ខ្សែប្រយុទ្ធវ័យ16ឆ្នាំ Pietro Pellegri ដែលមានតម្លៃខ្លួនខ្ពស់ជាងគេបំផុតក្នុងពិភពលោក បានបញ្ជាក់ថា រូបគេមិនត្រូវបានរំខានដោយសារតែចំនួនទឹកប្រាក់ដ៏ច្រើនសន្ធឹកសន្ធាប់ដែលក្លិប Monaco បានចំណាយទិញរូបគេពីក្លិប Genoa ឡើយ។
Pellegri បានចាកចេញពីក្លិបកុមាររបស់គេ ដើម្បីចូលរួមជាមួយនឹងក្រុមម្ចាស់ជើងឯកបារាំង សម្រាប់តម្លៃខ្លួន 17.5លានផោន (ស្មើនឹង 24.7លានដុល្លារអាមេរិក) កាលពីថ្ងៃសៅរ៍ ក្រោយពីបានបង្ហាញខ្លួនក្នុងក្រុមឈុតធំរបស់ Genoa ចំនួន 9លើករួចមក។ ខ្សែប្រយុទ្ធដែលបានក្លាយជាកីឡាករអាជីពដំបូងរូបនេះកើតក្នុងឆ្នាំ2001 និងបានស៊ុតបាល់បញ្ចូលទីក្នុងការប្រកួតក្របខ័ណ្ឌ Serie A នោះ មិនមានសម្ពាធដោយសារតែតួលេខនៃតម្លៃខ្លួនទាក់ទិននឹងការផ្ទេររបស់គេឡើយ និងកំពុងតែសម្លឹងរកការចាប់ផ្តើមជាមួយនឹងក្លិបថ្មីរបស់គេ។ Pellegri បានឲ្យដឹងថា៖ «ខ្ញុំមិនខ្វល់ពីចំនួនទឹកប្រាក់នេះឡើយ។
នៅពេលនេះ ខ្ញុំផ្តោតលើការលេង ផ្តល់ការរីករាយដល់ខ្លួនឯង និងឈានឱ្យដល់គោលដៅរបស់ខ្ញុំ»។ ខ្សែប្រយុទ្ធសញ្ជាតិអ៊ីតាលីរូបនេះ បានក្លាយជាកីឡាករវ័យក្មេងបំផុតក្នុងការចូលលេងក្នុងក្របខ័ណ្ឌ Serie A នៅពេលដែលរូបគេបានបង្ហាញខ្លួនជាលើកទី 1របស់គេ កាលពីខែធ្នូ ឆ្នាំ2016 ក្នុងវ័យ 15ឆ្នាំ និង280ថ្ងៃ ហើយកាលពីខែឧសភា រូបគេបានបង្កើតប្រវត្តិសាស្ត្រជាមួយនឹងគ្រាប់បាល់ជាលើកទី 1របស់គេនៅពេលប្រកួតជាមួយនឹងក្រុម AS Roma។
Pellegri បានបន្ថែមទៀតថា៖ «ខ្ញុំពិតជារីករាយណាស់ក្នុងការចូលរួមជាមួយនឹង Monaco។ ខ្ញុំមានការជឿជាក់ភ្លាមៗទៅលើគម្រោងដែលអនុញ្ញាតឲ្យកីឡាករវ័យក្មេងដូចជារូបខ្ញុំធ្វើការអភិវឌ្ឍ និងជោគជ័យទៅថ្ងៃអនាគត»៕
ប្រភពពី៖ Sky Sports
