មន្ត្រីជាន់ខ្ពស់កម្ពុជា បានស្នើឱ្យក្រុមហ៊ុនជប៉ុនផ្តោតលើការវិនិយោគក្នុងវិស័យកសិកម្ម និង ឧស្សាហកម្មកែច្នៃផលិតផលកសិកម្ម ខណៈពេលដែលកម្ពុជាខ្វះខាតលើខ្សែចង្វាក់ផលិតកម្មកែច្នៃដ៏ច្រើន ដែលអាចជួយលើកកម្ពស់តម្លៃផលិតផលកសិកម្មឱ្យប្រសើរជាងពេលបច្ចុប្បន្នបាន។
ក្នុងជំនួបជាមួយមន្ត្រីរបស់ប្រទេសជប៉ុនកាលពីពេលកន្លងទៅនេះ ឯកឧត្តមបណ្ឌិតសភាចារ្យទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានស្នើដល់ឯកឧត្តម Tokihiro Nakamura អភិបាលខេត្ត EHIME នៃប្រទេសជប៉ុនដែលអមដោយអ្នកធុរកិច្ចជប៉ុនមួយចំនួនទៀតដែលបានរួមដំណើរមកបំពេញទស្សនកិច្ចនៅកម្ពុជាឱ្យបង្កើនការវិនិយោគបន្ថែមទៀតនៅកម្ពុជាក្នុងវិស័យកសិកម្ម និងឧស្សាហកម្មកែច្នៃ ដោយសារតែកម្ពុជានៅខ្វះខាតត្រង់ចំណុចនេះយ៉ាងខ្លាំង។
ក្រុមហ៊ុនជប៉ុនធំៗចំនួន 8 មកពីខេត្ត EHIME ប្រទេសជប៉ុនបានមកសិក្សាស្វែងយល់ និងស្វែងរកឱកាសវិនិយោគនៅប្រទេសកម្ពុជា ស្របពេលដែលកម្ពុជាកំពុងបង្ហាញនូវភាពទាក់ទាញខ្លាំងដល់អ្នកវិនិយោគបរទេស។ នេះបើយោងតាមព័ត៌មានដែលបានចែកចាយដល់បណ្តាញសារព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ។
នៅក្នុងជំនួបជាមួយឯកឧត្តមបណ្ឌិតសភាចារ្យអូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នាសប្តាហ៍កន្លងទៅ ឯកឧត្តម Tokihiro Nakamura អភិបាលខេត្ត EHIME នៃប្រទេសជប៉ុន និងអ្នកធុរកិច្ចជប៉ុនមួយចំនួនទៀតបានលើកឡើងថា កម្ពុជាកំពុងមានសក្តានុពលខ្ពស់សម្រាប់ទាក់ទាញការវិនិយោគមកពីក្រៅប្រទេស។
ឯកឧត្តម Tokihiro Nakamura មានប្រសាសន៍ដូចដែលត្រូវបានដកស្រង់សម្តីក្នុងជំនួបកន្លងមកនោះថា ៖ “នេះក៏ជាឱកាសល្អសម្រាប់ថ្នាក់ដឹកនាំនៃក្រុមហ៊ុនជប៉ុនធំៗ ចំនួន 8 នៅខេត្ត EHIME ផងដែរ ដើម្បីសិក្សា និងស្វែងយល់ដោយផ្ទាល់ពីឱកាសវិនិយោគនៅប្រទេសកម្ពុជា។
ជាមួយដំណើរទស្សនកិច្ចមកកាន់កម្ពុជានៅពេលនេះ គណប្រតិភូធុរកិច្ចជប៉ុនដែលដឹកនាំដោយឯកឧត្តម Tokihiro Nakamura អភិបាលខេត្ត EHIMEនៃប្រទេសជប៉ុន ក៏បានចុះអនុស្សរណៈនៃការយោគយល់គ្នាមួយជាមួយក្រសួងការងារ និងបណ្តុះបណ្តាលវិជ្ជាជីវ:កម្ពុជា ស្តីពីការបញ្ជូនកម្មសិក្សាការីបច្ចេកទេសកម្ពុជាឱ្យទៅធ្វើកម្មសិក្សា និងធ្វើការងារនៅក្នុងខេត្ត EHIME ផងដែរ។
តាមរយៈ MoU នេះ ភាគីកម្ពុជា និងជប៉ុននឹងបើកផ្លូវឱ្យមានកម្មសិក្សាការី និងពលករកម្ពុជាកាន់តែច្រើនថែមទៀតទៅបណ្តុះបណ្តាល និងធ្វើការងាររយៈពេលវែងនៅខេត្ត EHIME នៃប្រទេសជប៉ុន។ កន្លងមកថា ក្រុមហ៊ុនរបស់ប្រទេសជប៉ុនបានចូលមកវិនិយោគនៅកម្ពុជាក្នុងវិស័យសំខាន់ៗជាច្រើនដូចជា អចលនទ្រព្យ ផ្សារទំនើបលក់រាយ គ្រឿងផ្គុំឧបករណ៍អេឡិចត្រូនិក ជាដើម ប៉ុន្តែគ្មានការវិនិយោគជាទ្រង់ទ្រាយធំណាមួយត្រូវបានធ្វើឡើងក្នុងវិស័យកសិកម្ម និងការកែច្នៃកសិផលនោះទេ៕
