តាមរយៈសារព័ត៌មាន Mthai ដែលចេញផ្សាយនៅពេលមុននេះបន្ដិច បានឱ្យដឹងថា តារាឯកស្រី Paris Hilton បានបញ្ចេញឃ្លិបវីដេអូមិត្តប្រុសរបស់នាងសុំនាងរៀបការនៅលើភ្នំដែលគ្របដណ្ដប់ដោយកម្រាលព្រឹលទឹកកក ជាមួយចិញ្ចៀនពេជ្រទំហំ 20 ការ៉ាត់ នៅលើបណ្ដាញសង្គមធ្វីតធើរ បណ្ដាលឱ្យអ្នកគាំទ្ររូបនាងមានការភ្ញាក់ផ្អើលយ៉ាងខ្លាំង ។
នៅថ្ងៃទី2 ខែមករា កន្លងទៅថ្មីៗនេះ លោក Chris Zylka បាននាំ Paris Hilton ជាមិត្តស្រី ធ្វើដំណើរកម្សាន្តនៅកាន់តំបន់ភ្នំ Aspen រដ្ឋ Colorado សហរដ្ឋអាមេរិក ហើយបានរៀបចំគម្រោងសុំនាងរៀបការនៅទីនោះ ធ្វើឱ្យតារាស្រីរូបនេះដែលមិនបានដឹងខ្លួនជាមុន ទៅជាញ័រដៃញ័រជើង ទន់ជង្គន់ ខណៈបានឃើញមិត្តប្រុសជូនចិញ្ចៀនពេជ្រទំហំ 20 ការ៉ាត់នៅនឹងមុខនាង។ នាងបានរៀបរាប់នៅលើធ្វីតធើរថា «នេះជាពេលវេលាដ៏សែនរ៉ូមែនទិកបំផុតនៅក្នុងឆាកជីវិត»៕