បន្ទាប់ពីរដ្ឋាភិបាលប្រកាសសាងសង់ព្រលានយន្តហោះថ្មីលើផ្ទៃដីទំហំ 2,600 ហិកតា ស្ថិតនៅក្នុងភូមិសាស្ត្រក្រុងតាខ្មៅជាប់នឹងស្រុកកណ្តាលស្ទឹង ខេត្តកណ្តាលរួចមក បានធ្វើឱ្យតម្លៃដីនៅទីនោះហក់ឡើងខ្ពស់កប់ពពក និងមានឈ្មួញកំពុងសម្រុកចុះទិញយ៉ាងមមាញឹក។
យោងតាមលិខិតរបស់ទីស្ដីការគណៈរដ្ឋមន្ដ្រីផ្ញើទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ឯកឧត្តម អូន ព័ន្ធមុនីរ័ត្ន និងឯកឧត្តម ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិលដើម្បីសុំគោលការណ៍បង្កើតក្រុមហ៊ុន “ខេមបូឌា អ៊ែរផត អុីនវេសមិន” បានឱ្យដឹងថា ព្រលានយន្តហោះថ្មីនេះត្រូវចំណាយទុនវិនិយោគរហូតដល់ទៅ1,500លានដុល្លារអាមេរិក ក្នុងនោះទឹកប្រាក់ 1,100លានដុល្លារជាកម្ចីពីធនាគារបរទេសនិង280លានដុល្លារជារបស់ក្រុម OCIC របស់លោកឧកញ៉ា ពុង ឃាវសែ ហើយដើមទុនចុះបញ្ជីមានរហូតដល់ 120លានដុល្លារអាមេរិក។
កាលពីសប្តាហ៍មុនលោកឧកញ៉ា ពុង ឃាវសែ និងក្រុមហ៊ុនចិនដែលជាដៃគូវិនិយោគនោះ បានចុះហត្ថលេខារួចរាល់ហើយ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានិងលោក លី ខឺឈាង នាយករដ្ឋមន្ត្រីចិននាវិមានរដ្ឋាភិបាល ដែលព្រឹត្តិការណ៍នេះបានជំរុញឱ្យដីនៅតំបន់នោះកំពុងមានតម្លៃស្ទុះហក់ឡើងយ៉ាងខ្ពស់ដ៏ពុំគួរឱ្យជឿ។
លោក ប៉ុល សិទ្ធី ឈ្មួញកណ្តាលទិញ-លក់ដីនៅក្នុងខេត្តកណ្តាលមានប្រសាសន៍ថា កន្លងមកដីនៅតំបន់នោះមានតម្លៃត្រឹមតែ 2ទៅ3សេនដុល្លារ ប៉ុណ្ណោះក្នុងមួយម៉ែត្រការ៉េ និងមិនមានឈ្មួញណាទិញផង ប៉ុន្តែមកដល់ពេលនេះដីទាំងនោះឡើងថ្លៃខ្ពស់ហួសពីការស្មាន ដោយទីតាំងខ្លះ1ម៉ែត្រការ៉េតម្លៃ 5ដុល្លារ កន្លែងខ្លះទៀតឡើងដល់ 10ដុល្លាររហូតដល់ 60ដុល្លារក៏មាន ទៅតាមទីតាំងផ្សេងៗដែលធ្វើឱ្យដីឡើងថ្លៃខ្ពស់ចាប់ពី 1ហិកតាតម្លៃ 2ពាន់ដុល្លារឡើងដល់ 10ម៉ឺនដុល្លារ ឬ60ម៉ឺនដុល្លារក៏មានដែរ។
ដោយឡែកលោក លឹម ច័ន្ទសុភី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីបានមានប្រសាសន៍ទទួលស្គាល់ថា តម្លៃដីនៅទីនោះពិតជាឡើងថ្លៃប្រាកដមែន ដោយកន្លងមកដីនៅផ្នែកខាងក្រោម(ដីបាតបឹង)ដែលមានតម្លៃត្រឹម 5ដុល្លារ ឬ6ដុល្លារនោះ បច្ចុប្បន្នឡើងដល់ជាង10ដុល្លារ ហើយថា តម្លៃដីផ្នែកខាងលើថ្លៃ 7 ឬ8ដុល្លារ ឥឡូវឡើងដល់ 60ដុល្លារ ទៅ70ដុល្លារក៏មានដែរ។ ទោះជាយ៉ាងនេះក្តី លោកអំពាវនាវឱ្យអ្នកទិញមានការប្រុងប្រយ័ត្នផងដោយមុននឹងទិញត្រូវពិចារណាឱ្យបានច្បាស់លាស់ ចៀសវាងការខាតបង់ ព្រោះថា នៅជិតព្រលានយន្តហោះមានទាំងគុណសម្បត្តិ និងគុណវិបត្តិដូចគ្នា។ គុណសម្បត្តិគឺនៅត្រង់ថា តំបន់នោះនឹងក្លាយទៅជាទីប្រជុំជន អាចប្រកបរបរលក់ដូរ ឬធ្វើផ្ទះសំណាក់ទទួលភ្ញៀវបាន ចំណែកគុណវិបត្តិវិញគឺមិនអាចសង់ផ្ទះខ្ពស់បានទេ និងសំឡេងរំខានក៏មានច្រើនដែរ។
គួរបញ្ជាក់ថា ឆ្លើយតបនឹងកំណើនភ្ញៀវទេសចរនិងវិនិយោគិនដែលមានចំនួនកាន់តែច្រើនឡើងនោះ រដ្ឋាភិបាលបានប្រកាសអំពីគ្រោងសាងសង់ព្រលានយន្តហោះភ្នំពេញថ្មីនេះ ហើយរាជរដ្ឋាភិបាលក៏នឹងធ្វើការសាងសង់ព្រលានយន្តហោះថ្មីនៅក្នុងខេត្តសៀមរាប និងខេត្តកោះកុងផងដែរ។ ព្រលានយន្តហោះអន្តរជាតិសៀមរាប-អង្គរថ្មីត្រូវសាងសង់នៅឆ្នាំ2018នេះដោយក្រុមហ៊ុនចិន YUNAN DEVELOPMENT GROUP ដោយគ្រោងវិនិយោគលើទឹកប្រាក់ 900លានដុល្លារអាមេរិកដែលមានកុងត្រារយៈពេល 55ឆ្នាំស្ថិតក្នុងស្រុកសូត្រនិគម លើផ្ទៃដី 700ហិកតា។
ដោយឡែកសម្រាប់ព្រលានយន្ដហោះថ្មីមួយទៀតដែលមានទីតាំងនៅខេត្តកោះកុងក៏នឹងត្រូវសាងសង់នៅលើផ្ទៃដីប្រមាណជា 750ហិកតាផងដែរដែលស្ថិតនៅក្នុងស្រុកបទុមសាគរ ខេត្តកោះកុងដែលវិនិយោគដោយក្រុមហ៊ុនចិនឈ្មោះថា Union Development Group ដែលនឹងវិនិយោគលើទឹកប្រាក់ប្រមាណជា 350លានដុល្លារអាមេរិក។
លោក ស៊ិន ចាន់សិរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិលមានប្រសាសន៍ថា ព្រលានយន្តហោះនេះនឹងមានទំហំជាង 700ហិកតា ប្រហាក់ប្រហែលគ្នានឹងព្រលានយន្តហោះអន្តរជាតិខេត្តសៀមរាបថ្មីដែរ ចំណែកផ្ទៃដីដែលនៅសល់គឺជាទីតាំងសម្រាប់សាងសង់មជ្ឈមណ្ឌលពាណិជ្ជកម្ម និងលំនៅដ្ឋាននានា ព្រោះការវិនិយោគព្រលានយន្តហោះមិនអាចរកផលចំណេញបានទេ គឺមានតែការរៀបចំសេវាកម្ម និងមជ្ឈមណ្ឌលពាណិជ្ជកម្មគាំទ្របន្ថែម ទើបអ្នកវិនិយោគអាចរកផលចំណេញបានហើយគម្រោងវិនិយោគនេះមានឈ្មោះថា Airport City ជាគម្រោងវិនិយោគចម្រុះដែលមានទាំងព្រលានយន្តហោះ និងមជ្ឈមណ្ឌលពាណិជ្ជកម្ម។
សូមបញ្ជាក់ផងដែរថា ទីតាំងសាងសង់ព្រលានយន្តហោះថ្មីនេះស្ថិតនៅតាមបណ្តោយផ្លូវជាតិលេខ 21បេ ជាតំបន់វាលបឹងដ៏ធំមួយដែលមានឈ្មោះថា បឹងរៀន ស្ថិតក្នុងរង្វង់ផ្លូវក្រវាត់ក្រុងទី3 បើគិតពីកន្ទុយផ្លូវ60ម៉ែត្រ ឬផ្លូវសម្តេចតេជោហ៊ុន សែន គឺទីតាំងព្រលាននេះមានចម្ងាយប្រមាណ 9គីឡូម៉ែត្រចេញពីកន្ទុយផ្លួវនេះឆ្ពោះទៅមុខ។ ទីតាំងព្រលានយន្តហោះនេះជាផ្ទៃបឹង ដែលនឹងត្រូវបូមខ្សាច់បំពេញនាពេលខាងមុខនេះ៕