Philippe Coutinho បាននិយាយថា រូបគេកំពុងតែមានគោលដៅឈ្នះពាននានានៅឯក្លិប Barcelona ក្រោយពីបានបំពេញការផ្ទេរជាក្តីសុបិនរបស់គេជាផ្លូវការក្នុងតម្លៃខ្លួន160លានអឺរ៉ូ (ស្មើនឹង192លានដុល្លារអាមេរិក) ពីក្លិប Liverpool កាលពីថ្ងៃចន្ទ។
ខ្សែបម្រើស្លាបអន្តរជាតិប្រេស៊ីលរូបនេះ បានចុះហត្ថលេខាលើកុងត្រារយៈពេល5ឆ្នាំ ក្នុងកម្មវិធីមួយ ខណៈដែលរូបគេបានអង្គុយជាប់ជាមួយនឹងប្រធានក្លិប Barcelona លោក Josep Maria Bartomeu ដើម្បីធ្វើឲ្យរូបគេក្លាយជាកីឡាករមានតម្លៃខ្លួនខ្ពស់ជាងគេបំផុតលំដាប់ទី3ក្នុងប្រវត្តិសាស្ត្រនៃកីឡាបាល់ទាត់។
ក្រោយពីបានបង្ហាញខ្លួននៅឯកីឡដ្ឋាន Camp Nou ក្នុងនាមជាកីឡាកររបស់ Barcelonaរួចមក ខ្សែបម្រើស្លាប Coutinho បានឲ្យដឹងថា៖ «វាជាកិត្តិយសមួយសម្រាប់ខ្ញុំ ជាកិត្តិយសដ៏អស្ចារ្យមួយ និងក៏ជាក្តីសុបិនមួយក្នុងការមកទីនេះផងដែរ។ ខ្ញុំមានគោលដៅជាច្រើន ពោលគឺក្នុងការមកទីនេះ ដើម្បីរីករាយឈ្នះពាន និងជួបភាពរំភើប។ ខ្ញុំគិតតែលើបញ្ហានេះប៉ុណ្ណោះ»។
នៅមុនពេលខ្សែបម្រើអន្តរជាតិប្រេស៊ីលរូបនេះ បានចុះហត្ថលេខាលើកុងត្រារបស់គេ ក្លិប Barcelona បានបញ្ជាក់ថា បញ្ហារបួស នឹងពន្យារពេលនៃការបង្ហាញខ្លួនជាលើកទី1របស់គេ រហូតដល់ចុងខែមករា។ ក្រុមកំពុងតែនាំមុខលើតារាងក្របខ័ណ្ឌ La Liga មួយនេះ ក៏បានបញ្ជាក់ផងដែរថា Liverpool បានកាត់បន្ថយចំនួននៃតម្លៃខ្លួនដែលបានស្នើសុំពីតម្លៃខ្លួន200លានអឺរ៉ូ ក្រោយពីការអូសបន្លាយពេលនៃការផ្ទេរមួយនេះ អស់រយៈពេលដ៏យូរចាប់តាំងពីរដូវក្តៅមុន។
ការផ្ទេរនេះមានន័យថា Coutinho នឹងក្លាយជាកីឡាករមានតម្លៃខ្លួនខ្ពស់ជាងគេបំផុតលំដាប់ទី3 ក្រោយពីក្លិប Paris Saint-Germain បានចំណាយប្រាក់222លានអឺរ៉ូ ដើម្បីទិញ Neymar ពីក្លិប Barcelona មុនពេលជះទឹកប្រាក់180លានអឺរ៉ូ ដើម្បីនាំយកខ្សែប្រយុទ្ធ Kylian Mbappe ពីក្លិប Monaco ក្នុងរូបភាពខ្ចីជើងសិន មុននឹងបំពេញការផ្ទេរនៅពេលបញ្ចប់រដូវកាលបច្ចុប្បន្ន៕
ប្រភពពី៖ Sport24