លោក Arsene Wenger មិនជឿជាក់ថា តារាឆ្នើមអន្តរជាតិស៊ីលី Alexis Sanchez នឹងចាកចេញពីក្លិប Arsenal ក្នុងពេលបើកទីផ្សារដោះដូរកីឡាករចាប់ពីថ្ងៃទី1 ខែមករា ខាងមុខនេះឡើយ។
Sanchez ដែលកិច្ចសន្យារបស់គេនឹងផុតកំណត់នៅចុងរដូវកាលនេះ បានផ្តល់ការរំឭកដ៏ល្អឥតខ្ចោះមួយចំពោះក្លិបដែលចាប់អារម្មណ៍លើរូបគេ តាមរយៈការស៊ុតបាល់បញ្ចូលទី2គ្រាប់ក្នុងចន្លោះពេល4នាទីក្នុងតង់ទី2 ដើម្បីជួយឲ្យក្រុម Arsenal ទទួលជ័យជម្នះក្នុងលទ្ធផល 3-2 លើក្រុម Crystal Palace កាលពីថ្ងៃព្រហស្បតិ៍។
ប៉ុន្តែទោះបីជាយ៉ាងណា លោក Wenger ដែលបានតាមស្មើកំណត់ត្រារបស់អតីតគ្រូបង្វឹកនៃក្លិប Manchester United លោក Alex Ferguson ក្នុងការដឹកនាំការប្រកួតបានចំនួន 810លើកក្នុងក្របខ័ណ្ឌ Premier League ក្នុងនាមជាគ្រូបង្វឹកដែរនោះ បានប្រាប់ទូរទស្សន៍ Sky Sports ថា លោកជឿជាក់ថា Sanchez ដែលបានធ្វើឲ្យគ្រាប់បាល់សរុបរបស់គេកើនដល់8គ្រាប់ក្នុង Premier League នៅរដូវកាលនេះ នឹងបន្តនៅជាមួយ Arsenal។
លោក Wenger បានឲ្យដឹងថា៖ «ខ្ញុំមិនមានការបារម្ភឡើយ ប៉ុន្តែ ដូចដែលអ្នកបាននិយាយអ៊ីចឹង ការចាប់អារម្មណ៍លើរូបគេនឹងមានការកើនឡើងដោយសារតែស្ថានភាពនៃកិច្ចសន្យា។ ខ្ញុំអាចត្រឹមតែបញ្ជាក់ម្តងទៀតពីអ្វីដែលខ្ញុំបាននិយាយមកទល់ពេលនេះប៉ុណ្ណោះ»។ ជ័យជម្នះនេះ មានន័យថា ក្រុម Arsenal មានពិន្ទុស្មើជាមួយនឹងក្រុមឈរលេខ5 Tottenham ប៉ុន្តែ មានគ្រាប់បាល់ស៊ុតបញ្ចូលទីតិចជាង៕
ប្រភពពី៖ Sky Sports