ក្រុម Manchester City បានធ្វើការស្តារមុខមាត់ភ្លាមៗ ក្រោយពីការទទួលជ័យជម្នះជាប់ៗគ្នារបស់ពួកគេបានឈានដល់ទីបញ្ចប់ត្រឹម18ប្រកួត តាមរយៈការផ្តួលក្រុម Watford ក្នុងលទ្ធផល 3-1 កាលពីថ្ងៃអង្គារ ដើម្បីនាំមុខ15ពិន្ទុដាច់នៅលើកំពូលតារាងនៃក្របខ័ណ្ឌ Premier League កាលពីថ្ងៃអង្គារ។
ក្រោយពី Man City បានបញ្ចប់ក្នុងលទ្ធផលស្មើ ០-០ ជាមួយនឹងក្រុម Crystal Palace ក្នុងរយៈពេល48ម៉ោងមុននេះ ខ្សែបម្រើស្លាប Raheem Sterling បានរកគ្រាប់បាល់បញ្ចូលទីយ៉ាងឆាប់រហ័សបំផុត ហើយ Sergio Aguero បានបន្ថែម1គ្រាប់ទៀត ខណៈដែល Man City បានបន្តយុទ្ធនាការលីកដែលមិនស្គាល់ចាញ់របស់ពួកគេតាមរយៈការយកឈ្នះដោយងាយនៅកីឡដ្ឋាន Eastlands។
ជាមួយគ្នានេះ ក្រុមភ្ញៀវ ដែលកំពុងតែស្ថិតក្នុងចំណាត់ថ្នាក់លេខ10 ដោយសារតែការបង្ហាញពីទម្រង់លេងដ៏ល្អកាលពីដើមរដូវកាលនេះ បានរងបរាជ័យ10លើកក្នុងចំណោមការប្រកួត14លើកចុងក្រោយរបស់ពួកគេ។ លោក Pep Guardiola គ្រូបង្វឹករបស់ Man City បានឲ្យដឹងថា៖ «ការប្រកួតជាមួយនឹងក្រុម Crystal Palace គឺជាការប្រកួតលើកទី1ដែលយើងបានបាត់បង់ពិន្ទុ ក្នុងចំណោម19ប្រកួត ហើយអ្នកបានឃើញពីប្រតិកម្មនៅរយៈពេល15នាទីដំបូង»។
អ្នកចាត់ការទូទៅរូបនេះបានបន្ថែមទៀតថា៖ «នៅតង់ទី2 យើងគួរតែមានការអស់កម្លាំងជាងមុន និងពេញចិត្តទៅនឹងលទ្ធផល ប៉ុន្តែ យើងបានបង្ហាញពីភាពផ្សេងពីនោះទាំងស្រុង»។ ស្របពេលជាមួយគ្នានេះ ខ្សែប្រយុទ្ធ Fernando Llorente បានជួយឲ្យក្រុម Tottenham ទទួលជ័យជម្នះក្នុងលទ្ធផល 2-០ នៅលើទឹកដីអតីតក្រុមរបស់ខ្លួន Swansea កាលពីថ្ងៃអង្គារ៕
ប្រភពពី៖ The Guardian