ដើម្បីជួយសម្រួលដល់ការធ្វើដំណើររបស់ភ្ញៀវទេសចរ និងពាណិជ្ជករដែលកំពុងកើនឡើងនៅតាមច្រកទ្វារព្រំដែនអន្ដរជាតិ រាជរដ្ឋាភិបាលកម្ពុជា និងថៃ នាពេលកន្លងមកបានឯកភាពគ្នានឹងបង្កើតច្រកទ្វារព្រំដែនអន្ដរជាតិថ្មី4បន្ថែមទៀត។
ឯកឧត្ដម ថោង ខុន រដ្ឋមន្ដ្រីក្រសួងទេសចរណ៍ បានលើកឡើងថា ថ្មីៗនេះរាជរដ្ឋាភិបាលកម្ពុជា និងថៃ បានឯកភាពគ្នាបង្កើតច្រកទ្វារព្រំដែនអន្ដរជាតិចំនួន4កន្លែងបន្ថែមទៀត។ គម្រោងនេះនឹងផ្តល់នូវភាពងាយស្រួលដល់ការធ្វើដំណើរសម្រាប់ភ្ញៀវទេសចរនៅតាមច្រកទ្វារព្រំដែនអន្ដរជាតិ ហើយក៏ជាយុទ្ធសាស្ដ្រដ៏សំខាន់ក្នុងការទាក់ទាញភ្ញៀវទេសចរអន្តរជាតិឱ្យចូលមកទស្សនាប្រទេសកម្ពុជាបានកាន់តែច្រើនផងដែរ។
ច្រកទ្វារព្រំដែនអន្ដរជាតិទាំង 4 រួមមាន ទី1ច្រកទ្វារអន្ដរជាតិអានសេះស្ថិតក្នុងខេត្ដព្រះវិហារជាប់ច្រកអានម៉ា ស្ថិតក្នុងខេត្ដអ៊ូប៊ុន ទី2 ច្រកទ្វារអន្ដរជាតិជប់គគី ស្ថិតក្នុងខេត្ដឧត្ដរមានជ័យ ជាប់ច្រកសែទូគោ ខេត្ដបូរីរ៉ាំ ទី3 ច្រកទ្វារអន្ដរជាតិភ្នំជី ខេត្ដបាត់ដំបង ជាប់ច្រកខោនឌីន ខេត្ដស្រះកែវ និងទី4 ច្រកទ្វារអន្ដរជាតិថ្មដា ខេត្ដពោធិ៍សាត់ ជាប់ច្រកថាសេន ខេត្ដស្រះកែវ។
រដ្ឋមន្ដ្រីក្រសួងទេសចរណ៍ បានបញ្ជាក់ថា ការកាត់បន្ថយរបាំងនៃការធ្វើដំណើរមិនចាំបាច់ក៏ជាការសម្រេចបាននូវកំណើននៃភ្ញៀវទេសចរទៅតាមផែនការ និងការគ្រោងទុកផងដែរ។ ជាមួយគ្នានេះកម្ពុជាត្រូវបើកយន្ដការចូលរួមធ្វើឱ្យពិភពលោកក្លាយជាកន្លែងដែលកាន់តែប្រសើរ និងឈានទៅដល់ការអភិវឌ្ឍប្រកដោយនិរន្ដរភាពលើសសរគ្រឹះទាំង5 ដែលរួមមាន សេដ្ឋកិច្ច សង្គម បរិស្ថាន វប្បធម៌ និងសន្ដិភាព។
បច្ចុប្បន្នកម្ពុជាមានច្រកទ្វារព្រំដែនអន្ដរជាតិសរុបចំនួន24 ក្នុងនោះមានច្រកទ្វារអាកាសយាន្ដដ្ឋានអន្ដរជាតិចំនួន3 ច្រកទ្វារកំពង់ផែអន្ដរជាតិ ចំនួន4 ច្រកទ្វារព្រំដែនអន្ដរជាតិមានចំនួន17 ដោយក្នុងនោះច្រកទ្វារព្រំដែនកម្ពុជា-វៀតណាម មានចំនួន10 កម្ពុជា-ថៃ មានចំនួន 6 និងកម្ពុជា-ឡាវមានចំនួន1កន្លែង។
ការឯកភាពគ្នាបើកច្រកទ្វារព្រំដែនអន្ដរជាតិថ្មីទាំង4 ត្រូវបានគេមើលឃើញថា មិនត្រឹមតែសម្រួលដល់ការធ្វើដំណើរដល់ភ្ញៀវទេសចរមកកាន់ប្រទេសកម្ពុជាប៉ុណ្ណោះទេ តែវាក៏នឹងជួយជំរុញកំណើនទំហំពាណិជ្ជកម្មទ្វេភាគីរវាងកម្ពុជា-ថៃឱ្យបានដល់15,000លានដុលា្លរអាមេរិកក្នុងឆ្នាំ2020។
អតីតឯកអគ្គរាជទូតថៃ ប្រចាំព្រះរាជាណាចក្រកម្ពុជា ឯកឧត្ដម Nuthavudh Photisaro ធ្លាប់បានលើកឡើងថា ការបើកច្រកព្រំដែនបន្ថែមទាំង4កន្លែងធ្វើឡើងដើម្បីជួយសម្រួលដល់ដំណើរនៃការធ្វើពាណិជ្ជកម្មទ្វេភាគី និងជួយសម្រួលដល់ដំណើរឆ្លងកាត់របស់ភ្ញៀវទេសចរក្នុងការចេញចូលឆ្លងកាត់ទៅមករវាងប្រទេសទាំងពីរ។ ដោយមើលឃើញកំណើនពាណិជ្ជកម្មនៃប្រទេសទាំងពីរមានការកើនឡើងជាបន្ដបន្ទាប់ ដូច្នេះដើម្បីជំរុញឱ្យទំហំពាណិជ្ជកម្មនៃប្រទេសទាំងពីអាចដើរទៅដល់ផែនការទើបឈានដល់ការឯកភាពបើកច្រកព្រំដែនអន្ដរជាតិទាំង4បន្ថែមទៀត៕
