ស្របពេលដែលវិស័យអចលនទ្រព្យមានការរីកចម្រើនខ្លាំងនៅលើទីផ្សារក្នុងប្រទេសកម្ពុជា គេសង្កេតឃើញថាសកម្មភាពទិញ-លក់ ជួលដី-ផ្ទះ ខុនដូ អគារការិយាល័យមានការរីកដុះដាលយ៉ាងខ្លាំងនៅរយៈពេលប៉ុន្មានឆ្នាំចុងក្រោយនេះ។ មានចម្ងល់ជាច្រើនជុំវិញការរកស៊ីទិញ-លក់ ជូលអចលនទ្រព្យនេះដែលតែងតែលើកឡើងថា តើយើងគួរដាក់ស្លាកលក់ ឬជួលអចលនទ្រព្យរបស់យើងដោយខ្លួនឯង ឬព្រមអនុញ្ញាតឱ្យក្រុមហ៊ុនអចលនទ្រព្យស្របច្បាប់ដាក់លក់ ឬជួលអចលនទ្រព្យរបស់យើង? ព្រោះបើយើងប្រើសេវាក្រុមហ៊ុនអចលនទ្រព្យ យើងនឹងត្រូវចំណាយប្រាក់បង់ថ្លៃសេវានៃការលក់3% ឬសេវាលើការជួល1ខែជាដើម ដូច្នេះតើអត្ថប្រយោជន៍អ្វីខ្លះដែលយើងនឹងទទួលបានពីការប្រើសេវារបស់ក្រុមហ៊ុនអចលនទ្រព្យស្របច្បាប់ទាំងនោះ?
លោក ម៉ាន់ ចាន់ឌី អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA) និងជាអគ្គនាយកក្រុមហ៊ុន Premium Housing មានប្រសាសន៍ថា ការប្រើភ្នាក់ងារអចលនទ្រព្យដែលមានអាជ្ញាប័ណ្ណត្រឹមត្រូវពីក្រសួងពាណិជ្ជកម្ម និងក្រសួងសេដ្ឋកិច្ចឱ្យជួយលក់ ឬជួលដី-ផ្ទះ អគារខុនដូ ក៏ដូចជាអគារការិយាល័យជាដើមនោះ ម្ចាស់អចលនទ្រព្យនឹងទទួលបានអត្ថប្រយោជន៍ 2យ៉ាង ក្នុងនោះរួមមាន ៖
- ភ្នាក់ងារអចលនទ្រព្យទទួលបានការបណ្តុះបណ្តាលសមត្ថភាពផ្សេងៗជាច្រើន មុននឹងទទួលបានអាជ្ញាប័ណ្ណពីក្រសួងដើម្បីប្រកបការងារជាភ្នាក់ងារលក់អចលនទ្រព្យដែលមានជំនាញមួយច្បាស់លាស់ ហើយភ្នាក់ងារអចលនទ្រព្យមានបណ្តាញទំនាក់ទំនងការងារច្រើនរវាងភ្នាក់ងារនឹងភ្នាក់ងារ រវាងក្រុមហ៊ុននឹងក្រុមហ៊ុន មានអតិថិជននៅក្នុងដៃស្រាប់។ នៅពេលមានព័ត៌មានលក់អចលនទ្រព្យណាមួយ គាត់អាចចែករំលែកព័ត៌មាននោះទៅបណ្តាញរបស់គាត់ ដោយធ្វើការចែករំលែកនូវកម្រៃជើងសារជាមួយគ្នា ពេលនោះនឹងធ្វើឱ្យការលក់ ឬជួលអចលនទ្រព្យនីមួយៗនោះផ្សព្វផ្សាយបានទូលំទូលាយ និងលក់ ឬជួលឆាប់ដាច់ ។
ទី2. ឆ្លងកាត់បទពិសោធច្រើនឆ្នាំ ភ្នាក់ងារអចលនទ្រព្យមានទេពកោសល្យក្នុងការចរចារពន្យល់ពីហេតុផល និងអត្ថប្រយោជន៍ផ្សេងៗដើម្បីឱ្យអ្នកលក់ជឿទុកចិត្ត តែប្រសិនបើម្ចាស់អចលនទ្រព្យដាក់ស្លាកលក់ ឬជួលដី-ផ្ទះដោយខ្លួនឯងនោះ វានឹងបង្កការរំខានច្រើនចំពោះខ្លួនឯងតាមរយៈការទូរស័ព្ទសាកសួរព័ត៌មានផ្សេងៗពីអតិថិជនដែលពេលខ្លះបានត្រឹមតែសួរចោលតែប៉ុណ្ណោះ។
ចំណែកលោក ខាត់ សុវណ្ណ សមាជិកក្រុមប្រឹក្សាភិបាលសមាគមCVEA និងជានាយកក្រុមហ៊ុន Camtop Property Group ក៏បានលើកឡើងដែរថា នៅមានហេតុផលមួយចំនួនទៀតដែលម្ចាស់ផ្ទះ ឬម្ចាស់គម្រោងផ្សេងៗត្រូវប្រើភ្នាក់ងារលក់ ដូចជាទី1. ពួកគាត់មានជំនាញច្បាស់លាស់ក្នុងការវាយតម្លៃដី-ផ្ទះ ក៏ដូចជាអគារសម្រាប់លក់ចេញ ឬជួលបន្តទៅឱ្យអតិថិជន តើគួរលក់ ឬជួលក្នុងតម្លៃប៉ុន្មានដើម្បីឱ្យស្របនឹងទីផ្សារ។ ជួនកាលការលក់ថ្លៃលើសតម្លៃទីផ្សារខ្លាំងពេកក៏លក់មិនដាច់ ឬបើលក់ទាបពេកនាំឱ្យខាតប្រយោជន៍ម្ចាស់អចលនទ្រព្យ ឬគម្រោងនោះ។ ហេតុផលមួយទៀតគឺ មុននឹងនាំអតិថិជនទៅពិនិត្យមើលផ្ទះ ឬគម្រោងផ្សេងៗនោះ ភ្នាក់ងារលក់បានពិនិត្យមើលលក្ខខណ្ឌច្រើនចំណុចទៅលើអ្នកទិញ បើពិនិត្យឃើញថា គាត់ចង់ទិញ ឬជួលពិតប្រាកដទើបគេនាំទៅ ប៉ុន្តែសម្រាប់ម្ចាស់ផ្ទះជួនកាលមិនបានដឹងទេ គ្រាន់តែគេមកពិនិត្យមើលផ្ទះក៏អនុញ្ញាតឱ្យចូល ជួនកាលមានហានិភ័យកើតឡើងដោយមិនដឹងខ្លួន ដូចជាករណីចាប់ជំរិត ឬប្លន់ផ្សេងៗកើតឡើងក៏អាចថាបានដែរ។
លោកថា ភាពទទួលខុសត្រូវគឺជារឿងសំខាន់ ដូច្នេះនៅពេលដែលម្ចាស់ដី ឬម្ចាស់ផ្ទះប្រើភ្នាក់ងារអចលនទ្រព្យដែលមានច្បាប់អនុញ្ញាតត្រឹមត្រូវ នឹងធ្វើឱ្យការលក់ប្រកបដោយតម្លាភាព មានការទទួលខុសត្រូវទៅតាមផ្លូវច្បាប់។
លោកស្រី Grace Rachny Fong អនុប្រធានសមាគម CVEA និងជានាយិកាក្រុមហ៊ុន Century21 Cambodia បានលើកឡើងផងដែរថា ឆ្លងតាមបទពិសោធជាច្រើនឆ្នាំកន្លងមកមិនថាតែប្រទេសកម្ពុជានោះទេ សូម្បីនៅលើទីផ្សារអចលនទ្រព្យក្រៅប្រទេសដែលរួមមានដូចជា ជប៉ុន និងអាមេរិកជាដើមនោះ ម្ចាស់អចលនទ្រព្យតែងលក់គម្រោង លក់ផ្ទះ ឬដីធ្លីដោយខ្លួនឯង ដោយសារពួកគាត់គិតថា មិនចង់ខាតបង់លើកម្រៃជើងសារ។ ជួនកាលពួកគាត់មានបទពិសោធធ្លាប់ជួបភ្នាក់ងារអចលនទ្រព្យដែលមិនល្អ ហើយពេលខ្លះគាត់មិនចង់ឱ្យមានភាគីទី3ចូលមកជ្រៀតជ្រែកដឹងឮក្នុងការរកស៊ីរបស់ពួកគាត់នាំមានភាពរំខានជាដើម។ គាត់អាចគិតថា ខ្លួនគាត់ក៏មានសមត្ថភាពអាចទំនាក់ទំនងអតិថិជនបានច្រើនដោយខ្លួនឯងបានដែរ។ ប៉ុន្តែយ៉ាងណានោះលោកស្រីលើកឡើងថា មានអត្ថប្រយោជន៍ 7 ចំណុចដែលម្ចាស់អចលនទ្រព្យគួរតែប្រើភ្នាក់ងារអចលនទ្រព្យគឺ ទី1. ភ្នាក់ងារអចលនទ្រព្យមានជំនាញក្នុងការពិគ្រោះ និងផ្តល់ការប្រឹក្សាយោបល់ផ្សេងៗឱ្យបានដឹងច្បាស់ទៅលើតម្លៃលក់នៅលើទីផ្សារដើម្បីឱ្យលក់ឆាប់ដាច់ និងតើគួរលក់ក្នុងតម្លៃទីផ្សារ ឬក្រោមតម្លៃទីផ្សារ។ ទី2. ជួនកាលម្ចាស់ផ្ទះមិនដឹងថាគួររៀបចំផ្ទះដោយរបៀបណានោះទេដើម្បីឱ្យមានការចាប់អារម្មណ៍ពីអ្នកទិញ ដូច្នេះភ្នាក់ងារលក់អាចមានសមត្ថភាព ឬអាចផ្តល់ជាយោបល់ក្នុងការរៀបចំតុបតែងផ្ទះឱ្យមានភាពទាក់ទាញពីអ្នកទិញដើម្បីលក់ឱ្យឆាប់ដាច់។ ទី3. ម្ចាស់ផ្ទះអាចមានពេលវេលាទៅធ្វើការរកស៊ីមុខរបរផ្សេងៗទៀតប្រសើរជាជាងខាតពេល និងជួបការរំខានពីការសាកសួរព័ត៌មានតាមទូរស័ព្ទ។
ទី4. ការទិញ-លក់អចលនទ្រព្យប្រមាណ99% ដែលត្រូវការកម្ចីពីធនាគារ ដូច្នេះភ្នាក់ងារអចលនទ្រព្យមានទំនាក់ទំនងដៃគូល្អជាមួយខាងធនាគារដើម្បីចាំជួយសម្រួលការទិញ-លក់ឱ្យដំណើរការបានលឿន។ ទី5. ភ្នាក់ងារអចលនទ្រព្យសុទ្ធតែមានមេធាវីចាំជួយលើការប្រឹក្សាតាមផ្លូវច្បាប់ដើម្បីធ្វើការដោះស្រាយនៅពេលការទិញ-លក់មានភាពមិនប្រក្រតីណាមួយកើតឡើង។ ទី6. មុននឹងនាំអតិថិជនទៅទិញ ភ្នាក់ងារបានធ្វើការសិក្សាច្បាស់លាស់ជាមុន បើសិនជាមានប្លង់ត្រឹមត្រូវ មិនជាប់ពាក់ព័ន្ធរឿងក្តីក្តាំផ្សេងៗទើបនាំអតិថិជនឱ្យទៅទិញ។ ទី7. ភ្នាក់ងារអចលនទ្រព្យរង់ចាំសម្របសម្រួលតាមផ្លូវច្បាប់ជានិច្ច រហូតដល់ដំណើរការទិញ-លក់បានចប់សព្វគ្រប់ ហើយនៅបន្តមានទំនាក់ទំនងល្អសម្រាប់ការងារក្រោយៗទៀត។
ចំណែកលោក ស៊ារ ឆៃលីន សមាជិកក្រុមប្រឹក្សាភិបាលសមាគម CVEA និងជាអគ្គនាយកក្រុមហ៊ុនស៊ីអិល រៀលធី ក៏មានប្រសាសន៍ដែរថា ក្នុងនាមម្ចាស់គម្រោងមិនគួរចំណាយពេលចាំទទួលទូរស័ព្ទសាកសួរព័ត៌មានពីអតិថិជននោះទេ ពួកគាត់គួរចំណាយពេលដើររកគម្រោងផ្សេងៗសម្រាប់ទិញ-លក់បន្តដែលទទួលបានអត្ថប្រយោជន៍ច្រើនជាងការមកអង្គុយលក់គម្រោងដោយខ្លួនឯង៕
