Eric Dier កំពុងតែត្រៀមលក្ខណៈរួចរាល់ក្នុងការក្លាយជាកីឡាករដំបូងគេរបស់ក្រុមមាន់ខ្នាយមាស Tottenham Hot Spurs ដើម្បីសាកល្បងទៅលើគោលនយោបាយដ៏តឹងរ៉ឹងរបស់លោក Daniel Levy ដែលជាប្រធានក្លិប។
ខ្សែការពារវ័យ ២៣ឆ្នាំរូបនេះ ទើបតែបានចុះហត្ថលេខាលើកុងត្រារយៈពេល ៥ឆ្នាំដែលផ្តល់ចំណូល ៥ម៉ឺនផោន (ស្មើនឹង៦,៥ម៉ឺនដុល្លារអាមេរិក) ក្នុងមួយសប្តាហ៍ ក្នុងក្លិប Spurs កាលពីខែកញ្ញា ប៉ុន្តែ លោក Jose Mourinho អ្នកចាត់ការទូទៅរបស់ក្រុមបិសាចក្រហម Manchester United ជឿជាក់ថា ការដេញថ្លៃទិញក្នុងទឹកប្រាក់ ៤០លានផោន (ស្មើនឹង៥១,៨លានដុល្លារអាមេរិក) គួរតែគ្រប់គ្រាន់ហើយក្នុងការទាញយករូបគេចេញកីឡដ្ឋាន White Hart Lane។ Dier បានផ្ទេរទៅកាន់ក្លិប Spurs ដោយចេញពីក្លិប Sporting Lisbon កាលពីខែសីហា ឆ្នាំ២០១៤ ក្នុងតម្លៃខ្លួន៤លានផោន និងបានធ្វើការប្រជែងដណ្តើមតំណែងជាមួយនឹងកីឡាករ Victor Wanyama ដែលបានផ្ទេរទៅ Spurs កាលពីរដូវកាលមុននេះដែរ។
ប៉ុន្តែ ទោះបីជាយ៉ាងណាលោក Levy បានរៀបចំយ៉ាងល្អកាលពីដើមរដូវកាលនេះ តាមរយៈការរក្សាទុកកីឡាករសំខាន់ៗតាមរយៈការផ្តល់កុងត្រារយៈពេលវែង។ បច្ចុប្បន្ន លោកកំពុងតែព្រមានថា ពួកគេមិនអាចរំពឹងទុកថា នឹងទទួលបានការដំឡើងប្រាក់បៀវត្សរ៍ឡើយ បើទោះបីមានក្លិបផ្សេងកំពុងតែចាប់អារម្មណ៍លើពួកគេក៏ដោយ។
ក្លិប Manchester City ចង់ទិញយកខ្សែការពារ Kyle Walker និងខ្សែបម្រើ Danny Rose ដែលទទួលបានចំណូល៧ម៉ឺនផោន ក្នុងមួយសប្តាហ៍ដូចគ្នា ប៉ុន្តែ លោក Levy បានប្រាប់អ្នកគាំទ្ររបស់ Tottenham ថា លោកមិនមានគម្រោងលក់កីឡាករទាំងពីរឡើយ៕
