តូក្យូ៖ ក្រុមហ៊ុនអេឡិចត្រូនិកយក្សមួយរបស់ជប៉ុន Sony Corporation បានប្រកាសឱ្យដឹងនៅថ្ងៃទី 02 ខែកុម្ភៈនេះថា លោក Kazuo Hirai បានលាលែងពីតំណែងនាយកប្រតិបត្តិ (CEO) និងជំនួសដោយលោក Kenichiro Yoshida។ នេះបើយោងតាមការចេញផ្សាយរបស់សារព័ត៌មាន Bloomberg។
យោងតាមសេចក្ដីប្រកាសព័ត៌មានរបស់ Sony បានឱ្យដឹងថា លោក Kazuo Hirai នឹងចុះចេញពីតំណែងជានាយកប្រតិបត្តិនៅចុងខែមីនា ហើយជាមួយគ្នានោះ លោកនឹងចូលកាន់តំណែងជាប្រធានក្រុមប្រឹក្សាភិបាលវិញនៅថ្ងៃទី 01 ខែមេសា ឆ្នាំ 2018 ជាមួយគ្នានោះផងដែរ លោក Kenichiro Yoshida បច្ចុប្បន្នមានតួនាទីជាប្រធានហិញ្ញវត្ថុនៅ Sony នឹងឡើងកាន់តំណែងជានាយកប្រតិបត្តិនៅថ្ងៃទី 01 ខែមេសា។
លោក Kenichiro Yoshida បានចូលកាន់តំណែងជាប្រធានហិរញ្ញវត្ថុនៅ Sony ចាប់តាំងពីថ្ងៃទី01 មេសា ឆ្នាំ 2014 ហើយនៅខែមេសា ឆ្នាំ 2015 លោកត្រូវបាន Sony តែងតាំងមុខងារថ្មីមួយទៀតគឺ ជាអ្នកនាំពាក្យរបស់នាយកប្រតិបត្តិ។
ក្រុមហ៊ុន Sony បានបញ្ជាក់នៅក្នុងសេចក្ដីប្រកាសរបស់ខ្លួនថា ការផ្លាស់ប្ដូរមុខតំណែងរបស់បុគ្គលិកជាន់ខ្ពស់នេះ គឺដើម្បីធ្វើកំណែទម្រងជាពិសេសគឺលោក Kenichiro Yoshida មានបទពិសោធន៍ខាងហិរញ្ញវត្ថុ ដូច្នេះ Sony សង្ឃឹមថា គាត់នឹងជួយស្ដាស្ថានភាពហិរញ្ញវត្ថុក្រុមហ៊ុនឱ្យល្អប្រសើរ។
គួរបញ្ជាក់ផងដែរថា ក្រោយពីក្រុមហ៊ុន Sony បានប្រកាសព័ត៌មាននេះ ទីផ្សារភាគហ៊ុនរបស់ Sony ក៏បានស្ទុះឡើង 2ភាគរយភ្លាមផងដែរ៕
