ខ្សែប្រយុទ្ធអេស្ប៉ាញដើមកំណើតប្រេស៊ីល Diego Costa បានបង្ហាញខ្លួនទៅកាន់អ្នកគាំទ្រនៃក្លិប Atletico Madrid រួមជាមួយនឹងខ្សែបម្រើស្លាបអន្តរជាតិអេស្ប៉ាញម្នាក់ទៀតគឺ Vitolo ក្រោយពីក្លិបយក្សអេស្ប៉ាញមួយនេះ បានប្រកាសពីការផ្ទេរកីឡាករទាំងពីរជាផ្លូវការកាលពីថ្ងៃអាទិត្យ។
តារាឆ្នើម Costa បានសម្រេចក្តីសុបិនរបស់គេក្នុងការវិលទៅកាន់ក្លិប Atletico ក្រោយពីបានចំណាយពេលអស់៣ឆ្នាំ ជាមួយនឹងក្លិប Chelsea និងឈ្នះពានក្របខ័ណ្ឌ Premier League ចំនួន2លើក។ នៅពេលដែលត្រូវបានចោទសួរថា តើពេលវេលារបស់គេជាមួយនឹងក្លិប Chelsea យ៉ាងម៉េចដែរ រូបគេបានសើច និងនិយាយថា៖ «ខ្ញុំបានរៀនភាសាអង់គ្លេសនៅទីនោះ។ អ្នកគាំទ្រ មនុស្សក្នុងក្លិប និងមិត្តរួមក្រុមរបស់ខ្ញុំបានជួយខ្ញុំយ៉ាងច្រើន។ Chelsea ជាក្លិបដ៏អស្ចារ្យមួយហើយខ្ញុំមានការចងចាំដ៏ល្អនៅទីនោះ»។
Costa វ័យ29ឆ្នាំ មិនអាចលេងឲ្យក្រុម Atletico របស់លោក Diego Simeone បានឡើយ ដោយសារតែក្លិបនេះជាប់ពិន័យព្យួរលើការទិញចូលកីឡាករថ្មី មុននឹងការពិន័យនេះ បានបញ្ចប់កាលពីថ្ងៃទី1 ខែមករា ម្សិលមិញ។ កាលពីខែកញ្ញា ក្លិប Atletico បានប្រកាសពីការចុះហត្ថលេខាជាមួយនឹង Costa ខណៈដែលបណ្តាញសារព័ត៌មានអេស្ប៉ាញ បានបញ្ជាក់ថា ពួកគេបានយល់ព្រមចំណាយប្រាក់ឲ្យ Chelsea 60លានអឺរ៉ូ (ស្មើនឹង71.3លានដុល្លារអាមេរិក) ដើម្បីនាំយកកីឡាករម្នាក់ ដែលធ្លាប់ជាតារាឆ្នើមរបស់ពួកគេ ក្នុងពេលពួកគេបានឈ្នះពាន La Liga និងឈានទៅប្រកួតវគ្គផ្តាច់ព្រ័ត្រនៃក្របខ័ណ្ឌ Champions League ក្នុងរដូវកាលឆ្នាំ2013-2014។ ស្របពេលជាមួយគ្នានេះ Atletico ក៏យល់ព្រមលើតម្លៃខ្លួន37.5លានអឺរ៉ូ ដើម្បីចុះហត្ថលេខាយក Vitolo ពីក្លិប Sevilla ផងដែរ។ Vitolo បានចំណាយពេលពាក់កណ្តាលរដូវកាលនេះក្នុងនាមជាកីឡាករកម្ចីនៅឯក្លិប Las Palmas បើទោះបីរូបគេបានអវត្តមានកាលពេលថ្មីៗនេះ ដោយសារតែបញ្ហារបួសភ្លៅក៏ដោយ៕
ប្រភពពី៖ The Sun