ដោយទន្ទឹងរង់ចាំមើលអស់រយៈពេលជាច្រើនឆ្នាំមក ផ្លូវល្បឿនលឿនភ្នំពេញ-ព្រះសីហនុ ត្រូវបានកំណត់ពេលវេលាសាងសង់ជាផ្លូវការហើយ គឺនឹងចាប់ផ្តើមនៅក្នុងឆ្នាំ2018នេះតទៅ ក្នុងទំហំទឹកប្រាក់ប្រមាណជា 2ពាន់លានដុល្លារអាមេរិក។
គម្រោងផ្លូវល្បឿនលឿននេះត្រូវបានផ្សព្វផ្សាយក្រោយពីឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានចុះហត្ថលេខាលើកិច្ចព្រមព្រៀងសម្បទានសម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធផ្លូវល្បឿនលឿនភ្នំពេញ-ព្រះសីហនុជាមួយសមភាគីចិន តំណាងដោយលោក Liu Qitao ប្រធានក្រុមហ៊ុនសំណង់គមនាគមន៍ចិន។ ពិធីចុះហត្ថលេខាខាងលើត្រូវបានប្រព្រឹត្តធ្វើឡើងក្រោមអធិបតីភាពដ៏ខ្ពង់ខ្ពស់របស់សម្តេចតេជោហ៊ុន សែន នាយករដ្ឋមន្ត្រី និងឯកឧត្តម លី ខឺឈាង នាយករដ្ឋមន្ត្រីនៃសាធារណរដ្ឋប្រជាមានិតចិន។
គម្រោងសាងសង់ផ្លូវល្បឿនលឿននេះនឹងត្រូវសាងសង់ដោយវិនិយោគិនចិនតាមរូបភាពវិនិយោគសាងសង់-ធ្វើអាជីវកម្ម-ផ្ទេរ (BOT) ជាផ្លូវ 4គន្លងមានប្រវែងសរុប 190.63 គីឡូម៉ែត្រ ចេញពីទីក្រុងភ្នំពេញរហូតដល់ខេត្តព្រះសីហនុ ជាផ្លូវថ្មីទាំងស្រុង ទ្រូងផ្លូវមានទទឹង 24ម៉ែត្រ ក្រាលកៅស៊ូ AC មានសួនច្បារខណ្ឌកណ្តាល មានផ្លូវបំបែកប្តូរទិស មានទីតាំងឈប់សម្រាក មានរបងបាំងសងខាងផ្លូវ និងមានហេដ្ឋារចនាសម្ព័ន្ធសំណង់សេវាគាំទ្រជាច្រើនទៀត។
ក្រោយពេលសាងសង់រួច ផ្លូវល្បឿនលឿននេះនឹងជួយសម្រួលដល់ការធ្វើដំណើរទៅមករាជធានីភ្នំពេញ-ខេត្តព្រះសីហនុក្នុងរយៈពេលខ្លី កាត់បន្ថយហានិភ័យគ្រោះថ្នាក់ចរាចរណ៍ កាត់បន្ថយការកកស្ទះចរាចរណ៍ សម្រួលដល់ការដឹកជញ្ជូនទំនិញធ្វើឱ្យសេដ្ឋកិច្ចជាតិមានការរីកចម្រើនកាន់តែប្រសើរ។ លើសពីនេះទៀត ព្រះរាជាណាចក្រកម្ពុជានឹងទទួលបានផលចំណេញដែលមិនអាចកាត់ថ្លៃបានពីការអភិវឌ្ឍច្រករបៀងភ្នំពេញ-ព្រះសីហនុ។
លោក ហូ វណ្ឌី ប្រធានក្រុមហ៊ុន World Express Co,.Ltd មានប្រសាសន៍ថា ផ្លូវល្បឿនលឿនខាងលើ គឺជាសរសៃឈាមសេដ្ឋកិច្ចដ៏សំខាន់សម្រាប់ប្រជាពលរដ្ឋខ្មែរទាំងមូល។ លោកថា នៅពេលផ្លូវនេះសាងសង់រួច វានឹងផ្តល់អត្ថប្រយោជន៍ជាច្រើនទាំងវិស័យរដ្ឋ ឯកជន និងប្រជាពលរដ្ឋទូទៅពិសេសជួយសម្រួលដល់ការដឹកជញ្ជូនទំនិញផ្សេងៗ កាត់បន្ថយការចំណាយ កាត់បន្ថយពេលវេលា ជួយបង្កើនសុខុមាលភាព និងសុវត្ថិភាពជូនប្រជាពលរដ្ឋនៅពេលធ្វើដំណើរឆ្លងកាត់ម្តង។
លើសពីនេះ វាក៏បានជួយលើកកម្ពស់សេដ្ឋកិច្ចប្រជាពលរដ្ឋតាមមូលដ្ឋានសម្រាប់បង្កើតជាមុខរបរលក់ដូរផ្សេងៗ ដូចជាការលក់ដូរផលិតផលកសិកម្មប្រចាំភូមិឋានរបស់ពួកគេ ការបង្កើតភោជនីយដ្ឋានជាកន្លែងចតឈប់សម្រាកសម្រាប់ទទួលទានអាហារតាមផ្លូវ ហើយផ្លូវល្បឿនលឿនដំបូងនៅកម្ពុជានេះក៏អាចទាក់ទាញភ្ញៀវទេសចរឱ្យចូលមកកម្ពុជាបានកាន់តែច្រើនផងដែរ៕
