ខ្សែបម្រើអន្តរជាតិអាល្លឺម៉ង់ដ៏ឆ្នើម Mesut Ozil បានបញ្ចប់ការសង្ស័យផ្សេងៗជុំវិញអនាគតរបស់គេនៅឯក្លិប Arsenal តាមរយៈការយល់ព្រមលើកុងត្រាថ្មីមួយដែលមានរយៈពេល 3ឆ្នាំ ជាមួយនឹងក្លិបយក្សរបស់ក្របខ័ណ្ឌ Premier League មួយនេះ កាលពីថ្ងៃព្រហស្បតិ៍។
Ozil វ័យ 29ឆ្នាំ បានបង្ហោះសារមួយនៅលើបណ្តាញសង្គម Instagram របស់គេថា៖ «រយៈពេល 3ឆ្នាំបន្ថែមទៀតជាមួយនឹង Arsenal។ វាបានក្លាយជាការសម្រេចចិត្តមួយក្នុងចំណោមការសម្រេចចិត្តដ៏សំខាន់បំផុតនៃអាជីពកីឡាបាល់ទាត់របស់ខ្ញុំ ហើយនោះគឺជាមូលហេតុដែលខ្ញុំត្រូវគិត និងនិយាយជាមួយនឹងគ្រប់គ្នាដែលសំខាន់ចំពោះខ្ញុំ»។
ខ្សែបម្រើរូបនេះបានបន្ថែមទៀតថា៖ «រឿងល្អៗត្រូវការពេលវេលា។ នៅទីបំផុត ខ្ញុំអនុញ្ញាតឲ្យបេះដូងរបស់ខ្ញុំសម្រេចចិត្ត។ ដូចដែលខ្ញុំតែងតែបាននិយាយអ៊ីចឹង ខ្ញុំមានអារម្មណ៍ថា ដូចជានៅផ្ទះនៅទីនេះ ហើយខ្ញុំពិតជាមានការលើកទឹកចិត្តយ៉ាងខ្ពស់ក្នុងការសម្រេចចិត្តសមិទ្ធផលធំៗក្នុងរយៈពេល៣ឆ្នាំខាងមុខនេះ»។ កិច្ចសន្យាកាលពីមុនរបស Ozil នៅសល់រយៈពេលត្រឹមតែ 6ខែទៀតប៉ុណ្ណោះ ហើយការសម្រេចចិត្តរបស់គេក្នុងការបន្តនៅ បានបំពេញថ្ងៃដ៏គួរឲ្យជឿជាក់សម្រាប់ក្រុម Arsenal ក្រោយពីពួកគេទិញបានខ្សែប្រយុទ្ធ Pierre-Emerick Aubameyang ពីក្លិប Borussia Dortmund ក្នុងតម្លៃខ្លួន 56លានផោន (ស្មើនឹង 79លានដុល្លារអាមេរិក)។
Aubameyang និង Ozil នឹងត្រូវចូលរួមដោយ Henrikh Mkhitaryan ក្នុងតំបន់ប្រយុទ្ធ ក្រោយពីខ្សែបម្រើអន្តរជាតិអាមេនីរូបនេះ បានចូលរួមក្នុងនាមជាផ្នែកនៃការដោះដូរមួយដែលបានធ្វើឲ្យ Alexis Sanchez ផ្ទេរទៅកាន់ក្លិប Manchester United កាលពីខែមុន៕
ប្រភពពី៖ ESPN
