហ៊ុនបើកការិយាល័យតំណាងរបស់ខ្លួនផ្ទាល់នៅកម្ពុជាដើម្បីធ្វើការគ្រប់គ្រង និងអនុវត្តផ្ទាល់ស្របទៅតាមច្បាប់នៅកម្ពុជាដើម្បីផ្តល់ទំនុកចិត្តទៅដល់អតិថិជនរបស់ខ្លួនកាន់តែខ្លាំងឡើង។
លោកស្រី ស៊ ធីតា អ្នកជំនាញអចលនទ្រព្យ និងជានាយិកាប្រតិបតិ្តក្រុមហ៊ុន Royal 5G មានប្រសាសន៍ថា សំណង់លំនៅឋានភាគច្រើននៅកម្ពុជា គឺផ្តោតទៅលើអ្នកមានចំណូលខ្ពស់ និងចំណូលធម្យម ដែលជាកត្តាលំបាកសម្រាប់ប្រជាជនដែលមានចំណូលទាប មិនមានលទ្ធភាពទិញផ្ទះរស់នៅផ្ទាល់ខ្លួន។ លោកស្រីបានបន្តថា បើសិនជាក្រុមហ៊ុនចិនមកសាងសង់លំនៅឋានបែបនេះ វានឹងជួយឱ្យពលរដ្ឋដែលមានចំណូលទាប អាចមានលទ្ធភាពទិញផ្ទះនៅដោយខ្លួនឯង លើសពីនេះទៀត វានឹងចូលរួមធ្វើឱ្យវិស័យសំណង់នៅកម្ពុជាកាន់តែរីកចម្រើនឡើង និងជួយដល់កំណើនសេដ្ឋកិច្ចកម្ពុជាទៀតផង។
គួរបញ្ជាក់ផងដែរថា ចិនជាប្រទេសដែលមានអ្នកវិនិយោគលើវិស័យសំណង់ច្រើនជាងគេនៅកម្ពុជាកាលពីឆ្នាំ2017 ដោយមានចំនួន 128គម្រោងក្នុងទំហំទឹកប្រាក់ប្រមាណជាង 2ពាន់លានដុល្លារអាមេរិក ក្នុងចំណោមទុនវិនិយោគលើវិស័យសំណង់សរុបក្នុងឆ្នាំ2017 មានទឹកប្រាក់ចំនួនជាង 6,400លានដុល្លារអាមេរិក។
យ៉ាងណាក៏ដោយ ការហូរចូលនៃការវិនិយោគ និងកំណើនតម្រូវការជាពិសេសប្រជាជនដែលមានចំណូលមធ្យមបានរួមចំណែកជំរុញឱ្យវិស័យនេះបន្តមានកំណើនខ្ពស់ ប៉ុន្តែក្នុងល្បឿនយឺតជាងមុន។ បើពិនិត្យមើលលើសូចនាករដែលបង្ហាញពីកំណើននៃវិស័យសំណង់ឃើញថា ការនាំចូលសម្ភារសំណង់នៅឆ្នាំ2017 មានការកើនឡើង 36% យឺតជាងឆ្នាំ2016 42% ដោយសារសំណង់ភាគច្រើនបានឈានដល់ការបញ្ចប់។ នេះបើតាមការអះអាង ពីអ្នកជំនាញផ្នែកសេដ្ឋកិច្ចប្រចាំប្រទេសកម្ពុជា៕
