ក្រុមកាំភ្លើងធំ Arsenal បានរកគ្រាប់បាល់តាមស្មើនៅពេលជិតអស់ម៉ោងនៅក្នុងការប្រកួតជាមួយនឹងក្រុម Chelsea កាលពីថ្ងៃពុធ ដើម្បីសង្គ្រោះបាន1ពិន្ទុ ក្នុងពេលក្រុមទាំងពីរបានបញ្ចប់ក្នុងលទ្ធផលស្មើ 2-2 និងដើម្បីស្ថិតក្នុងការប្រជែងជាមួយនឹងក្រុមខ្លាំងទាំង6 របស់ក្របខ័ណ្ឌ Premier League។
ក្រុមម្ចាស់ផ្ទះបានរកគ្រាប់បាល់នាំមុខមុននៅដើមតង់ទី2 នៅពេលដែលខ្សែបម្រើឆ្នើម Jack Wilshere បានស៊ុតបាល់បញ្ចូលទីយ៉ាងល្អបំប៉ោងសំណាញ់ទីរបស់អ្នកចាំទី Thibaut Courtois ពីក្នុងប្រអប់គ្រោះថ្នាក់។ ប៉ុន្តែ ទោះបីជាយ៉ាងណា គ្រាប់បាល់របស់គេត្រូវបានតាមស្មើវិញភ្លាមៗក្នុងរយៈពេល4នាទីក្រោយមក នៅនាទីទី67 នៅពេលដែលខ្សែបម្រើស្លាប Eden Hazard បានស៊ុតបាល់ពិន័យ11ម៉ែត្រចូលទីយ៉ាងល្អ ក្រោយពីរូបគេត្រូវបានទាញឲ្យដួលដោយខ្សែការពារ Hector Bellerin ក្នុងប្រអប់គ្រោះថ្នាក់។
បន្ទាប់មក ក្រុម Chelsea បានគិតថា ពួកគេប្រហែលជានឹងបានទទួលជ័យជម្នះក្នុងការប្រកួតនេះហើយ នៅពេលដែល Marcos Alonso បានរកគ្រាប់បាល់នាំមុខនៅនាទីទី84 ប៉ុន្តែ Bellerin បានរកគ្រាប់បាល់ឱ្យ Arsenal តាមស្មើវិញនៅចុងម៉ោង ដើម្បីលុបលាងកំហុសរបស់ខ្លួនវិញតែម្តង។
Chelsea នៅតែស្ថិតក្នុងចំណាត់ថ្នាក់លេខ3 ដោយដេញតាមពីក្រោយក្រុម Manchester United 1ពិន្ទុ និង16ពិន្ទុតាមពីក្រោយក្រុមកំពុងនាំមុខ Manchester City ខណៈដែលក្រុម Arsenal ស្ថិតក្នុងចំណាត់ថ្នាក់លេខ6។ លោក Antonio Conte គ្រូបង្វឹករបស់ Chelsea បានប្រាប់ទូរទស្សន៍ BBC ថា៖ «ខ្ញុំគិតថា វាជារឿងដ៏គួរឲ្យសោកស្តាយមួយ ពីព្រោះនៅពេលដែលអ្នកមានឱកាសជាច្រើន ក្នុងការរកគ្រាប់បាល់ អ្នកត្រូវតែឈ្នះការប្រកួតនេះ។
ផ្ទុយទៅវិញ យើងកំពុងតែនិយាយពីលទ្ធផលស្មើពេលប្រកួតជាមួយនឹងក្រុមខ្លាំងមួយ ប៉ុន្តែ ក្នុងការប្រកួត យើងពិតជាស័ក្តិសមក្នុងការឈ្នះ ខណៈដែលយើងបានបង្កើតឱកាសជាច្រើន»៕
ប្រភពពី៖ The Telegraph
