នៅក្នុងពិភពលោកដែលកំពុងមានការរីកចម្រើនយ៉ាងខ្លាំងនេះ ការបណ្តុះបណ្តាលធនធានមនុស្សបានក្លាយជាប្រធានបទសំខាន់មួយក្នុងការអភិវឌ្ឍប្រទេសនីមួយ។ នៅក្នុងដំណើរនៃការអភិវឌ្ឍធនធានមនុស្សនេះ មានប្រទេសខ្លះកំពុងធ្វើកំណែទម្រង់ការសិក្សាតាមបែបប្រពៃណីទៅជាបែបទំនើប ឬតាមបែបបច្ចេកវិទ្យាវិញម្ដង។
កាលពីដើមខែមករានេះ ក្រុមហ៊ុនបណ្តុះបណ្តាលមួយរបស់ចិនដែលមានឈ្មោះថា Join Capital Investment & Management C0., Ltd បានជួបពិភាក្សាជាមួយក្រសួងការងារ និងបណ្តុះបណ្តាលវិជ្ជាជីវៈដើម្បីស្វែងយល់ និងត្រៀមបង្កើតកម្មវិធីបណ្តុះបណ្តាលជំនាញ និងបច្ចេកទេសតាមបណ្តាញបច្ចេកវិទ្យា ដែលមានផ្តល់នូវសញ្ញាបត្រពីសាកលវិទ្យាល័យចិន ជូនដល់ប្រជាជនកម្ពុជា។
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម អុិត សំហេង បានលើកឡើងថា តាមបទពិសោធរបស់សាធារណរដ្ឋប្រជាមានិតចិនគេធ្លាប់បានទទួលជោគជ័យយ៉ាងធំក្នុងការបណ្តុះបណ្តាលវិជ្ជាជីវៈតាមប្រព័ន្ធអនឡាញ ព្រោះការបណ្តុះបណ្តាលបែបនេះ ប្រើប្រាស់ធនធាន និងថវិកាតិច ហើយអាចផ្តល់ឱកាសឱ្យយុវជន ឬប្រជាពលរដ្ឋពេញនិយម និងចូលចិត្តសិក្សាបានច្រើន។ ហេតុនេះយើងបានព្រមព្រៀងគ្នា និងឯកភាពធ្វើជាដៃគូនឹងគ្នារវាងក្រសួងការងារ និងក្រុមហ៊ុនចិន ដើម្បីធ្វើការបណ្តុះបណ្តាលធនធានមនុស្សនៅកម្ពុជាតាមប្រព័ន្ធអនឡាញ។
ឯកឧត្តម អុិត សំហេង បានមានប្រសាសន៍ថា៖ “កម្មវិធីបណ្តុះបណ្តាលអនឡាញនេះ នឹងធ្វើការបណ្តុះបណ្តាលលើមុខជំនាញបច្ចេកទេសវិជ្ជាជីវៈស្របតាមវិស័យដែលកម្ពុជាកំពុងត្រូវការ ដូចជាឧស្សាហកម្ម សេវាកម្ម ស្ថាបត្យកម្ម និងផ្នែកផ្សេងៗទៀត។ ការបណ្តុះបណ្តាលនេះ នឹងមានការទទួលស្គាល់គុណភាពត្រឹមត្រូវ ដែលមានចាប់ពីថ្នាក់សញ្ញាបត្រជំនាញ និងបរិញ្ញាបត្រ ឬអាចខ្ពស់ជាងនេះ។
បើតាមឯកឧត្តមរដ្ឋមន្ត្រី គម្រោងនេះនឹងត្រូវបានលើកទឹកចិត្តឱ្យចេញជាលទ្ធផលក្នុងពេលឆាប់ៗនេះ ខណៈកម្មវិធីនេះក៏ត្រូវការពេលវេលាក្នុងការធ្វើការងារកែសម្រួល និងបកប្រែភាសាពីភាសាចិនមកជាភាសាខ្មែរ បើទោះបីជាយើងមានកម្មវិធី Google Translate ហើយក៏ដោយ។ ឯកឧត្តមរដ្ឋមន្ត្រីចង់ឱ្យមានកម្មវិធីបកប្រែភាសាបច្ចេកទេសពីចិនមកខ្មែរឱ្យបានសុក្រឹត និងមានលក្ខណៈច្បាស់លាស់មួយដើម្បីងាយស្រួលក្នុងការធ្វើការបណ្តុះបណ្តាលដល់ប្រជាជនកម្ពុជា។
ពាក់ព័ន្ធនឹងការបណ្តុះបណ្តាលតាមបណ្តាញអនឡាញនេះ លោក ហ៊ាន សំបឿន នាយកមជ្ឈមណ្ឌល សិក្សាពីចម្ងាយ នៃវិទ្យស្ថានបច្ចេកវិទ្យាកម្ពុជា (ICT) បានផ្តល់ឱកាសបណ្តុះបណ្តាលយ៉ាងទូលំទូលាយដល់និស្សិត ព្រោះថា ពេលបច្ចុប្បន្ននេះ តាមរយៈបច្ចេកវិទ្យាព័ត៌មាន និស្សិតអាចសិក្សាបាននៅគ្រប់ទីកន្លែងឱ្យតែមានប្រព័ន្ធអុីនធើណិត។
ការសិក្សាតាមអនឡាញ អាចធ្វើឱ្យសិស្សចំណេញពេលវេលាក្នុងការស្រាវជ្រាវ ធ្វើលំហាត់ និងស្វែងរកឯកសារពាក់ព័ន្ធនានានៅក្នុងបណ្តាប្រទេសមួយចំនួននៅក្នុងតំបន់ និងពិភពលោកថែមទៀតផង។
លោក សាស្ត្រាចារ្យ ហ៊ាន សំបឿន បាននិយាយថា៖ “ការសិក្សាពីចម្ងាយ ឬការសិក្សាតាមបណ្តាញអនឡាញនេះ គឺមានលក្ខណសម្បត្តិគ្រប់គ្រាន់ក្នុងការបណ្តុះបណ្តាលវិជ្ជាជីវៈ ឬមេរៀនដល់សិស្សឱ្យមានចំណេះដឹងខ្ពស់បាន ព្រោះថា កម្មវិធីបណ្តុះបណ្តាលប្រភេទនេះគេបានសម្រេចជោគជ័យរួចមកហើយនៅប្រទេសអភិវឌ្ឍន៍មួយចំនួន។
អ្នកជំនាញអប់រំតាមបណ្តាញបច្ចេកវិទ្យាខាងលើ បានលើកឡើងផងដែរថា ទោះបីជាសិស្ស-និស្សិតគាត់សិក្សាតាមបណ្តាញអនឡាញ ហើយពេលខ្លះគ្រូមិនបានជួបនឹងសិស្ស-និស្សិតផ្ទាល់ក៏ពិតមែន តែកម្មវិធីបណ្តុះបណ្តាលពីចម្ងាយ ឬកម្មវិធីបណ្តុះបណ្តាលតាមបណ្តាញអនឡាញ មានប្រព័ន្ធក្នុងការតាមដានវត្តមានសិស្ស បណ្តាញក្នុងការប្រមូលលំហាត់ ប្រព័ន្ធគ្រប់គ្រងការសិក្សារបស់សិស្ស និងប្រព័ន្ធសម្រួលដល់ការសួរ-ឆ្លើយជាដើម។
លោក សំបឿន បានពន្យល់ថា ជាទូទៅសិស្សអាចរៀនបាននៅគ្រប់ទីកន្លែងឱ្យតែមានបណ្តាញអុីនធើណិត តែពេលវេលាដែលពួកគេរៀននឹងត្រូវបានកត់ត្រាទុក ព្រោះសិស្សម្នាក់ៗនឹងមានគណនីម្នាក់មួយនៅក្នុងកម្មវិធីបណ្តុះបណ្តាលនេះ ដែលធ្វើឱ្យយើងងាយស្រួលក្នុងការកំណត់។ ម្យ៉ាងវិញទៀត ការធ្វើលំហាត់ក៏យើងមានពេលវេលាកំណត់ត្រឹមត្រូវដែរ ហេតុនេះបើគាត់មិនបានសិក្សាស្វែងយល់ពីមេរៀនទាំងអស់នោះទេ គាត់ក៏នឹងមិនអាចធ្វើលំហាត់ទាំងនោះបានដែរ។ លើសពីនេះទៅទៀត សិស្សក៏អាចសួរសំណួរទៅកាន់អ្នកជំនាញឬសាស្ត្រាចារ្យបានដែរ ព្រោះថា កម្មវិធីបណ្តុះបណ្តាលតាមអនឡាញ មានអ្នកធ្វើការងារច្រើននាក់ដើម្បីសម្រួលដល់ការភ្ជាប់ទំនាក់ទំនងទៅសាស្ត្រាចារ្យ និងការឆ្លើយសំណួរនៅពេលដែលសិស្សត្រូវការជំនួយ ឬឆ្ងល់ត្រង់ចំណុចណាមួយពីមេរៀនដែលពួកគេកំពុងរៀន៕
